ភ្នំពេញ៖ ក្នុងរយៈពេល១០ឆ្នាំចុងក្រោយនេះ វិស័យសិល្បៈទស្សនីយភាព និងល្ខោន នាដកម្ម ខ្មែរ បានជួបប្រទះនិ​ងបញ្ហាប្រ​ឈម​ចំពោះមុខយ៉ាងខ្លាំង ។ សិល្បករមួយចំនួនបានស្លាប់​បាត់​បង់ជីវិត អ្នកនៅសល់មានវ័យជរា និងអ្នកបង្កើតស្នាដៃ​ផ្សេងៗ​មួយ​ចំនួនកាន់តែ​ចាស់​ជរា​ទៅៗ ការបណ្តុះបណ្តាលសិល្បៈបន្តវេន និងការផ្ទេរ​ចំណេះដឹងទាំងក្នុង និងក្រៅប្រព័ន្ធ​នៅ​មាន​កម្រិត​។

រីឯចរន្តសកលភាវូបនីយកម្ម និងការរីកចំរើននៃបច្ចេកវិទ្យា កំពុងជំរុញឲ្យមានការហូរ​ចូលនូវវប្បធម៌​សិល្បៈ​មកពី​ខាង​ក្រៅ​ក៏​កាន់​តែច្រើនពីមួយថ្ងៃទៅមួយថ្ងៃ។ថ្លែងនៅក្នុងឱកាស បើកមហោស្របសិល្បៈ មហាជនអភិវឌ្ឍន៍ថ្នាក់ជាតិ នាព្រឹកថ្ងៃទី២១​ខែកុម្ភៈ ឆ្នាំ២០១៤នេះ លោក ឃឹម សារិទ្ធ រដ្ឋលេខាធិការ ក្រសួងវប្បធម៌ និងវិចិត្រសិល្បៈ បានឲ្យដឹងថា  ដើម្បីទប់ស្កាត់​និង​ឆ្លើយតបឲ្យបានទាន់ពេលវេលា ក្នុងការជំរុញការបង្ករ​បង្កើន​ផលិតផលវប្បធម៌ថ្មីៗបន្ថែមទៀតនោះទាមទារត្រូវមានវិធានការ​ជាក់លាក់ និងសមស្រប​មួយ​ចំនួន តាមរយៈការពអ្រឹងនិងអនិវត្តគោលគំនិត រដ្ឋគាំទ្រ ឯកជនអនុវត្ត និងជម្រុញឲ្យមានការ ចូលរួមឲ្យបានកាន់តែទូលំទូលាយពីសំណាក់ ក្រុមសិល្បៈមហាជន និងសមាគមន៍សិល្បក្រៅ រដ្ឋាភិបាល ដើម្បីលើកស្ទួយភាពជាម្ចាស់លើវិស័យនេះ។

កែលម្អរ បណ្តុះបណ្តាល ធ្វើទំនើប​កម្ម សម្រាប់អ្នកនិពន្ធ អ្នកដឹកនាំរឿង អ្នកសំដែង និងអ្នកពាក់ព័ន្ធ​ទាំងអស់​ដោយឈរលើ​មូល​ដ្នា​នគ្រឹះនៃវប្បធម៌ប្រពៃណី និងអត្តសញ្ញាណជាតិ។

លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈមានប្រសាសន៍ថា គោលបំ ណងនៃការបើក​មហោស្រប​ឆ្នាំ​នេះ គឺដើម្បីជម្រុញធ្វើឲ្យសម្រេចគោលដៅ កម្ពុជា ព្រះរាជា​ណា​ចក្រវប្បធម៌ និងប្រែក្លាយព្រះរាជាណាចក្រកម្ពុជា ឲ្យទៅជា​មជ្ឈ​​​​មណ្ឌល​នៃការផ្សព្វផ្សាយសិល្បៈទស្សនីយភាពខ្មែរក្នុងបុព្វហេតុនៃការអភិរក្សនិងការអភិវឌ្ឍបេតិកភណ្ឌវប្បធម៌​អរូបិ​យ៍​ជាតិឲ្យបានគង់វង់និងរីកចំរើនឡើងវិញនាថ្ងៃអនាគត។

លោកស្រីរដ្ឋមន្រ្តីបន្តថា ក្រសួង និងភាគីពាក់ព័ន្ធបានកសាងផែនការ និងសកម្មភាព​ប្រតិបត្តិ​រយៈពេល៥ឆ្នាំ ដោយផ្តោត​លើ​ការ​បណ្តុះបណ្តាល អ្នកនិពន្ធ អ្នកដឹកនាំរឿង អ្នកសំដែង អ្នកបច្ចេកទេស ការស្ថាបនាស្នាដៃថ្មី និងការបើកមហោស្រម​មហា​ជន​អភិវឌ្ឍន៍ថ្នាក់រាជធានី ខេត្ត ថា្នក់ភូមិភាគ និងថ្នាក់ជាតិ ដើម្បីអភិវឌ្ឍសិល្បៈមហាជនឲ្យក្លាយជាសិល្បៈអភិវឌ្ឍន៍​ពិតប្រាកដ។

យ៉ាងណាក៏ដោយលោកស្រីរដ្ឋមន្រ្តី បានជម្រុញឲ្យសិល្បៈមហាជនទាំងអស់អភិវឌ្ឍន៍​ខ្លួន​ប្រកបដោយគុណភាព និងមាន​លក្ខណៈ​សម្បត្តិ ដោយផ្តោតលើតួនាទីរូបវន្ត បម្រើឲ្យសេចក្តី សប្បាយរីករាយថ្លៃថ្នូរបស់មហាជន ប្រជាជន និងយុវជន ផ្តល់​នូវសម្រស់វប្បធម៌ ២យ៉ាង គឺរូបសម្រស់ និងសារៈសម្រស់​ និងបម្រើឲ្យមានការអប់រំ ការផ្សព្វផ្សាយឲ្យមានតម្លៃសិល្បៈ ព្រម​ទាំងការអភិវឌ្ឍន៍ចំណេះដឹងវប្បធម៌ជាតិផងដែរ។

លោកស្រី ភឿង សកុណា បានចាត់ទុកថា មហោស្រពលើកនេះ មានសារសំខាន់ ដល់ការ​លើកស្ទួយការចូលរួមរបស់​មហា​ជន និងការលើកទឹកចិត្តសិល្បៈករ សិល្បៈការិនីទាំងអស់​ក្នុង​ការ​ប្រកួតប្រជែង សម្តែងសិល្បៈទស្សនីយភាពបង្កើន​សមត្ថភាពនិង​ទេពកោសល្យច្នៃ​ប្រឌិត សំដៅរួមចំណែកថែរក្សាការពារ តម្លៃ វប្បធម៌ប្រពៃណី ទំនៀមទំលាប់ ដែលជាបេតិ​ក​ភណ្ឌ​អរូបីយ​របស់​​​​​ជាតិ ។ ឆ្លងតាមការបើកមហោស្រពនេះដែរ ក៏នឹងរកឃើញក្រុមសិល្បៈ មហាជនគំរូ ព្រមទាំងអាចប្រមូលផ្តុំបាននូវ​ទិន្ន​ន័យ​​សិល្បៈ​មហាជន​ទូទាំងប្រទេស ដើម្បីចុះ​បញ្ជីសារពើភណ្ឌ បេតិ​ក​ភណ្ឌ​អរូបីយជាតិ និងរក្សាទុកជាឯកសារ​សិក្សាស្រាវជ្រាវ​បន្តទៅ​អនាគត៕ ដោយ៖ ស​ស្អាត