ភ្នំពេញ៖ គិតត្រឹមរយៈពេល២២ថ្ងៃ គណបក្សសង្រ្គោះជាតិ បានប្រមូលស្នាមមេដៃ ប្រជាពលរដ្ឋបានចំនួនជាង២លាននាក់ហើយ ដើម្បីដាក់ជូនអគ្គលេខាធិការ អង្គការសហប្រជាជាតិ និងប្រទេសជាហត្ថលេខី នៃកិច្ចព្រមព្រៀងទីក្រុងប៉ារីសទាំងអស់។ នេះបើតាមការ សរសេររបស់លោក កឹម សុខា អនុប្រធានគណបក្សសង្រ្គោះជាតិ នៅថ្ងៃទី២២ ខែតុលានេះ។
ការប្រមូលស្នាមមេដៃប្រជាពលរដ្ឋនេះ ត្រូវបានលោក កឹម សុខា បញ្ជាក់ ថា គឺដើម្បីឲ្យអគ្គលេខាធិការ អង្គការសហប្រជាជាតិ និងប្រទេសជាហត្ថលេខី នៃកិច្ចព្រមព្រៀងទីក្រុងប៉ារីស ជួយដោះស្រាយវិបត្តិនយោបាយនៅកម្ពុជា ដោយឲ្យអ្នកដឹកនាំប្រទេសកម្ពុជា បច្ចុប្បន្នគោរព និងប្រតិបត្តិឲ្យបានពេញលេញនូវកិច្ចព្រមព្រៀងទីក្រុងប៉ារីស ថ្ងៃទី២៣ខែតុលាឆ្នាំ១៩៩១។
គួរបញ្ជាក់ ថា គណបក្សប្រឆាំង បានចាប់ផ្ដើមប្រមូលស្នាមមេដៃប្រជាពលរដ្ឋ តាំងពីថ្ងៃទី០៦ ខែតុលា ដើម្បីជាញត្តិដាក់ជូនអង្គការសហប្រជាជាតិ និងប្រទេសហត្ថលេខី នៃកិច្ចព្រមព្រៀងទីក្រុងបារីស នៅថ្ងៃទី២៣ ខែតុលា ឆ្នាំ២០១៣ដែលជាថ្ងៃគណបក្សនេះគ្រោងធ្វើមហាបាតុកម្មលើកទី៣ ឲ្យជួយរកយុត្តិធម៌ជូនម្ចាស់ឆ្នោតឲ្យស្របតាមកិច្ចព្រមព្រៀងនឹងប្រមូលស្នាមមេដៃប្រជាពលរដ្ឋឲ្យបានជាង៣លាននាក់ ៕ ដោយ៖ រតនា