ក្រចេះ ៖  ប្រជាពលរដ្ឋនាំគ្នារិះគន់អាជ្ញាធរមានសមត្ថកិច្ចពាក់ព័ន្ធនៅឃុំក្បាលដំរី ស្រុកសំបូរ ខេត្តក្រចេះថា មិន​​​ហ៊ាន​​​ចុះបង្រាបទីតាំងសិប្បកម្មកែច្នៃឈើប្រណីតចំនួន៣កន្លែង ដែលស្ថិត​ក្នុងដែនសមត្ថកិច្ចរបស់ខ្លួន បើទោះជា​មាន​​​​គេរាយការណ៍មកថា អាជីវកម្មទាំងនោះគ្មានច្បាប់​អនុញ្ញាតិ ហើយ​កំពុងធ្វើអាជីកម្ម​ដោយរលូន​យ៉ាងណាក៏​ដោយ​ ក៏ពុំមានការរំខានពីសំណាក់​សមត្ថកិច្ច​រដ្ឋបាលព្រៃឈើ ឬ អាជ្ញាធរដែនដី​ដែលគ្រប់គ្រងនៅតំបន់​នោះ​ឡើយ។ប្រជាពលរដ្ឋបានបង្ហាញទៀតថា ទីតាំងសិប្បកម្មទាំង៣កន្លែងដែលកំពុងសម្ងំលាក់ខ្លួនលួច​ធ្វើ​​​អាជី​​វកម្ម មាននៅភូមិចង្ហប១កន្លែង និង២កន្លែងទៀតនៅចំណុចស្រែស្បូវ ច្រកផ្លូវចូល​ទៅ​ឃុំរលួស ដែលទីតាំងសិប្ប​កម្ម​ទាំង​នោះ គឺស្ថិតក្នុងសង្កាត់រដ្ឋបាលព្រៃឈើសណ្តាន់ ក្នុងដែន​សមត្ថកិច្ច លោកសេង ស៊ីតារុណ នាយសង្កាត់ព្រៃ​ឈើ​គ្រប់​​គ្រងនៅតំបន់នោះ ។

ប្រភពខាងលើបានឲ្យដឹងទៀតថា ការបើកសិប្បកម្មទាំងនោះគ្មានច្បាប់ តែអាចដំណើរការ ទៅបានដោយ​​​រលូន​​ថែម​​​​​ទាំង​​​​​មិនញញើតចំពោះមន្ត្រីជំនាញរដ្ឋបាលព្រៃឈើឡើយ ឬ អាច​និយាយបានថាមន្រ្តីពាក់​​​ព័ន្ធនៅទីនោះមិនហ៊ាន​បង្រ្កាប ព្រោះតែម្ចាស់សិប្បកម្មពូកែទំនាក់​ទំនងជាមួយអាជ្ញាធរពាក់ព័ន្ធ ដែកគេស្គាល់ថាម្ចាស់ឈ្មោះ តារ៉ៃ ជាម្ចាស់ នឹងម្នាក់ទៀតគឺជា​មន្ត្រីយោធា និងមានមន្រ្តីអន្រ្ទើសផ្សេងទៀតនៅពីក្រោយខ្នង ទើបមានការឃុបឃិតបើកដៃ​ជា​ចំហរ​​​​ពីសំណាក់មន្ត្រីជំនាញបែបនេះ តែបើប្រជាពលរដ្ឋកំប៉ិចកំប៉ុករកស៊ីចិញ្ចឹមជីវិតប្រចាំ​ថ្ងៃវិញប្រហែលជាមិនអាច​គេចរួចពីកណ្តាប់ដៃរបស់មន្រ្តីជំនាញទាំងនោះឡើយ។ពលរដ្ឋដែលមានទីតាំងនៅក្បែរនោះបង្ហើបទៀតថា សិប្ប​កម្ម​​​​ទាំង៣កន្លែងនោះ បានបើក​ធ្វើ​អាជី​វកម្មរបស់ខ្លួនអស់រយៈពេលជាច្រើនឆ្នាំមកហើយ ហើយក៏មានទ្រង់​ទ្រាយធំ​ផស់គេដែរ គេមិនដែលឃើញមានការបង្រ្កាបទប់ស្កាត់ ពីក្រុមសមត្ថកិច្ចជំនាញរដ្ឋបាលព្រៃឈើម្តងណា​ឡើយ។ ផ្ទុយទៅវិញទីតាំងសិប្បកម្មខាងលើនេះ កំពុងតែបើកធ្វើសកម្មភាព កាន់តែធំទៅៗ​ពីទីបីដង ដែលមានឈើ​ប្រណីតៗ​​រាប់សិបម៉ែត្រគូបផ្ទុកនៅក្នុងនោះ ដើម្បីអារជ្រៀក​កែច្នៃ​រួចនិងធ្វើការដឹកជញ្ជូនចេញ​តាមរយៈរថយន្ត​សាំ​​យ៉ុង​​​របស់គេជារៀងរាល់ថ្ងៃ ។

ពួកគាត់បានបង្ហាញទៀតថា ឈើដែលដឹកចូលសិប្បកម្មទាំងនោះភាគច្រើនពីក្រុមឈ្មួញ​ខិលខូចបានចូល​​​ទៅកាប់​​​ក្នុងព្រៃសហគមន៍ ដែលជាកន្លែងតំបន់អភិរក្សព្រៃឈើ និងសត្វព្រៃ មួយក្នុងស្រុកសំបូរ ហើយកាប់និងដឹក​ចេញពី​ព្រៃក្នុងតំបន់អភិរក្សខាងលើនោះ ធ្វើឲ្យប្រជា​ពល​រដ្ឋមានការព្រួយបារម្ភចំពោះ​ការបាត់បង់ព្រៃឈើនៅ​ក្នុង​សហ​គមន៍​​​​របស់ពួកគាត់។សូមបញ្ជាក់ថា ទាក់ទិននឹងសេចក្តីរាយការណ៍របស់​ប្រជាពលរដ្ឋខាងលើនេះ​ភ្នាក់ងារ​យើង  នៅរសៀលថ្ងៃម្សិលម៉ិញនេះមិនអាចសុំការ​ទំនាក់ទំនងបំភ្លឺពី លោក សេង ស៊ីតារុណ នាយ​សង្កាត់រដ្ឋបាលព្រៃឈើ​សណ្តាន់បាននោះឡើយ៕  ដោយ៖ ស.ស្អាត