ស្ថិតនៅក្រោមជំនួយគាំទ្ររបស់អង្គការយូនីសេហ្វ (UNICEF)ប្រចាំកម្ពុជា ក្រសួងអប់រំ នឹងជួបប្រជុំជាមួយមន្ត្រីអប់រំរបស់ខ្លួននៅទូទាំងប្រទេសនៅសណ្ឋាគារអិមភែរៀល ដើម្បីពិភាក្សាលើប្រធានបទ «រដ្ឋាភិបាល និងដៃគូនានា រួមគ្នាដើម្បីពង្រឹងការអនុវត្តសារស្តីពីអនាម័យតាមសាលារៀន និងលុបបំបាត់ការសាយភាយនៃជំងឺដែលអាចទប់ស្កាត់បាន»។
លោក គឹម សាញ់ អនុប្រធាននាយកដ្ឋានសុខភាពសិក្សានៃក្រសួងអប់រំ បានលើកឡើងថា មានគោលបំណងដើម្បីចូលរួមកាត់បន្ថយអត្រាមរណៈភាពកុមារដែលទាក់ទងនឹងជំងឺរាក, ជំងឺរលាកផ្លូវដង្ហើម, និងបញ្ហាកង្វះ អាហារូបត្ថម្ភ តាមរយៈការជំរុញការអនុវត្តវិធីងាយៗពី «ការសម្អាតដៃនឹងសាប៊ូ» ជាប្រចាំមុនពេលបរិភោគអាហារ និងក្រោយពេលចេញពីបង្គន់។
លោកបន្តទៀតថា សកម្មភាពខាងលើនេះ ក៏ជាការរួម ចំណែកកាត់បន្ថយឧបសគ្គនៃការចូលរៀន និងកែលម្អគុណភាព និងប្រសិទ្ធភាពអប់រំនៅសាលាបឋមសិក្សា ក៏ដូចជាមធ្យមសិក្សាចំណេះទូទៅផងដែរ។
ដោយឡែក លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលទើបតែឡើងកាន់តំណែងជារដ្ឋមន្រ្តី បានថ្លែងឱ្យដឹងនៅថ្ងៃទី ២៧ វិច្ឆិកា នេះថា កន្លងមកក្រសួងបានចូលរួមចំណែកយ៉ាងសកម្មក្នុងការចូលរួមលើកកម្ពស់សុខភាពនៅតាមសាលារៀន ក្នុងនោះក៏បានអភិវឌ្ឍនូវគោលនយោបាយស្តីពីសុខភាពសិក្សា និងគោលនយោបាយមួយចំនួនទៀតក្នុងគោលបំណងពង្រឹងសេវាសុខភាពតាមសាលារៀនរួមមាន៖ ការអប់រំបង្ការជំងឺឆ្លង ជំងឺមិនឆ្លង សុវត្ថិភាព និងសុខុមាលភាព ចំណីអាហារ អាហារូបត្ថម្ភ ការពង្រឹងបរិស្ថានសិក្សា ព្រមទាំងលើកម្ពស់អនាម័យតាមរយៈភាពជាដៃគូ ជាមួយនឹងដៃគូអភិវឌ្ឍន៍វិស័យនានា និងសហគមន៍ផងដែរ។ នេះជាសកម្មភាពសាមញ្ញងាយស្រួលអនុវត្ត ការចំណាយធនធានតិចតែទទួលបានផលច្រើន។លោករដ្ឋមន្រ្តីបានបន្ថែមថា ដើម្បីសម្រេចមហិច្ឆិតាដ៏ធំធេងនេះប្រកបដោយប្រសិទ្ធភាព និងលទ្ធផលល្អប្រសើរ ប្រការមួយដ៏សំខាន់ដែលយើងមិនត្រូវភ្លេចនោះ គឺការផ្តល់ឱ្យកុមារ និងយុវជនកម្ពុជាទទួលបាននូវសេវារអប់រំសុខភាព ដើម្បីបង្ការជំងឺនានាឱ្យបានគ្រប់ៗគ្នា។
(1).jpg)
ស្របពេលជាមួយគ្នានោះដែរ លោកស្រី Rana Flower អនុប្រធានអង្គការ UNICEF ប្រចាំកម្ពុជា បានប្រសាសន៍ថា កត្តាស្លាប់របស់ក្មេងនៅមានកំរិតខ្ពស់នៅឡើយ ដូច្នេះយើងនៅមានកំរិតគោលដៅក្នុងការអភិវឌ្ឍន៍ឲ្យបានសម្រេចចំនួន៥៤ភាគរយ កុមារនៅក្នុងប្រទេសកម្ពុជា ដូច្នេះហើយយើងត្រូវកម្រិតគោលដៅ ប៉ុន្តែយើងមិនអាចទទួលយកបាននូវអ្វីដែលកើតឡើង។ ដូច្នេះក្មេងម្នាក់ដែលត្រូវបានស្លាប់ យើងត្រូវការពារក្មេងនោះ ដើម្បីយើងឈានទៅសម្រេចអត់ឲ្យមាននរណាស្លាប់បានន័យថា ស្លាប់សូន្យមិនឲ្យមានការស្លាប់។
លោកស្រីតំណាងអង្គការ UNICEF ប្រចាំកម្ពុជារូបនេះបានបន្ថែមថា «ដើម្បីឲ្យទទួលបានការសម្អាតអនាម័យសម្រាប់កម្ពុជាទាំងអស់ វិធានការរបស់យើង គឺការផ្សព្វផ្សាយឲ្យបានទូលំទូលាយពីការសម្អាតដៃ ហើយត្រូវធ្វើការជាច្រើនទៀត ដើម្បីដំណោះស្រាយក្នុងសម្អាតដៃ យើងត្រូវការនាយកសាលាដើម្បីជួយឲ្យកុមារទាំងអស់ មានការអនុវត្តឲ្យបានល្អ ដើម្បីឲ្យគេលាងដៃជាមួយសាប៊ូ»។នៅឆ្នាំ២០១៣ នេះដែរ ដើម្បីពង្រឹងការអនុវត្តសារពីការអនាម័យតាមសាលារៀន និងលុបបំបាត់ការសាយភាយនៃជំងឺដែលអាចទប់ស្កាត់បាន ក្រសួងអប់រំបានដាក់ពាក្យស្លោកថា«ខ្ញុំឆ្លាត! ខ្ញុំលាងសំអាតដៃនឹងសាប៊ូ»។
សូមបញ្ជាក់ផដែរថា មានកុមារចំនួនប្រមាណ ២.០០០នាក់នៅកម្ពុជា ត្រូវបានរកឃើញថា បាត់បង់ជីវិតជារៀងរាល់ឆ្នាំដោយសាររោគរាករូស។ ការលាងសម្អាតដៃនឹងសាប៊ូ បានផ្តួចផ្តើមឲ្យមានទិវាពិភពលោកលាងសម្អាតដៃនៅឆ្នាំ២០០៨ និងបានទទួល ការអនុម័តគាំទ្រដោយរដ្ឋាភិបាល ស្ថាប័នអន្តរជាតិ អង្គការសង្គមស៊ីវិល អង្គការមិនមែនរដ្ឋាភិបាល ក្រុមហ៊ុនឯកជន និងបុគ្គលនានាជុំវិញពិភពលោក៕ ដោយ ៖ មករា