ភ្នំពេញ៖ រដ្ឋាភិបាល សាធារណរដ្ឋសហព័ន្ធអាល្លឺម៉ង់ បានសម្រេចផ្តល់ ហិរញ្ញប្បទានចំនួន៤៧.០៥ លានអឺរ៉ូ សម្រាប់អនុវត្ត គម្រោងអាទិភាព ចំនួន៤ ក្នុងឆ្នាំ២០១៣-២០១៤ រួមមាន សុខាភិបាល អភិវឌ្ឍន៍ជនបទ អភិវឌ្ឍន៍អន្តរវិស័យ និងការសិក្សាស្រាវជ្រាវ ។ហិរញ្ញប្បទានថ្មីនេះ ត្រូវបានរដ្ឋាភិបាលអាល្លឺម៉ង់សន្យា ផ្តល់ក្នុងពិធីចុះហត្ថលេខាមួយរវាង លោក ឈៀង យ៉ាណារ៉ា រដ្ឋមន្ត្រី ប្រតិភូអមនាយករដ្ឋមន្ត្រី និងជាអគ្គលេខា ធិការគណៈកម្មាធិការនីតិសម្បទា និងអភិវឌ្ឍន៍កម្ពុជា និងភាគីអាល្លឺម៉ង់ តំណាងដោយ លោក Andreas Pfeil ប្រធានទទួលបន្ទុក តំបន់អាស៊ីកណ្តាល អាស៊ីបូព៌ា ឡាវ កម្ពុជា នៃក្រសួងសហប្រតិបត្តិការសេដ្ឋកិច្ច និងអភិវឌ្ឍន៍អាល្លឺម៉ង់BMZ នៅក្រុមប្រឹក្សាអភិវឌ្ឍន៍កម្ពុជា ។
លោក ឈៀង យ៉ាណារ៉ា តំណាងរដ្ឋាភិបាលកម្ពុជា បានមានប្រសាសន៍ថា រដ្ឋាភិបាល កម្ពុជា ប្តេជ្ញាខ្ពស់បន្តកែទម្រង់ ស៊ីជម្រៅលើ អភិបាលកិច្ចល្អ ជាពិសេសការ ប្រយុទ្ធប្រឆាំងអំពើ ពុករលួយ គឺជាស្នូលនៃ កិច្ចប្រឹងប្រែងរបស់ រាជរដ្ឋាភិបាល ដូចបានគូសបញ្ជាក់ នៅក្នុងយុទ្ធសាស្ត្រចតុកោណ ដំណាក់កាលទី៣។រដ្ឋាភិបាលសូមថ្លែងអំណរគុណចំពោះប្រជាជន និងរដ្ឋាភិបាលអាល្លឺម៉ង់ ដែលបានសន្យា ផ្តល់ហិរញ្ញប្បទាននាពេលនេះ។លោក Andreas Pfeil តំណាងរដ្ឋាភិបាលអាល្លឺម៉ង់ បានមានប្រសាសន៍ថា ការសន្យាផ្តល់ហិរញ្ញប្បទាន នាពេលនេះ ស្តែង ពីឆន្ទៈរបស់រដ្ឋាភិបាល អាល្លឺម៉ង់ ក្នុងការគាំទ្រ កិច្ចប្រឹងប្រែង របស់រដ្ឋាភិបាលកម្ពុជា ក្នុងការប្រយុទ្ធ ប្រឆាំង នឹងភាពក្រីក្រ។
លោកថាកិច្ចសហប្រតិបត្តិការកម្ពុជា-អាល្លឺម៉ង់ មានគោលដៅពង្រឹងការលើក កម្ពស់សិទ្ធិមនុស្ស និងចូលរួមចំណែកកែលំអ ជីវភាពរស់នៅរបស់ប្រជាជនកម្ពុជា។ចំណែក លោក Baron von Marschall ឯកអគ្គរដ្ឋទូតអាល្លឺម៉ង់ប្រចាំកម្ពុជា ដែលមានវត្តមាន ក្នុងពិធី ចុះហត្ថលេខានោះដែរ បានមានប្រសាសន៍ថា អាល្លឺម៉ង់លើកទឹកចិត្តអោយរដ្ឋាភិបាលកម្ពុជា បន្តកែទម្រង់ស្របតាមលទ្ធផល ដែលស្តែង ចេញតាមរយៈការបោះឆ្នោត អាណត្តិទី៥នេះ ហើយរដ្ឋាភិបាលអាល្លឺម៉ង់ នឹងបន្តគាំទ្រដល់ដំណើរការនៃ ការកែទម្រង់នេះ។គួរបញ្ជាក់ថា ហិរញ្ញប្បទានសហប្រតិបត្តិការ ដែលផ្តល់ដោយរដ្ឋាភិបាល សហព័ន្ធអាល្លឺម៉ង ចាប់តាំងពីផ្តើមទំនាក់ទំនងកម្ពុជា-អាល្លឺម៉ង់ នៅក្នុងឆ្នាំ១៩៦០មក មានទំហំសរុប ៣០៣ លានអឺរ៉ូ៕ ដោយ ៖ រតនា