ភ្នំភេញ ៖សាលារាជធានីភ្នំពេញ បានកោះអញ្ជើញប្រធាន និងអនុប្រធានគណបក្សសង្គ្រោះជាតិមកជជែកគ្នានៅថ្ងៃស្អែកនេះ អំពីការគ្រប់គ្រងបាតុកម្ម និងការដង្ហែរក្បួនក្រោយស្ថានភាពមិនប្រក្រតីមួយចំនួនដែលចាំបាច់ត្រូវមានការកែលម្អជាបន្ទាន់។លិខិតចុះថ្ងៃទី២០ ខែធ្នូ ២០១៣ នេះ បានកត់សម្គាល់ថា ការធ្វើសកម្មភាពសម្តែងមតិចំនួន៥ថ្ងៃ កន្លងមកនេះ ភាពមិនប្រក្រតីយ៉ាងហោចចំនួន ៤ខ ដែលចាំបាច់ត្រូវអ្នកទទួលខុសត្រូវដឹកនាំបាតុកម្ម ធ្វើការកែលម្អជាបន្ទាន់។
នៅក្នុងលិខិតនោះ បានបង្ហាញឱ្យដឹងថា នៅចំណុចទាំង៤ ដែលបានសាលារាជធានីភ្នំពេញ បានសរសេររួមមានបញ្ហាបរិស្ថានអនាម័យនៅទីលានប្រជាធិបតេយ្យនិងសួនច្បារ សាធារណៈ, ការងារសន្តិសុខនិងសណ្តាប់ធ្នាប់ចរាចរណ៍តាមដងផ្លូវ, ការគ្រប់គ្រងកំលាំងអ្នកចូលរួមបាតុកម្ម និងការសម្តែងមតិនិងប្រើពាក្យសម្តីប៉ះពាល់ដល់សិទ្ធិបុគ្គលដែល សាលារាជធានីភ្នំពេញបានចាត់ទុកថាជា អំពើធ្ងន់ធ្ងរមួយនិងជាអំពើប្រមាថប្រាសចាកពីព្រំដែននៃសិទ្ធិសម្តែងមតិ ដែលមានចែងក្នុងច្បាប់។
គួរកត់សម្គាល់ថា យោងតាមលិខិតមួយរបស់រាជរដ្ឋាភិបាលកាលពីថ្ងៃទី ១៩ ធ្នូ ម្សិលមិញ លិខិតបានប្រាប់អ្នករៀបចំធ្វើបាតុកម្ម និងបាតុករនូវការត្រូវ គោរពនិងអនុវត្តសិទ្ធិអោយបានត្រឹមត្រូវតាមមាត្រាច្បាប់ទី៣១, ៣៧ និងទី៤១។បើតាមមាត្រាច្បាប់ទី៣១ នៃរដ្ឋធម្មនុញ្ញបានចែងថា «ប្រជាពលរដ្ឋខ្មែរមានភាពស្មើគ្នាចំពោះមុខច្បាប់មានសិទ្ធិសេរីភាពនិងករណីយកិច្ចដូចគ្នា ទាំងអស់ដោយឥតប្រកាន់ពូជសាសន៍ពណ៌សម្បុរភេទ ភាសា ជំនឿ សាសនា និន្នាកានយោបាយ ដើមកំណើត ជាតិ ឋានៈសង្គម ធនធានឬស្ថានភាពឯទៀតឡើយ។ ការប្រើប្រាស់សិទ្ធិសេរីភាពផ្ទាល់ខ្លួនរបស់ បុគ្គលម្នាក់ៗ មិនត្រូវអោយប៉ះពាល់ដល់សិទ្ធិសេរីភាពអ្នកដទៃឡើយ។ ការប្រើសិទ្ធិសេរីភាពនេះ ត្រូវប្រព្រឹត្តតាមលក្ខខណ្ឌ កំណត់ក្នុងច្បាប់»។
មាត្រាទី៣៧នោះវិញ បានចែងដែរថា«សិទ្ធិធ្វើកូដកម្មនិងធ្វើបាតុកម្មដោយ សន្តិវិធីត្រូវយកមកអនុវត្តនៅក្នុងក្របខណ្ឌនៃច្បាប់»។ ចំណែកមាត្រាទី៤១វិញ បានសរសេរថា«ប្រជាពលរដ្ឋ ខ្មែរ មានសេរីភាពខាងបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ។ ជនណាក៏ដោយមិនអាចឆ្លៀតប្រើសិទ្ធិនេះដោយរំលោភនាំអោយប៉ះពាល់ដល់ កិត្តិយស អ្នកដទៃដល់ទំនៀមទំលាប់ល្អរបស់សង្គម ដល់សណ្តាប់ធ្នាប់សាធារណៈនិងសន្តិសុខជាតិបានឡើយ»។ គួរបញ្ជាក់ថា លិខិតដែលសាលារាជធានីភ្នំពេញ កោះអញ្ជើញមេដឹកនាំគណបក្សសង្គ្រោះជាតិលោក សម រង្ស៊ី និងអនុប្រធានលោក កឹម សុខា បានកំណត់ការជួបពិភាក្សាគ្នាជាមួយនឹងអភិបាលនៃគណៈអភិបាលរាជធានី ភ្នំពេញ នៅថ្ងៃសៅរ៍ទី២១ ធ្នូនៅវេលាម៉ោង៩ព្រឹកនៅសាលារាជធានីភ្នំពេញ៕ ដោយ ៖ភីនរ៉ា