ប្រទេសអ៊ុយក្រែន៖ យោងតាមភ្នាក់ងារសារព័ត៌មាន BBC បានអោយដឹងថា ការប៉ះគ្នាមួយកាលពីថ្ងៃពុធម្សិលមិញ រវាងកងកម្លាំងសន្តិសុខនៅក្នុងទីក្រុង Kiev ហើយនិងក្រុមអ្នកតវ៉ាគឺបានឆក់យកជីវិតមនុស្សយ៉ាងហោចណាស់ ២១ នាក់និងបានបណ្តាលអោយមនុស្សយ៉ាងហោចណាស់ ២០នាក់ផ្សេងទៀតទទួលរងរបួសជាទំងន់។ សាក្សីម្នាក់បាន
មានប្រសាសន៍ថា ភាគច្រើ​ននៃអុ្នកស្លាប់ខាងលើនេះគឺបានស្លាប់ដោយសារការបាញ់ពីសំណាក់កងកម្លាំងសន្តិសុខ។ សូមបញ្ជាក់ថា​ មន្រ្តីប៉ូលីសម្នាក់ក៏បានស្លាប់នៅក្នុងការប៉ះទង្គិចគ្នាខាងលើនេះដែរ។ ភ្នាក់ងារសារព័ត៌មាន BBC បានមានប្រសាសន៍បន្ថែមទៀតថា ការទង្គិចគ្នាខាងលើនេះគឺបានកើតឡើងនៅក្នុងតំបន់  Independence Square​
នៃទីក្រុង Kiev ស្របពេលដែលមន្រ្តីក្រសួងកាបរទេសសហភាពអឺរ៉ុបចំនួន ៣នាក់គឺកំពុងតែជួបប្រជុំជាមួយ លោក
ប្រធានាធិបតី Viktor Yanukovych។ របាយការណ៍មួយបានអោយដឹងថា នៅពេលមានហេតុការណ៍កើតឡើង មន្រ្តីក្រសួងកាបរទេសជាច្រើននាក់ដែលមកពីបារាំង ប៉ូឡូញ និងប្រទេសអាល្លឺម៉ង់គឺបានភៀសខ្លួន តែក្រោយមក ពួកគេទាំងអស់នោះក៏បានចូលរួមក្នុងអង្គប្រជុំវិញ៕ ដោយ៖ តុលា