ភ្នំពេញ៖ មន្រ្ដីជាន់ខ្ពស់គណបក្សសង្រ្គោះជាតិ លោក ហូរ វ៉ាន់ បានអះអាង នៅថ្ងៃទី០១ ខែវិច្ឆិកានេះ ថា យុទ្ធនាការប្រមូល ស្នាមមេដៃប្រជាពលរដ្ឋ ដើម្បីដាក់ជូនអង្គការសហប្រជាជាតិ និងប្រទេសហត្ថលេខីនៃកិច្ចព្រមព្រៀងទីក្រុងបារីសដើម្បីឲ្យប្រទេសទាំងនោះជួយដោះស្រាយវិបត្ដិនយោបាយក្នុងប្រទេសកម្ពុជា នៅតែបន្ដធ្វើដដែល បើទោះបីជា គណបក្សសង្រ្គោះជាតិ និងគណបក្សប្រជាជនកម្ពុជា គ្រោងជួបគ្នាជាថ្មី ដើម្បីដោះស្រាយបញ្ហាជាប់គាំងនយោបាយ ក៏ដោយ។លោក ហូរ វ៉ាន់ បានបន្ដ ថា “ការចូលចចារ ដើម្បីដោះស្រាយ ភាពជាប់គាំងនេះ ជារឿងមួយដោយឡែករីឯការតវ៉ា យកស្នាមមេដៃប្រជាពលរដ្ឋ គឺនៅតែបន្ដទៅទៀត ដើម្បីធ្វើឲ្យបានសម្រេច នូវគោលបំណង និងឆន្ទះម្ចាស់ឆ្នោត”។
ក្នុងសន្និសីទកាសែត កាលពីថ្ងៃទី៣១ ខែតុលា ថ្នាក់ដឹកនាំគណបក្សសង្រ្គោះជាតិ បានបង្ហាញជំហរ ជួបចចារគ្នាជាថ្មី ជាមួយគណបក្សប្រជាជនកម្ពុជា ដើម្បីដោះស្រាយបញ្ហាវិបត្ដិនយោបាយ ក្នុងប្រទេសកម្ពុជា។គណសង្គ្រោះជាតិគ្រោង ប្រមូលស្នាមមេដៃចំនួន១លាន៥សែននាក់ បន្ថែមទៀតបន្ថែមលើស្នាមមេដៃដែលប្រមូលកាលពីលើកមុនចំនួនជាង២លាននាក់។គណបក្សសង្គ្រោះជាតិធ្លាប់បានដាក់ញត្ដិស្នាមមេដៃប្រជាពលរដ្ឋចំនួន២លាន៣សែននាក់ម្ដងរួចទៅហើយទៅអង្គការសហប្រជាជាតិនិងស្ថានទូតចំនួន៨របស់ប្រទេសជាភាគីហត្ថលេខីនៃកិច្ចព្រមព្រាងទីក្រុងបារីសដើម្បីឲ្យប្រទេសទាំងនោះជួយដោះស្រាយវិបត្ដិនយោបាយនៅកម្ពុជាដែលកំពុងតែមានភាពជាប់គាំងនាពេលបច្ចុប្បន្ននេះក្នុងអំឡុងពេលធ្វើមហាបាតុកម្មលើកទី៣កាលពីថ្ងៃទី២៣ដល់ថ្ងៃទី២៥ខែតុលាឆ្នាំ២០១៣៕
ដោយ៖ រតនា