កំពង់ចាម៖ ក្រុមអ្នករកស៊ីដឹកជញ្ជូនទំនិញ និងកសិផលយកទៅលក់នៅព្រំប្រទល់ប្រទេសវៀតណាម បានរិះគន់ចោទប្រកាន់ក្រុមមន្រ្តីជញ្ជីងចល័តដែលចាំថ្លឹងរថយន្តដឹកលើសទម្ងន់ នៅស្ថានីយ៍ថ្នល់ទទឹង ស្ថិតក្នុងឃុំជប់ ស្រុកត្បួងឃ្មុំ ខេត្តកំពង់ចាម កំពុងតែគាបជំរិតទារប្រាក់ពីពួកគាត់ ដោយសំអាងទៅលើ ស.ជ.ណ របស់គណៈរដ្ឋមន្ត្រី។
.jpg)
ក្រុមអាជីវករទាំងនោះនាំគ្នានិយាយថា បច្ចុប្បន្នតាមដងផ្លូវជាតិលេខ៧និងលេខ៨ មានរថយន្តធំៗដឹកទំនិញគ្រប់ប្រភេទឆ្លងកាត់ ដោយមួយថ្ងៃទៅមួយថ្ងៃមានរហូតដល់ទៅរាប់រយគ្រឿងឯណោះ ក្នុងនោះមានទាំងរថយន្តដឹកទំនិញស្របច្បាប់ រថយន្តដឹកទំនិញគេចពន្ធ មកពីប្រទេសវៀតណាម និងរថយន្តដឹកឈើរបស់ក្រុមហ៊ុនមួយចំនួនផងដែរ ប៉ុន្តែគេពុំដែលឃើញមានមន្ត្រីខាងជញ្ជីងរបស់ប្រចាំនៅស្ថានីយថ្នល់ទទឹងនោះ និងមន្ត្រីជីញ្ជីងចល័តរបស់ក្រសួងសាធារណៈការនិងដឹកជញ្ជូនចាប់ឃាត់យករថយន្តខុសច្បាប់ទាំងនោះមកថ្លឹង រឺពិន័យតាមច្បាប់ឡើយ។
ប៉ុន្តែបើរថយន្តដឹកកសិផលបន្តិចបន្តួច ដូចជា ស្រូវ ដំឡូងមី និងសណ្តែកសៀងជាដើមវិញ គឺមន្ត្រីទាំងនោះបោលឡានដេញតាមឆែកឆេរ ត្រួតពិនិត្យ មិនឲ្យរត់រួចមួយឡើយ។ជាក់ស្តែងកាលពីព្រឹកថ្ងៃទី០២ ខែធ្នូកន្លងទៅនេះ មន្ត្រីជញ្ជីងថ្លឹងរថយន្តនៅស្ថានីយ៍ ថ្នល់ទទឹងក្នុងស្រុកត្បូងឃ្មុំនោះ បានឃាត់ចាប់រថយន្តដឹកស្រូវមួយគ្រឿងម៉ាកហ៊ីយ៉ាន់ដាយ ពណ៌សរភ្លៅប្រាំពាក់ស្លាក់លេខ ក្រចេះ ៣A-២៧៣៥ ដែលដឹកស្រូវយកទៅលក់នៅព្រំប្រទល់ប្រទេសវៀតណាម ដោយមន្ត្រីជំនាញខាងជញ្ជីងថ្លឹងទម្ងន់រថយន្តចាប់ឃាត់អស់រយៈពេលជាច្រើនថ្ងៃដោយតម្រូវឲ្យបង់ប្រាក់ជាង៦លានរៀល ព្រោះតែផ្ទុកស្រូវលើសទម្ងន់ចំនួន៤០៦០គ.ក្រ។
ទាក់ទិននិងការចោទប្រកាន់នេះ លោក នួន ចាន់ហេង អនុប្រធានមន្ទីរសាធារណៈការ និងដឹកជញ្ជូនខេត្តកំពង់ចាមដែលទទួលបន្ទុកជញ្ជីងថ្លឹងទម្ងន់កម្រិតកំនត់ត្រើយខាងកើតទន្លេរមេគង្គបានប្រាប់ថា ការងារនេះគឺលោកបានបញ្ជូនសំណុំរឿងឡើងទៅដល់ខេត្ត ហើយប្រសិនបើម្ចាស់រថយន្តដឹកស្រូវនេះ មានខ្នងបង្អែក ឬមានចំណារពីឯកឧត្តមអភិបាលខេត្តលោកនឹងដោះលែងរថយន្តនេះភ្លាម។ភ្នាក់ងារព័ត៌មានយើងបានព្យាយាមទំនាក់ទំនងពីលោកប្រធានមន្ទីរសាធារណៈការ និងដឹកជញ្ជូនខេត្តកំពង់ចាម ដើម្បីសុំការបំភ្លឺពីបញ្ហាខាងលើនិងបច្ចេកទេសថ្លឹងរថយន្ត ប៉ុន្តែមិនអាចទំនាក់ទំនងបា តែទោះជាយ៉ាងណាយើងនឹងព្យាយានសុំការបំភ្លឺអំពីបញ្ហាខាងលើនោះ៕ ដោយ ៖ សស្អាត