ភ្នំពេញ៖ លោក កឹម សុខា អនុប្រធានគណបក្សសង្រ្គោះជាតិ បានបង្ហាញជំហររបស់ខ្លួន ថា គណបក្សសង្រ្គោះ​ជាតិ គឺជា​អ្នក​ឈ្នះការបោះឆ្នោត ជ្រើសតាំងតំណាងរាស្រ្ដ នីតិកាលទី ថ្ងៃទី២៨ ខែកក្កដា ឆ្នាំ២០១៣ កន្លងទៅនេះ។លោក កឹម សុខា បានសរសេរនៅលើហ្វេសប៊ុករបស់លោកនៅថ្ងៃទី២១ ខែវិច្ឆិកានេះ ថា “ជំហរគណបក្ស​សង្រ្គោះ​ជាតិ គឺយើងជាអ្នកឈ្នះឆ្នោត ថ្ងៃទី២៨ កក្កដា។ យើងនៅតែបន្តទាមទាររកយុត្តិធម៌ជូនម្ចាស់ឆ្នោត។ យើងគោរព​ឆន្ទៈ​ប្រជាពលរដ្ឋ ប្រជាពលរដ្ឋឲ្យយើងរួបរួមគ្នា យើងរួបរួម”។អនុប្រធានគណបក្សប្រឆាំងរូបនេះ បានសរសេរបន្ដ ថា ប្រជាពលរដ្ឋមិនឲ្យតំណាងរាស្រ្ដទាំង៥៥រូប ចូលរួមប្រជុំ​សភា តំណាងរាស្រ្ដទាំងនោះ ធ្វើតាមសំណូមពរ​ប្រជាពល​រដ្ឋ​​​​​ហើយឥឡូវប្រជាពលរដ្ឋឲ្យគណបក្សបន្តធ្វើបាតុកម្ម គណបក្សនឹងធ្វើបាតុកម្មទាល់តែទទួលបានជ័យជំនះ។

លទ្ធផលបោះឆ្នោតជ្រើសតាំង តំណាងរាស្រ្ដ នីតិកាលទី៥ ត្រូវបានគណៈកម្មាធិការជាតិរៀបចំការបោះឆ្នោត ប្រកាស​​ឲ្យដឹង ថា គណបក្សប្រជាជនកម្ពុជាទទួលបាន៦៨អាសនៈ និងគណបក្សសង្រ្គោះជាតិ​ទទួល​បាន៥៥​អាសនៈ​ តែគណបក្សសង្រ្គោះជាតិ បានបដិសេធ មិនទទួលយកលទ្ធផលនេះទ។គួរបញ្ជាក់ ថា គណ​បក្ស​សង្រ្គោះ​​​​​​ជាតិបានប្រកាសរៀបចំធ្វើមហាបាតុកម្ម​លើកទីបួន​បន្ដទៀតនៅថ្ងៃទី១០ខែធ្នូឆ្នាំ​២០១៣ខាងមុខនេះ​​ដែលចំនឹង​ថ្ងៃ​ទិវា​​​​សិទ្ធិមនុស្សអន្តរជាតិដើម្បីទាមទារនូវការគោរពសិទ្ធិមនុស្សនិងយុត្ដិ​ធម៌​ជូន​ម្ចាស់ឆ្នោត៕

ដោយ៖​ រតនា