កំពង់ឆ្នាំង៖ រថយន្តដឹកអ្នកដំណើរមួយគ្រឿង ដែលផ្ទុកមនុស្សច្រើនជាង៣០នាក់ធ្វើដំណើរពីខេត្តបាត់ដំបងមកកាន់ ទីក្រុងភ្នំពេញបានធ្លាក់ចូលប្រឡាយទឹកដែលជាប់និងចិញ្ចើមថ្នល់នៅខណពេលតៃកុងភ្លេចខ្លួនងងុដេកហើយបើកបរមិនប្រុងប្រយត្ន័នោះ។
ហេតុការណ៍នេះបានកើតឡើងវេលាម៉ោង៤និង៣០នាទីទៀបភ្លឺ ថ្ងៃទី២២ ខែតុលា ឆ្នាំ២០១៣ នៅចំណុចគីឡូម៉ែត្រលេខ៨៣និង៨៤ ក្នុងភូមិថ្នល់ថ្មី ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។ លោសឺង វិសិទ្ធ អធិការស្រុករលាប្អៀរបានឲ្យដឹងថា រថយន្តក្រុងនេះពាក់ស្លាកលេខសៀមរាប3A-0925 ជារថយន្តរបស់ក្រុមហ៊ុនអូឡាំពិកអិចស្ព្រេសលីប៉ូស៊ីន បើកបរដឹកអ្នកដំណើរចំនួន៣៥នាក់ចេញពីខេត្តបាត់ដំបងឆ្ពោះទៅកាន់ក្រុងភ្នំពេញ ។
លោកបន្តថា មុនពេលកើតហេតុអ្នកបើកបររថយន្តបានងងុយដេករួចក៏ឈប់សំរាកម្តងរួចហើយ ក្រោយមកតៃកុង ឡានបានបន្តដំណើរទៅមុខទៀត លុះមកដល់ចំណុចកើតហេតុ រថយន្តក៏បានរេចង្កូតធ្លាក់ប្រឡាយខាងឆ្វេងដៃ ធ្វើ អោយផ្អៀងម្ខាងលើគល់ឈើ បណ្តាលអោយអ្នកដំណើរនៅលើរថយន្តមានការភិតភ័យផងដែរ ។ លោកបញ្ជាក់ថា៖ «ករណីនេះមិនមានការខូចខាតធ្ងន់ធ្ងរនោះទេដោយថយន្តគ្រាន់តែបែកកញ្ចក់ខាងមុខប៉ុណ្ណោះ» ។
លោកអ៊ា ប៊ុនធឿន ប្រធានការិយាល័យចរាចរណ៍ផ្លូវគោកខេត្តកំពង់ឆ្នាំបានឲ្យដឹងថា នៅក្នុងហេតុការណ៍គ្រោះថ្នាក់ខាងលើនេះ មិនបណ្តាលឲ្យមនុស្សណាម្នាក់ស្លាប់និងរងរបួសទេ ប៉ុន្តែក្រុមប៉ូលីសនៅមិនទាន់ស្គាល់អត្តសញ្ញាណអ្នកបើកបរទេដោយសារក្រោយពេលកើតហេតុអ្នកបើកបរបានរត់គេចខ្លួនបាត់ ។
លោកបញ្ជាក់ថា៖« ឥឡូវយើងបានបញ្ជារឲ្យក្រុមហ៊ុនខាងលើនេះ ត្រូវតែស្ទួចរថយន្ត របស់ខ្លួនដើម្បីយកមករក្សាទុកនៅអធិការស្រុករលាប្អៀរ ដើម្បីរង់ចាំម្ចាស់ចូលខ្លួនមកដោះស្រាយ»។លោកបន្ថែមថា ម្ចាស់យានយន្តត្រូវសងការខូចខាតមួយចំនួនដែលពាក់ពន្ធ័និងសម្បត្តិរដ្ឋដូចលូបង្ហូរទឹកជាដើម ៕ ដោយ៖ អភិរក្ស