ភ្នំពេញ ៖ នៅរសៀលថ្ងៃចន្ទ ទី៣១ តុលា នេះ សម្តេចរាជបុត្រី ព្រះអនុជ នរោត្តម អរុណរស្មី ឧត្តមទីប្រឹក្សាព្រះមហាក្សត្រ និងជាប្រធានគណបក្សហ៊្វុនស៊ិនប៉ិច បានយាងដឹកនាំ សប្បុរសជន យុវជន អ្នកស្មគ្រចិត្តចំនួន៣៧ អង្គ នាក់ទៅផ្តល់ឈាមដល់មជ្ឈមណ្ឌលជាតិផ្តល់ឈាម សម្រាប់ជួយសង្រ្គោះដល់ជនរងគ្រោះដែលត្រូវការឈាមជាបន្ទាន់សម្រាប់សង្រ្គោះជីវិត ។
នៅក្នុងបន្ទប់ផ្តល់ឈាម សម្តេចរាជបុត្រី ព្រះអនុជ នរោត្តម អរុណរស្មី បានមានសុវនីយ៍ថា ការយាងមកពេលនេះមិនមែនមកបរិច្ចាគឈាមដោយផ្ទាល់ព្រះអង្គទេ គឺបាននាំក្រុមយុវជនស្ម័គ្រចិត្តរបស់គណបក្សហ៊្វុនស៊ិនប៉ិច និងយុវជនស័គ្រចិត្តដទៃទៀត ដែលលោកមានចិត្តធម៌ចង់ជួយដល់អ្នរងគ្រោះ ដែលត្រូវការឈាមសង្រ្គោះជីវិត តាមការអំពាវនាវរបស់ព្រះអង្គកាលពីថ្ងៃទី១៥តុលាកន្លងទៅដែលព្រះអង្គបានមកបរិច្ចាកឈាមគឺក្នុងឱកាសខួបទី១ឆ្នាំ នៃការយាងសោយទិវង្គតរបស់ព្រះរាជបិតា ព្រះបរមរតនកោដ និងជាកាយវិការដើម្បីសងព្រះគុណដល់ព្រះអង្គ ដែលលោកមានគុណដ៏លើសលប់មកលើប្រទេសជាតិ ។
សម្តេចរាជបុត្រីមានសុវនីយ៍ទៀតថា ថ្ងៃនេះទៀតសោតក៏ជាមហាកិត្តិយសដែលមានបងប្អូន សមាជិកសមាជិការ និងយុវជនស័គ្រចិត្តចំនួន៣០នាក់រួមទាំងព្រះសង្ឃ៧អង្គផងនោះបាននិមន្តនិងអញ្ជើញតាមការអំពាវនាវមកចូលរួមបរិច្ចាគឈាម ។ ហើយព្រះអង្គរំពឹងថា តាមការអំពាវនាវរបស់យើងនៅថ្ងៃខាងមុខ នឹងមានបងប្អូនប្រជាពលរដ្ឋ ពិសេសក្រុមយុវជនច្រើនរូបថែមទៀតចូលរួមផ្តល់ឈាម ដើម្បីជួយសង្រ្គោះជនរងគ្រោះ ដែលពួកគេកំពុងតែត្រូវការឈាម ។
លោកស្រីវេជ្ជបណ្ឌិត មឿក សាមាន អនុប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា ការយាងនាំអ្នកស័គ្រចិត្តមកផ្តល់ឈាមរបស់សម្តេចរាជបុត្រី ព្រះអនុជ នរោត្តម អរុណរស្មី នាឱកាសនេះ គឺជាកាយវិការដ៏សប្បុរសធម៌របស់ព្រះរាជវង្សានុវង្ស និងជាគំរូល្អសម្រាប់ប្រជាជនយើង ក្នុងការចូលរួមចំណែកបរិច្ចាគឈាមដើម្បីជួយសង្រ្គោះជីវិត។កញ្ញា តុង ផល្លី ជាអ្នកស្ម័គ្រផ្តល់ឈាមបានឲ្យដឹងថា ថ្ងៃនេះខ្ញុំមានការរំភើបណាស់ដែលមានឱកាសបានចូលរួមបរិច្ចាកឈាមតាមការអំពាវនាវរបស់សម្តេចព្រះអនុជដល់បងប្អូនប្រជាពលរដ្ឋយើងដែលគាត់កំពុងត្រូវការឈាមដោយសារគ្រោះថ្នាក់ផ្សេងៗ ពិសេសស្រ្តីឆ្លងទន្លេ ក្នុងនាមខ្ញុំជាស្រ្តីដូចគ្នា មិនមានអ្វីជួយគាត់ទេមានតែការផ្តល់ជាឈាមនេះតែម្តងដែលអាចជួយជីវិតគាត់បាន។
កញ្ញា បានអំពាវនាវដល់ពលរដ្ឋទាំងអស់ដែលមានសុខភាពមាំទាំ ពិសេសយុវជនបើមានឱមានអាចធ្វោះអ្វីល្អជួយដល់សង្គមត្រូវតែនាំគ្នាធ្វើ។ព្រះតេជគុណ ជិក លឿង ហៅ មុន្នី គង់នៅវត្តស្វាយពពែបានមានសង្ឃដិកាថា បានទទួលដំណឹងពីការអំពាវនាវរបស់សម្តេចរាជបុត្រី ក្នុងឱកាសបុណ្យកឋិនទានកាលពីពេលថ្មីៗនេះ ថាមានអ្នកត្រូវការឈាមជាច្រើននាក់សម្រាប់សង្រ្គោះជីវិត ព្រះអង្គក៏បាននិមន្តចូលរួមជាមួយព្រះដទៃទៀតមកផ្តល់ឈាមដល់មជ្ឈមណ្ឌល់ជាតិផ្តល់ឈាម ជាមួយសម្តេចរាជបុត្រី ព្រះអនុជ នរោត្តម អរុណរស្មី នាពេលនេះ។សូមបញ្ជាក់ថា ការយាងមកផ្តល់ឈាមផ្ទាល់ព្រះអង្គរបស់សម្តេចរាជបុត្រីកាលពីថ្ងៃទី១៥តុលា គឺចំថ្ងៃដែលព្រះករុណាព្រះបរមរតនកោដ្ឋយាងចូលទិវង្គត ។ ចំណែកថ្ងៃដឹកនាំក្រុមអ្នកស័្មគ្រចិត្តជាង៣០នាក់មកផ្តល់ឈាមគឺចំថ្ងៃដែលព្រះមហាវិរក្សត្រ ទ្រង់យាងប្រសូត្រថ្ងៃទី៣០ តុលា ឆ្នាំ១៩២២៕ ដោយ៖ សស្អាត