លោកទេសរដ្ឋមន្រ្តី ញឹម វណ្ណដា បន្តរអះអាងទៀតថា កាលពីឆ្នាំ២០១១កន្លងមក ដំណាំស្រូវប៉ះពាល់ ដោយគ្រោះ ទឹកជំនន់    ជាង៤សែនហិចតាខូចខាតទាំងស្រុងជាង២សែន៥ម៉ឺនហិចតា តែប្រជាជនក្រោយពីទឹកស្រក ចុះលោកបានខិតខំស្តារពីការ   ខូចខាតឡើងវិញរហូតបានលើសផែនការដូច្នេះឆ្នាំនេះដំណាំដូចយើងមើលឃើញស្រាប់ហើយនៅខេត្តព្រៃវែងមួយស្រូវខូចអស់ ជាង១ម៉ឺន៥ពាន់ហិចតា ប៉ុន្តែគ្រាន់ តែក្នុង រយៈពេលតែ២សប្តាហ៍មកនេះប្រជាជនបានខិតខំប្រឹងប្រែងស្តារឡើងវិញបានជាង  ៥ពាន់ហិចតារួចហើយ។ ទោះបីគ្រោះ ទឹក ជំនន់បំផ្លាញដំណាំស្រូវរបស់យើងអស់ជាង ១សែនហិតា តែមិនបណ្តាល ឲ្យប៉ះពាល់  ដល់ផែនការនាំចេញអង្ករកម្ពុជានោះទេ។លោកទេសរដ្ឋមន្ត្រីក៏បានឲ្យដឹងទៀតដែរថា ខណៈនេះ ទឹកជំនន់បាន ស្រកអស់ហើយ  នៅសល់ បន្តិចបន្តួចតាមខេត្ត ទំនាបៗមួយ ចំនួនដូចជា៖ ខេត្តព្រៃវែង កណ្តាល និងតាមឃុំមួយចំនួននៅជាប់បឹងទន្លេសាប ។  

រីឯ​ការសង្គ្រោះ​មកដល់ពេលនេះយើងបាននាំយកអំណោយចែកជូនប្រជាពលរដ្ឋរងគ្រោះបានជាង១៤ម៉ឺនគ្រួសារហើយដែរ។ 

ដោយឡែក ប្រធានសហព័ន្ធអ្នកនាំចេញអង្ករកម្ពុជា គឺលោកឧកញ៉ា គីម សាវុធ បានវាយតម្លៃពី ការខូចខាងដំណាំ ស្រូវនៅ  កម្ពុជាថា ការខូចខាតដំណំាស្រូវជាង ១១ម៉ឺនហិកតា ដោយទឹកជំនន់ ដែលបង្ហាញដោយក្រសួងកសិកម្ម មិនប៉ះពាល់ដល់  ការផ្គត់ផ្គងក្នុងស្រុកលើសតម្រូវការ ឬការនាំចេញអង្កររបស់កម្ពុជានៅឆ្នាំ២០១៤ទេ។លោកបន្តថា ដើម្បី ធានា ដល់ការនាំចេញ  អង្ករ របស់កម្ពុជា ប្រកបដោយចីរភាពប្រជាពលរដ្ឋ គួរតែផ្លាស់ប្ដូរបច្ចេកទេសធ្វើស្រូវ និងព្យាយាមជ្រើសពូជស្រូវណាដែរល្អ  ហើយសមស្របទៅនឹង អាកាសធាតុ ដើម្បីគុណភាពអង្កររបស់កម្ពុជា។យោងតាមរបាយការណ៍របស់ក្រសួងកសិកម្ម ដែល  ចេញផ្សាយ កាលពីថ្ងៃទី២៩ ខែតុលា បានឲ្យដឹងថា ទឹកជំនន់ទន្លេមេគង្គទឹកជំនន់នៅឆ្នាំ២០១៣នេះ បានបំផ្លាញដំណាំស្រូវ  ១១៣.២៦០ ហិកតា ស្មើរនឹង ៤,៤ ភាគរយលើផ្ទៃដីដាំស្រូវសរុប ២,៥៦ លានហិកតា។ ទឹកជំនន់បានប៉ះពាល់ ដល់ផ្ទៃដីដាំ  ស្រូវចំនួន៣៦៩.៣៤៦ហិកតា។ បើតាមតួលេខបានបង្ហាញថា ១១៣,២៦០ ហិចតាត្រូវ បានបំផ្លាញ៕  ដោយ៖ មករា