ភ្នំពេញ៖វេទិកាតុមូលមួយស្ដីពីលទ្ធភាពបង្កើតក្រុមប្រឹក្សាសារព័ត៌មានជាតិ និងអនុសាសន៍ចំពោះការបង្កើតច្បាប់ស្ដីពីសិទ្ធិទទួលបានព័ត៌មានបានបើកធ្វើនៅសណ្ឋាគារកាំបូឌូយ៉ាណាកាលពីល្ងាចថ្ងៃ ទី៣០ ខែធ្នូ ឆ្នាំ២០១៣ដោយមានការចូលរួមពីអ្នកកាសែតមកពីស្ថាប័នសារព័ត៌មានជាច្រើនក្នុងបំណងធ្វើយ៉ាងណាឲ្យច្បាប់ស្ដីពីសិទ្ធិទទួលព័ត៌មានឆ្លើយតបនឹងសេចក្តី ត្រូវការរបស់អ្នកកាសែត នៅ ក្នុងការបំពេញការងារប្រកបដោយប្រសិទ្ធភាព។កិច្ចពិភាក្សាគ្នានេះក្រុមអ្នកសារព័ត៌មានបានលើកឡើងនូវអនុសាសន៍មួយចំនួនដល់ក្រសួងព័ត៌មានដែលទទួលបន្ទុកក្នុងការតាក់តែងសេចក្ដីព្រាងច្បាប់ ស្ដីពីសិទ្ធិទទួលបានព័ត៌មាននេះដែលគួរតែរៀបចំជាសិក្ខាសាលាថ្នាក់ជាតិជាសាធារណៈដើម្បីប្រមូលមតិយោបល់ផ្សេងៗទាំងមុន និងក្រោយការបង្កើតសេចក្ដីព្រាងច្បាប់នេះ។សេចក្ដីព្រាងច្បាប់នោះទៀតសោតគួរតែត្រូវបានតាក់តែងដោយអ្នកជំនាញច្បាប់ដែលមានបទពិសោធន៍នៅក្នុងវិស័យសង្គម និងព័ត៌មាន។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានមានប្រសាសន៏ថា ច្បាប់ស្តីពីសិទ្ធិទទួលព័ត៌មានគឺជាច្បាប់មួយដែលមានភាពស្មុគស្មាញច្រើនដែលត្រូវចំណាយពេលយ៉ាងហោចណាស់៣ឆ្នាំគិតចាប់ពីឆ្នាំ២០១៤តទៅ។ក្នុងនោះក្រសួងបានត្រៀមថវិកាចំណាយជិត១លានដុល្លារអាមេរិក ដើម្បីរៀបចំសិក្ខាសាលាជាច្រើន រួមទាំងការចុះស្រាវជ្រាវជាដើម។លោកបានបន្ថែមថា ក្រសួងព័ត៌មានធ្វើការតាក់តែងសេចក្តីព្រាងច្បាប់ស្តីពីសិទ្ធិទទួលព័ត៌មាន ដោយបើកទូលាយឲ្យមានការចូលរួមពីស្ថាប័នជាច្រើនរួមមានសមាគមអ្នកកាសែត អង្គការសង្គមស៊ីវិល ផ្នែកសិទ្ធិមនុស្សជាតិ និងអន្តរជាតិព្រមទាំងអង្គការយូណេស្កូជាដើម។ចំពោះច្បាប់ស្ដីពីសិទ្ធិទទួលបានព័ត៌មាន អ្នកកាសែតបានជំរុញឲ្យមានបទបញ្ញត្តិចាប់បង្ខំឲ្យក្រសួងស្ថាប័នរដ្ឋនីមួយៗរៀបចំឲ្យមានអ្នកនាំពាក្យ។ អ្នកនាំពាក្យទាំងនោះត្រូវតែជាបុគ្គលដែលមានចំណេះដឹងទាក់ទងទៅនឹងជំនាញនីមួយៗ។ ក្នុងករណីដែលអ្នកនាំពាក្យនោះមិនផ្ដល់ព័ត៌មានដែលអ្នកកាសែតគួរត្រូវដឹងតែអ្នកនាំពាក្យនោះមិនបានផ្តល់ឲ្យគឺច្បាប់ត្រូវតែដាក់ ពិន័យឲ្យបានធ្ងន់ធ្ងរ។
ពាក់ព័ន្ធជាមួយនឹងកិច្ចពិភាក្សានោះ ក៏មានការផ្តល់អនុសាសន៍ជាច្រើនផ្សេងទៀតក្នុងនោះរួមមានការកំណត់និយមន័យពាក្យដែលប្រើប្រាស់ឲ្យបានច្បាស់លាស់ ការរើសអើងស្ថាប័នព័ត៌មានការបង្កើតគណៈកម្មការឯករាជ្យត្រួតពិនិត្យការអនុវត្តច្បាប់ស្ដីពីសិទ្ធិទទួលបានព័ត៌មាន និងការធ្វើបច្ចុប្បន្នភាពព័ត៌មានដោយសង្ខេបរវាងរាជរដ្ឋាភិបាល និងអ្នកកាសែតជាដើម៕ ដោយ៖ ភីនរ៉ា