ភ្នំពេញ៖ សាលារាជធានីភ្នំពេញ កាលពីថ្ងៃទី១៧ ខែមករា បានសេចក្តីជូនដំណឹងមួយ ស្តីពីការណែនាំ អំពីការៀបចំ ប្រារព្ធពិធីបុណ្យចូលឆ្នាំប្រពៃណីចិន វៀតណាម ដែលនឹងចាប់ផ្តើមពីថ្ងៃទៅ៣០ ខែមករា រហូតដល់ថ្ងៃទី ២កុម្ភៈ ខាងមុខ។ នៅក្នុងសេចក្តីជូនដំណឹង បានលើកឡើងថា ដើម្បីរក្សាសន្តិសុខ សណ្តាប់ធ្នាប់ និងរបៀបរៀបរយសាធារណៈ សាលារាជធានីភ្នំពេញ សូមធ្វើការណែនាំ ទៅដល់ មន្ទីរ អង្គភាព ខណ្ឌ សង្កាត់ សមាគន ក្រុមហ៊ុនឯកជន អង្គការក្រៅរដ្ឋាភិបាល និងសាធារណៈជន ក្នុងរាជធានីភ្នំពេញ ចំនួន ៧ចំណុច៖
១. ហាមដាច់ខាត មិនឲ្យលេងល្បែងគ្រប់ប្រភេទ ដែលមានលក្ខណៈស៊ីសង។ រាល់ការបួងសួងផ្សេងៗ តាមបែបសាសនា ឬប្រពៃណីដែលគ្មានការអនុញាត ត្រូវហាមឃាត់។ នៅគ្រប់កន្លែងកំសាន្តសប្បាយនានា មន្ទីរ អង្គភាព រោងចក្រ សហគ្រាស គេហដ្ឋាន ត្រូវរក្សាសន្តិសុខ សុវត្ថិភាព សណ្តាប់ធ្នាប់សាធារណៈ សេចក្តីថ្លៃថ្នូរ និងត្រូវប្រុងប្រយ័ត្ន ក្នុងការអុជធូប ក្រដាសសែន ភ្លើងចង្ក្រាន ចរន្តអគ្គីសនី ដែលបង្កឲ្យកើតឡើងនូវគ្រោះអគ្គីភ័យ ជាយថាហេត។ ដោយឡែកការដុតក្រដាសសែន ត្រូវប្រើធុងដែក ឬឆ្លាំងដីដើម្បី ដុត ហាមដាច់ខាតមិនឲ្យដុតលើចិញ្ចើមផ្លូវ ឬលើទ្រូងផ្លូវសាធារណៈ។
ចាប់ពីពេលនេះតទៅ អជ្ញាធរមានសមត្ថកិច្ច គ្រប់ថ្នាក់ ត្រូវមានវិធានការឲ្យម៉ឹងម៉ាត់បំផុត កុំឲ្យមានការនាំចូល ផាវ កាំជ្រូច ជាតិផ្ទុះគ្រប់ប្រភេទ តាមច្រកចូលរាជធានីភ្នំពេញ និងត្រូវត្រួតពិនិត្យ ដកហូតវត្ថុទាំងនេះ ដែលមានតាំងលក់ នៅគ្រប់ទីកន្លែង ក្នុងរាជធានីភ្នំពេញ។ គ្រប់អង្គភាព សាលាខណ្ឌ និងសង្កាត់ ត្រូវផ្សព្វផ្សាយ ណែនាំ ដល់មន្ត្រីរាជការ និយោជិក កងកម្លាំងក្រោមឱវាទ និងប្រជាពលរដ្ឋក្នុងមូលដ្ឋាល ឲ្យអនុវត្តតាមការណែនាំនេះ ឲ្យមានប្រសិទ្ធិភាព។
មន្ទីរធម្មការ និងសាសនាក្នុងរាជធានីភ្នំពេញ ត្រូវអញ្ជើញបណ្តាសមាគមចិន វៀតណាម ដើម្បីផ្សព្វផ្សាយនូវខ្លឹមសារ ខាងលើឲ្យបានទូលំទូលាយ។ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងបញ្ជាការដ្ឋានយោធភូមិ ភាគពិសេស ត្រូវចេញបទបញ្ជា ឲ្យបានម៉ឹងម៉ាត់ ដល់កម្លាំងរបស់ខ្លួន ដើម្បីអនុវត្តឲ្យមានប្រសិទ្ធិភាព។
សូមបញ្ជាក់ថា ជនណាបំពានសេចក្តីណែនាំនេះ ឬប្រព្រឹត្តល្មើសបង្កឲ្យមានចលាចលក្នុងសង្គម បាត់សណ្តាប់ធ្នាប់ សន្តិសុខ សុវត្ថិភាព និងរបៀបរយសាធារណៈ ត្រូវទទួលទោសតាមច្បាប់ជាធរមាន៕
ដោយ៖ ភីនរ៉ា