ភ្នំពេញ៖ មន្ទីរពេទ្យជោរៃរបស់ប្រទេសវៀតណាម សាខានៅរាជធានីភ្នំពេញ គ្រោងនឹងបើកឲ្យ ដំណើរការជាផ្លូវការ នូវសេវាព្យាបាល និងថែទាំសុខភាពជូនប្រជាពរដ្ឋ នៅថ្ងៃទី១៣ខែមករា ឆ្នាំ២០១៤ នេះហើយ បន្ទាប់ពីការដ្ឋានសាងសង់អស់រយៈពេលប្រមាណជា៤ឆ្នាំកន្លងមក។ប្រធានមន្ទីរពេទ្យជោរី លោក Nguyen Hoang Nam បានឲ្យដឹងថា យើងបានខិតខំរៀបចំឲ្យបានរួចរាល់ទាំងស្រុងដើម្បីចាប់ផ្តើមបើកសម្ពោធជាផ្លូវការតាមការគ្រោងទុកនៅដើមឆ្នាំ២០១៤នេះ ក្រោមអធិបតីភាព សម្តេចនាយករដ្ឋមន្ត្រី ហ៊ុនសែន និងលោកនាយករដ្ឋមន្រ្តី នៃប្រទេសវៀតណាម។លោក Nguyen Hoang Nam បញ្ជាក់ដូច្នេះនៅក្នុងឱកាស លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ប៉ា សុជាតិវង្ស អភិបាលរាជធានីភ្នំពេញ បានចុះពិនិត្យស្ថានភាពនៅទីតាំងមន្ទីរពេទ្យជោរៃ កាលពីរសៀលថ្ងៃទី១២ ខែធ្នូ ឆ្នាំ២០១៣ម្សិលម៉ិញនេះ ដើម្បីពិនិត្យមើល អំពីដំណើរការរៀបចំហេដ្ឋារចនាសម្ព័ន្ធ ក្នុងបរិវេណមន្ទីរពេទ្យ និងការបំពាក់ឧបករណ៍ បរិក្ខារពេទ្យ សំដៅជំរុញការត្រៀមរៀបចំ ពិធីសម្ពោធដាក់ឱ្យប្រើប្រាស់ជាផ្លូវការតាមការគ្រោងទុក។
ប្រធានមន្ទីរពេទ្យខាងលើបានឲ្យដឹងទៀតថា មកដល់ពេលនេះ ទាំងសំណង់នៃមន្ទីរពេទ្យ ទាំងការបំពាក់គ្រឿងបរិក្ខារ និងសម្ភារៈពេទ្យផ្សេងៗទៀតបានរួចរាល់អស់ហើយ ព្រមទាំងមានក្រុមវេជ្ជបណ្ឌិតខ្មែរ និង វៀតណាមចំនួន១៨២នាក់ ត្រូវចូលបម្រើការងារក្នុងមន្ទីរពេទ្យនេះ។ ហើយក្រុមគ្រូពេទ្យទាំងនោះ បានទៅសិក្សាឯកទេសផ្នែកវេជ្ជសាស្ត្រ នៅសាកលវិទ្យាល័យវេជ្ជសាស្ត្រ ទីក្រុងហាណូយ ប្រទេសវៀតណាម រយៈពេល៣ឆ្នាំ និងសិក្សាបន្តនៅទីក្រុងហូជីមិញរយៈពេល១ឆ្នាំទៀត។លោកបាន បន្តបញ្ជាក់ទៀតថា ជំហានដំបូងនេះមាន៣អគារកម្ពស់៥ជាន់ និងមានគ្រែចំនួន២០០ ដោយទទួលព្យាបាលអ្នកជំងឺ លើឯកទេសចំនួន៣៤ឯកទេស គ្រប់ផ្នែកនៃរាងកាយមនុស្សតែម្តង ដូចជា ជំនាញខាងរំលាយអាហារ, ត្រចៀក, បំពង់ក, លលាក្បាល, ថ្លើម, បេះដូង, វះកាត់ , បេះដូង, តសរសៃខួរក្បាល , វះកាត់តឆ្អឹង ឬបាញ់ក្រួសប្រមាត់ និងមានការវះកាត់កែសម្ផស្សយ៉ាងជំនាញទៀតផង គឺមានការទទួលព្យាបាលជំងឺទូទៅ ដូចនៅមន្ទីរពេទ្យជោរៃ នៅប្រទេសវៀតណាមដែរ ។ សម្រាប់ដំណាក់កាលទី២ នឹងដំណើរការចំនួន៣០០គ្រែ បន្ថែមទៀត។អ្វីដែលជាការកត់សម្គាល់នោះ គឺមន្ទីរពេទ្យជោរៃនេះ មានការពិនិត្យព្យាបាល និងកែសម្ផស្សគ្រប់ប្រភេទ ព្រមទាំងមានការស្ថាបនាអគារសម្រាប់ស្នាក់នៅរបស់អ្នកជំងឺ ឬអ្នកថែទាំអ្នកជំងឺប្រហាក់ប្រហែលសណ្ឋាគារទៀតផង។សម្រាប់អគារវិញគឺមានលក្ខណៈទំនើប ដំបូលអគារអាចចុះចតឧទ្ធម្ភាគចក្របាន ជណ្តើរយន្តមាន២ប្រភេទ មួយសម្រាប់អ្នកជំងឺ ឬអ្នកទៅថែទាំអ្នកជំងឺ និងបុគ្គលិកធម្មតា និងមួយទៀតសម្រាប់អ្នកជំងឺធ្ងន់ ឬប្រកាច់ដែលមិនអាចឱ្យអ្នកជំងឺរើបម្រះបាន។ជាមួយគ្នានោះអភិបាលរាជធានីភ្នំពេញលោក ប៉ា សុជាតិវង្ស បានបញ្ជាក់ថា មន្ទីរពេទ្យជោរៃ ភ្នំពេញ គឺជាផ្លែផ្កានៃកិច្ចសហប្រតិបត្តិការរវាងសាលារាជធានីភ្នំពេញ និងទីក្រុងហូជីមិញ នៃសាធារណរដ្ឋសង្គមនិយមវៀតណាមដែលជាទីក្រុងសម្ព័ន្ធភាពនឹងគ្នា។លោកអភិបាលបន្តថា យើងសម្ពោធមន្ទីរពេទ្យ មិនមែនសម្ពោធអគារពេទ្យនោះទេ គឺក្រោយសម្ពោធអាចដំណើរការពិនិត្យព្យាបាលជំងឺជូនប្រជាពលរដ្ឋបានតែម្តង ដូច្នេះមុននឹងដាក់សម្ពោធជាផ្លូវការត្រូវរៀបចំឲ្យបានរៀបរយជាមុន។សូមបញ្ជាក់ថា មន្ទីរពេទ្យជោរៃភ្នំពេញ មានទីតាំងស្ថិតនៅតាមបណ្តោយផ្លូវជាតិលេខ១ ក្នុងសង្កាត់និរោធ ខណ្ឌមានជ័យ និងបានបើកការដ្ឋានស្ថាបនាអស់រយៈពេល៤ឆ្នាំគឺតាំងពីថ្ងៃទី១៥ខែឧសភា ឆ្នាំ២០១០ ៕ ដោយ៖ ស.ស្អាត