ភ្នំពេញ៖ ឧបនាយករដ្ឋមន្រ្តី និងជារដ្ឋមន្រ្តី ក្រសួងការពារជាតិកម្ពុជា នាយឧត្តមសេនីយ៍ ទៀ បាញ់ នឹងអញ្ជើញ​ទៅ​បំពេញទស្សនកិច្ច នៅទីក្រុង ហាវ៉ាយ សហរដ្ឋអាម៉េរិក នាចុងខែ​មីនា​នេះ ដើម្បីទៅចូលរួម កិច្ចប្រជុំ រដ្ឋ​មន្រ្តី​ការ​ពារ​អាស៊ាន-អាម៉េរិកលើកទី១០ ដែលនឹងប្រព្រឹត្ត​ទៅ នាថ្ងៃទី១-៣ខែមេសា ឆ្នាំ២០១៤ ។ មន្រ្តីក្រសួងការពារជាតិ ដែល​នឹងមានវត្តមានទៅចូលរួមដែរនោះ បានឲ្យដឹងថា​ ឧបនាយក​រដ្ឋមន្រ្តី និង ជារដ្ឋមន្រ្តី ក្រសួងការពារជាតិកម្ពុជា នាយ​ឧត្តមសេនីយ៍ ទៀ បាញ់​ នឹងចេញ​ពី​ប្រទេសកម្ពុជា នាថ្ងៃទី៣០ ខែមីនា តាមគម្រោង នាយឧត្តមសេនីយ៍ ទៀ បាញ់ នឹងជួប​ពិភាក្សា​​ការងារ​ទ្វេភាគីជាមួយនិងរដ្ឋមន្រ្តីក្រសួងការពារជាតិអាម៉េរិកលោក Chuck Hagel ផងដែរ។

តាមកម្មវិធីដែលបានគ្រោងទុក កិច្ចប្រជុំរដ្ឋមន្រ្តីក្រសួងការពារជាតិ អាស៊ាន-សហរដ្ឋអាម៉េរិក​នេះនឹងលើកប្រធាន​បទ​​​​​​​​​​ជា​​​​​​​​ច្រើនដែលទាក់ទងនឹង សន្តិសុខ ក្នុងតំបន់ ក៏ដូចជា​ស៊ីប៉ាស៊ី​ហ្វិក​ទាំងមូលមកធ្វើការជជែកផ្លាស់ប្តូរ​​យោបល់​គ្នា។ ហើយកិច្ចប្រជុំនេះគឺលើកទីមួយហើយដែល​បានធ្វើឡើងនៅទឹក​ដី​សហរដ្ឋ​អាម៉េរិកនោះ។ ទាក់ទងនឹង​​​​​​​​​​ដំណើរបំពេញទស្សនកិច្ចនេះ យើងមិនអាចសុំការអធិប្បាយបន្ថែម ពីនាយឧត្តម​សេនីយ៍ ណឹម សុវត្ថិ បានទេ។ តែ​យ៉ាង​​​​​​​​​ណាក្តី បើយោងតាមគេហទំព័រ ក្នុងស្រុកមួយ​របស់សហរដ្ឋអាម៉េរិកដែលមានឈ្មោះថា Star Advertiserបានឲ្យ​​ដឹងថា កិច្ចប្រជុំនេះនឹងធ្វើ​ឡើង​នៅទីក្រុង ហូណូលូលូ រដ្ឋ ហាវ៉ៃ ចំនួនបួនថ្ងៃ ដើម្បីផ្លាស់ប្តូរយោបល់គ្នាទៅវិញ​ទៅ​មក​​ផ្នែក សន្តិសុខក្នុងតំបន់អាស៊ាន។

គេហទំព័រខាងលើបានបន្តថា កិច្ចប្រជុំនេះនឹងស្តីអំពីជំនួយជួយសង្រ្គោះ ផ្នែកមនុស្សធម៌ គ្រោះមហន្តរាយ និងអំពី​​​​​​ស្ថាបត្យកម្មសន្តិសុខក្នុងតំបន់ជាដើម។ ហើយមិនតែប៉ុណ្ណោះ កិច្ចប្រជុំ ក៏នឹងលើកអំពីការពង្រឹងភាពជាដៃគូររវាង​​​ក្រសួង​ការពារជាតិអាស៊ាន​និងសហរដ្ឋ​អាម៉េរិក ដើម្បីស្ថិរភាពសន្តិសុខក្នុងតំបន់អាស៊ី និងពិភពលោក​​​​​​​​​​​​ទាំងមូល​ផង​ដែរ៕

ដោយ៖ ស.ស្អាត