ភ្នំពេញ៖ ស្របពេលដែលមានការប៉ះទង្គិចគ្នាមួយបានកើតឡើង រវាងក្រុមសមាគមសេដ្ឋកិច្ចក្រៅប្រព័ន្ធ ជាមួយកងកម្លាំងយោធាអង្គភាពឆ័ត្រយោង៩១១ ស្ថិតនៅក្បែរតំបន់សេដ្ឋកិច្ចពិសេសភ្នំពេញ ក្នុងសង្កាត់កំបូល ខណ្ឌពោធិ៍សែនជ័យ ដើម្បីតវ៉ាទាមទារប្រាក់ខែ ព្រមទាំងធ្វើសកម្មភាពដើររំខាននៅតាមបណ្ដារោងចក្រ សហគ្រាសមួយនិងបិទផ្លូវបង្កការកកស្ទះចរាចរណ៍ ដើម្បីឱ្យកម្មករកំពុងធ្វើការចេញមកតវ៉ាជាមួយពួកគេនោះ នៅព្រឹកថ្ងៃទី០២ខែមករាឆ្នាំ២០១៤នេះដែរ ក៏មានមេដឹកនាំសហជីពចំនួន៩ បានចេញមុខច្រានចោលក្រុមបង្កសកម្មភាពបំផ្លាញទ្រព្យសម្បត្តិឯកជននៅតាមរោងចក្រ សហគ្រាសជាច្រើននៅក្នុងរាជធានីភ្នំពេញថាមិនមែនជាសមាជិករបស់ខ្លួនឡើយ ។ ព្រមទាំងបានជម្រុញឲ្យអាជ្ញាធរចាត់វិធានការ នឹងវែកមុខរកឲ្យឃើញចៀសវាងការទំលាក់កំហុសដាក់គ្នាទៅវិញទៅមក ដោយមិនទទួលខុសត្រូវ។
មេដឹកនាំសហជីពចំនួន៩បានបង្ហាញពីជំហររបស់ខ្លួនក្នុងការដឹកនាំធ្វើបាតុកម្ម ឬបញ្ឈប់ការធ្វើបាតុកម្ម ដោយទុករយៈពេល៣ថ្ងៃ ដើម្បីអោយក្រសួងការងារ និយោជក និង GMAC ធ្វើការពិចារណានិងពិភាក្សាដោះស្រាយលើបញ្ហានេះជាបន្ទាន់ បើមិនដូច្នេះទេពួកគេនឹងធ្វើកូដកម្មឬបាតុកម្មបន្តទៀតគ្មានថ្ងៃឈប់ឈរ។នេះជាការបញ្ជាក់ជាថ្មីរបស់មេដឹកនាំសហជីពទាំង៩រូប នៅក្នុងសន្និសីទសារព័ត៌មានមួយនៅ ភោជនីយដ្ឋានបៃតង។ លោកមេដឹកនាំទាំងនោះបានលើកឡើងថា ប្រាក់ឈ្នួលកម្មករនិយោជិកចំនួន១០០ដុល្លារដែលក្រសួងការងារ បានសម្រេចដំឡើងកាលពីថ្ងៃទី៣១នោះគឺមិនអាចទទួលយកបានទេ ហើយក្រសួងត្រូវតែដំឡើងឲ្យបានដល់១៦០ដុល្លារទើបពួកគេទទួលយក និងបញ្ឈប់ការធ្វើបាតុកម្មទាមទារ ឬ តវ៉ា ។មេសហជីពទាំងនោះបានលើកឡើងទៀតថា ចំពោះការធ្វើបាតុកម្មនានាមិនពាក់ព័ន្ធទៅដល់រឿងនយោបាយអ្វីនោះទេ គឺគេទាមទាតែប្រាក់ឈ្នួលជូនកម្មករតែប៉ុណ្ណោះ ហើយនៅពេលដែលរដ្ឋាភិបាលសម្រេចផ្តល់ប្រាក់ឈ្នួល១៦០ដុល្លារដល់កម្មករ កម្មការនី និងនិយោជិក នៅពេលណានោះពួកគេ នឹងបញ្ឈប់ការតវ៉ាភ្លាម។ជាមួយគ្នា នោះតំណាងសហជីពចំនួន៦ដែលមាន រ៉ុង ឈុន លោក អាត់ ធន់ លោក ប៉ាវ ស៊ីណា អ្នកស្រី ម៉ម ញឹម អ្នកស្រី យ៉ាង សោភ័ណ្ឌ លោកលោក ម៉ាន់ សេងហាក់ បានច្រានចោលចំពោះក្រុមមួយចំនួន ដែលបានដើរបង្កអំពើហិង្សាបំផ្លិចបំផ្លាញទ្រព្យសម្បត្តិរបស់រោងចក្រ សហគ្រាសមួយចំនួននៅក្នុងរាជធានីភ្នំពេញថាមិនមែនជាសមាជិករបស់ សហជីពសហព័ន្ធរបស់ពួកគាត់ទេ វាជាកំលាំងមកពីខាងណាមួយ ដែលបង្កការអុកឡុក ហើយទំលាក់កំហុសដល់សហជីពសហព័ន្ធរបស់ពួកគាត់។
.JPG)
យ៉ាងណាក៏ដោយមេដឹកនាំសហព័ន្ធសហជីពទាំង៦រូប ក៏បានច្រានចោលនូវការទំលាក់ទំនួលខុសត្រូវ ដែល GMAC ក៏ដូចជាក្រសួងការងារបានដាក់បន្ទុកមកលើពួកគេ។ ព្រោះនេះជាការផ្ទុះឡើងដោយឆន្ទៈរបស់កម្មករ-កម្មការនី ក្នុងការទាមទាប្រាក់ឈ្នួលមួយសមរម្យតាមស្ថានភាពសេដ្ឋកិច្ចក្នុងសង្គមនាពេលបច្ចុប្បន្នដោយ អហឹង្សានិង សន្តិវិធី ។ ពួកគេបានចាត់ទុកថា បញ្ហាដែលកើតឡើងកន្លងមកគឺជាការរៀបចំរបស់ក្រុមផ្សេង ដើម្បីបង្ករជាបញ្ហា និងទំលាក់ដាក់មកលើសហព័ន្ធ សហជីពដែលធ្វើការជាមួយកម្មករ និយោជិត ក្នុងបំណងកុំឲ្យមានការតវ៉ាផ្សេងៗកើតមានតែប៉ុណ្ណោះ។ទាក់ទិននឹងការលើកឡើងរបស់និយោជកថានឹងពិចារណាលើការលើកកញ្ជើរទៅប្រទេសជិតខាងកម្ពុជា ក្រុមមេដឹកនាំសហព័ន្ធសហជីពទាំងនោះបានបញ្ជាក់ថា តាមការសិក្សារបស់អ្នកសេដ្ឋកិច្ច ដែលបានរកឃើញថាកម្មករម្នាក់អាចរកបាន២៨០ដុល្លារដល់ភាគីនិយោជក ដោយមិនគិតថ្លៃដើម។ ហើយកម្ពុជាជាប្រទេសដែលមានឱកាសល្អជាងប្រទេសណាៗទាំងអស់ទាំងកម្រិតនៃការបញ្ជាទិញរបស់ពិភពលោក ងាយធ្វើឲ្យនិយោជកទទួលបានផលចំណេញច្រើន (ធ្វើមានធ្វើបាន)ជាងប្រទេសជិតខាង ដែលគេគិតពីផ្លូវច្បាប់យ៉ាងតឹងរ៉ឹងនោះ៕
ដោយ៖ ស.ស្អាត