ភ្នំពេញ៖ គណបក្សសង្គ្រោះជាតិ ដែលមានថ្នាក់ដឹកនាំលោកសម រង្ស៊ី និងលោកគឹម សុខា បានប្រកាសឲ្យដឹង កាលពីថ្ងៃសៅរិ៍សប្តាហ៍មុនថា ខ្លួនបានរៀបចំជាស្រេច ដើម្បីធ្វើមហាបាតុកម្មអហឹង្សាសាជាថ្មីម្តងទៀត ក្នុងការទាមទារនូវអ្វីដែលខ្លួនចង់បាន នៅថ្ងៃទី២៣ ខែតុលា ឆ្នាំ២០១៣ខាងមុខនេះ។លោក ហូរ វ៉ាន់ មន្ត្រីជាន់ខ្ពស់នៃគណបក្សសង្គ្រោះជាតិបានថ្លែងប្រាប់ឲ្យដឹងកាលពីល្ងាចថ្ងៃសៅរ៍ថា គណបក្សសង្គ្រោះជាតិនឹងធ្វើមហាបាតុកម្មជាថ្មីទៀតនៅថ្ងៃទី២៣ ខែតុលាខាងមុខ ប៉ុន្តែមិនទាន់ដឹងថា មានអ្នកចូលរួមចំនួនប៉ុន្មាននោះទេ តែតាមគម្រោងចាប់ពីជាង១ម៉ឺននាក់ឡើងទៅ។ បើតាមលោក ហូរ វ៉ាន់ បានបញ្ជាក់ថា មកដល់ពេលនេះលិខិតមិនទាន់ដាក់ចូលសាលារាជធានីភ្នំពេញនៅឡើយទេ ដោយយើងកំពុងពិភាក្សាគ្នាអំពីការប្រើពាក្យសម្រាប់ស្នើសុំនោះ។
បើតាមសេចក្ដីប្រកាសព័ត៌មានរបស់គណបក្សសង្គ្រោះជាតិ ដែលបានចេញផ្សាយនៅថ្ងៃដដែលនេះបានបញ្ជាក់ដែរថា នៅថ្ងៃទី៦ ខែតុលា ឆ្នាំ២០១៣ នឹងមានសមាជមហាជននៅទីលានប្រជាធិបតេយ្យចាប់ពីម៉ោង៣រសៀលដល់ម៉ោង៦ល្ងាចដើម្បីសម្រេចលើគោលជំហររបស់គណបក្ស ហើយនៅថ្ងៃទី២៣ ខែតុលា នឹងរៀបចំធ្វើមហាបាតុកម្មនៅទីលានប្រជាធិបតេយ្យចាប់ពីម៉ោង៣រសៀលរហូតដល់ម៉ោង៦ល្ងាចដើម្បីយកញត្តិជូនអង្គការសហប្រជាជាតិ និងប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស២៣ ខែតុលា ឆ្នាំ១៩៩១ តាមរយៈឧត្តមស្នងការអង្គការសហប្រជាជាតិនៅកម្ពុជា។
ទាក់ទងនឹងការយកញត្តិដាក់ជូនឧត្តមស្នងការអង្គការសហប្រជាជាតិ លោកហូរវ៉ាន់ បានបញ្ជាក់ថា គណបក្សមិនបានរៀបចំគម្រោងថា នឹងត្រូវហែក្បួនចេញពីទីលានប្រជាធិបតេយ្យ ទៅកាន់ទីស្នាក់ការតំណាងរបស់អង្គការសហប្រជាជាតិប្រចាំនៅកម្ពុជា ឬ យ៉ាងណានោះទេ ប៉ុន្តែប្រសិនបើគណបក្សហែក្បួនពីទីលានប្រជាធិបតេយ្យ ទៅកាន់ការិយាល័យឧត្តមស្នងការនោះក៏សមរម្យដែរ ដូច្នេះនេះមិនមានអ្វីជាបញ្ហាទេ ព្រោះពីមុនមកគណបក្សក៏ធ្លាប់ហែក្បួនយ៉ាងដូចគ្នាដែរ។
គួរបញ្ជាក់ថា ការគ្រោងធ្វើមហាបាតុកម្មអហឹង្សាលើកនេះ គេនៅមិនទាន់ដឹងច្បាស់ថា តើគណបក្សសង្រ្គោះជាតិ និងរៀបចំធ្វើសកម្មភាពស្រដៀងនិងការធ្វើដូចថ្ងៃទី១៥ ខែកញ្ញា លើកមុនឬយ៉ាងណានៅឡើយទេ ប៉ុន្តែដើម្បីធ្វើការទាមទារឲ្យគណបក្សប្រជាជន ចុះចេញពីតំណែង រឺស្នើឲ្យមានការបង្កើតគណកម្មាធិការចំរុះមួយ សម្រាប់ស៊ើបអង្កេតអំពីលទ្ធផលបោះឆ្នោតឡើងវិញ ខណៈដែលថ្នាក់ដឹកនាំបក្សសង្គ្រោះជាតិ បានចាត់ទុកការបោះឆ្នោតជ្រើសរើសតំណាងរាស្រ្តអណត្តិទី៥ នាពេលកន្លងមកនេះ បានប្រព្រឹត្តទៅដោយមិនមានភាពរលូន គ្មានយុត្តិធម៌ និងគ្មានតម្លាភាព៕
ដោយ៖ អភិរក្ស