ក្រចេះ៖ យ៉ាងហោចណាស់មនុស្ស៧នាក់ត្រូវបានស្លាប់នៅកន្លែងកើតហេតុ និង១៧នាក់ទៀតបានរងរបួសធ្ងន់ដោយសារគ្រោះថ្នាក់ចរាចរណ៍ដ៏រន្ធត់មួយដែលបានកើតឡើង កាលពីវេលាម៉ោង ១០និង៤៥ នាទីថ្ងៃទី២០ ខែវិច្ឆិកា ឆ្នាំ២០១៣នេះ។
ប្រភពពីកន្លែងកើតហេតុបានឲ្យដឹងថា រថយន្តដឹកដំឡូងមួយគ្រឿង បានបើកបរចេញពីចម្ការ ហើយជាន់ហ្វ្រាំងមិនស៊ី បានជ្រុលចង្កូតធ្លាក់ផ្លូវ ក្រឡាប់ផ្ងារជើង នៅត្រង់ចំណុចភូមិត្រៀក ឃុំស្រែចារ ស្រុកស្នួល ខេត្តក្រចេះ បណ្តាលមនុស្សប្រុសស្រីចំនួន៧នាក់ ក្នុងនោះមានស្រី ៥នាក់ និងប្រុស ២នាក់បានស្លាប់ ហើយកម្មករ១៧នាក់ទៀតរងរបួសធ្ងន់និង៤នាក់ទៀតបានរងរបួសស្រាល។
បើតាមប្រភពពីអធិការស្រុកស្នូលបានឱ្យដឹងថា រថយន្តមួយគ្រឿងនោះ មានផ្ទុកដំឡូងមីប្រមាណ១០តោន និងមានកម្មករជិះខាងលើចំនួន២៨នាក់ ហើយមូលហេតុដែលបណ្តាលឱ្យក្រឡាប់រថយន្ត បណ្តាលមកពីរថយន្តដឹកលើសទម្ងន់បើកចុះចំណោតចំផ្លូវកោងខ្លាំង បានប្រើល្បឿនលឿន រួចក៏រ៉េចង្កូតក្រឡាប់តែម្តង។
គួរបញ្ជាក់ថា រថយន្តបង្កម៉ាកហ៊ីយ៉ុនដាយកូរ៉េចំណុះ៥តោន ពណ៍ស ពាក់ស្លាកលេខភ្នំពេញ3A-4560 អ្នកបើកបរបានរត់គេចខ្លួនបាត់ស្រមោល។
ដោយ៖ អភិរក្ស