ភ្នំពេញ៖ គណបក្សហ៊្វុនស៊ិនប៉ិច បានសរសេរលិខិតទៅថ្វាយព្រះមហាក្សត្រ សម្ដេច ព្រះបរមនាថ នរោត្តម​សីហមុនី ព្រះមហាក្សត្រ នៃព្រះរាជាណាចក្រកម្ពុជា ឲ្យមានព្រះបរម រាជតម្រិះការសំរបសំរួល​ឬការចរចាន​យោ​​បាយ​​ រវាងគណបក្សនយោបាយទាំងពីរ ដែលកំពុង តែថ្នាំងថ្នាក់ជាមួយគ្នាក្នុងពេលបច្ចុប្បន្ននេះ។

នៅក្នុងលិខិតចុះថ្ងៃទី៨ ខែមករា ឆ្នាំ២០១៤ ឡាយព្រហស្ដលេខា ដោយសម្តេចព្រះរាជបុត្រី ព្រះអនុជ នរោត្តម អរុណរស្មី ប្រធានគណបក្សហ៊្វុនស៊ិនប៉ិចបានឲ្យដឹងថា នៅក្នុងកាលៈ​ទេសៈនៃអាយុជីវិតជាតិនេះ មាន​តែព្រះបរ​​ម​​​រាជ​​​តម្រិះរបស់ព្រះមហាក្សត្រ ជាទីសក្ការៈនៃ​ប្រជា​នុ​រាស្ត្រ កូនចៅទាំងអស់គ្នាទេ ទើបអាចធ្វើឲ្យ​មានការសំរប​សំរួល ឬការចរចានយោ​បាយ សំរាប់រក្សាបាននូវស្ថិរភាពនិង សន្តិភាពជាតិ កត្តាចំបងនៃសាមគ្គីជាតិ និងឯកភាព​ជាតិខ្មែរ ដែលមានព្រះករុណាព្រះមហាក្សត្រ កំពុងគង់ជានិមិត្តរូបនិងជាម្លប់ដ៏ត្រជាក់ សម្រាប់ ជាតិទាំងមូល។លោក ញឹក ប៊ុនឆៃ ឧបនាយករដ្ឋមន្រ្តី និងជាអគ្គលេខាធិការ គណបក្សហ៊្វុនស៊ិនប៉ិច មាន ប្រសាសន៍ថា លិខិតនេះ គណបក្ស​​ហ៊្វុនស៊ិនប៉ិច បានដាក់ជូនទៅព្រះបរមរាជវាំងហើយ ប៉ុន្តែមិនទាន់មានការឆ្លើយតបនៅឡើយទេ តែលិខិត​នោះ​​បានទូលថ្វាយព្រះករុណាហើយ។

លោកបន្តថា លិខិតធ្វើឡើងដើម្បីឲ្យស្ថានការណ៍នយោបាយ នៅក្នុងប្រទេស មានភាពធូរ ស្រាលបន្តិច បន្ទាប់ពី​​​មាន​​​ការបាញ់សម្លាប់នាពេលកន្លងមក ។ ដូច្នេះយើងសូមអំពាវនាវឲ្យ គណបក្សទាំងពីរ ត្រូវចូលរួមការចរចា​ជាចាំ​បាច់ ដើម្បីបញ្ចប់បញ្ហានៅសេសសល់។កន្លងមកអ្នកវិភាគមួយចំនួនក៏ធ្លាប់បានដាក់លិខិតសូមព្រះរាជអន្តរាគមន៍ ពីព្រះមហាក្សត្រ​ផងដែរ ឲ្យព្រះអង្គជួយដោះស្រាយបញ្ហាសេសសល់ រវាងគណបក្សជាប់ឆ្នោតទាំងពីរ គឺគណ​បក្ស​ប្រជាជនកម្ពុជា និងគណបក្សសង្គ្រោះជាតិ។ចំណែកលោក ជាម យៀប ប្រធានគណៈកម្មការហិរញ្ញវត្ថុ និងសវន​កម្ម​​ជាតិនៃរដ្ឋសភា និង​ជាតំណាងរាស្ត្រគណបក្សប្រជាជនកម្ពុជាមានប្រសាសន៍ ស្វាគមន៍ចំពោះលិខិតរបស់ គណ​បក្ស​ហ៊្វុនស៊ិនប៉ិច ថ្វាយព្រះមហាក្សត្រ ឲ្យជួយដោះស្រាយបញ្ហានយោបាយនេះ ដើម្បីសុខ​សន្តិភាព ប៉ុន្តែ អាស្រ័យ​ទៅលើព្រះរាជាសិទ្ធិ របស់ព្រះមហាក្សត្រទៅវិញទេ។

លោកបន្តថា ជំហររបស់គណបក្សប្រជាជនកម្ពុជា នៅតែរក្សាជំហរនៃការចរចាជារឿងចំបង ព្រោះអីកន្លងមកគេ (គណបក្សសង្គ្រោះជាតិ) មិន ដែលអនុវត្តតាមរដ្ឋធម្មនុញ្ញ និងការអំពាវ​នាវ​របស់ព្រះមហាក្សត្រនោះទេ។ជាមួយ​គ្នានេះដែរ លោក យ៉ែម បុញ្ញាឫទ្ធ អ្នកនាំពាក្យគណបក្សសង្គ្រោះជាតិ មាន​ប្រសាសន៍​ថា ទាំងគណបក្ស ហ៊្វុនស៊ិន​ប៉ិច ក៏ដូចជាសង្គមស៊ីវិល មានគំនិតយាង ព្រះមហាក្សត្រ ព្រះរាជ​អន្តរា​គមន៍ ដោះស្រាយបញ្ហានយោបាយ ជាគំនិត​មួយដ៏ល្អត្រឹមត្រូវ អាចយកមកពិចារ​ណា​បានព្រោះបើយោងទៅលើរដ្ឋធម្មនុញ្ញ ព្រះអង្គមានភារកិច្ចដោះ​ស្រាយ​បញ្ហាធំៗ សម្រាប់​ប្រទេសជាតិ ក្នុងគ្រាមានកង្វល់ ឬមានទុក្ខលំបាក ៕

ដោយ៖ ស.ស្អាត