ភ្នំពេញ៖ក្នុងអាណត្តិជារដ្ឋមន្រ្តីក្រសួងឧស្សាហកម្មរ៉ែនិងថាមពលរយៈពេល១៥ឆ្នាំកន្លងមក​នេះលោក​​​ស៊ុយសែម​បានបង្ហាញឲ្យដឹងថាប្រទេសកម្ពុជាពុំមានធនធានរ៉ែជាដុំកំភួនដូចប្រទេសគេនោះទេ។រហូតមក​​​ដល់ពេលនេះ​រាជរដ្ឋាភិបាលបានផ្តល់​អាជ្ញាប័ណ្ណដល់​ក្រុម​ហ៊ុនចំនួន១៦០តែមិនទាន់​មានក្រុមហ៊ុន​ណាមួយ​​​អាចរុករកធនធានរ៉ែសម្រាប់​ប្រ​ទេស​​ជាតិ​បាននោះទេពីព្រោះក្រុមហ៊ុនរុករករ៉ែបានចំណាយ​លុយច្រើន​ពីមួយ​​​ថ្ងៃទីមួយថ្ងៃ។​​

លោកស៊ុយសែមបានថ្លែងដូច្នេះក្នុងឱកាសផ្ទេរដំណែងជារដ្ឋមន្រ្តីក្រសួងនេះទៅលោកទេសរដ្ឋមន្រ្តីចមប្រសិទ្ធ​កាលពីព្រឹកថ្ងៃទី២៧ខែកញ្ញានៅទីស្តីការក្រសួងឧស្សាហកម្មរ៉ែនិង​ថាមពលក្រោមវត្តមានលោកឧបនាយក​រដ្ឋ​​មន្រ្តីប្រចាំការគាតឈន់។លោកអតីតៈ​​រដ្ឋមន្រ្តីក្រសួងឧស្សាហកម្មរ៉ែនិងថាមពលបានលើកឡើងថាការសិក្សា​​ស្រាវជ្រាវរ៉ែនៅក្នុងដីត្រូវចំណាយអស់ដើមទុនច្រើនណាស់ហើយនៅពេលទទួលបានលទ្ធ​ផល​វិញនោះ​​សក្កដានុ​​ពល​ធនធានរ៉ែដែលរកឃើញគឺមិនអាចយកធ្វើអាជីវកម្មបានទេមានតែ​ការបោះបង់​ចោលទៅវិញ។​

លោកស៊ុយសែមបានលើកឡើងទៀតថាកន្លងមកមានបណ្តាញសារព័ត៌មានជាតិជាច្រើនបាននិយាយថារ៉ែក្នុង​​​ដីនៅកម្ពុជាមានច្រើនណាស់។ផ្ទុយទៅវិញក្រុមហ៊ុនដែលទទួលបាន​សិទ្ធ​ក្នុងការ​រុករកធនធានរ៉ែវិញ​ប្រឹងប្រែង​​​​ចង់​​ស្លាប់ទៅហើយនៅតែរកមិនឃើញនិងបាន​សម្រេចចិត្តដកថយត្រឡប់ទៅវិញទាំងការខាតបង់។យ៉ាង​ណា​​​​ក៏ដោយអតីតៈរដ្ឋមន្រ្តីក្រសួងនេះបានសង្ឃឹមទៅលើក្រុមហ៊ុនរបស់ប្រទេសអូស្រ្តាលីតែមួយគត់ដែលកំពុងពិនិ​​​ត្យ​ឃើញ​រ៉ែ​មាសនៅខេត្តមណ្ឌលគិរីដែលរំពឹងថានឹងអាចរុករករ៉ែធ្វើអាជីវកម្មបាន។​​​

លោកបានបញ្ជាក់នៅប្រទេសកម្ពុជាយើងមានរ៉ែគ្រប់ប្រភេទតែរ៉ែទាំងនោះវាមិនមានច្រើន​ដែលអាចធ្វើ​​​​អាជីវកម្មបាននោះទេរហូតមានក្រុមហ៊ុនខ្លះបានចំណាយពេលរុករកធនធានរ៉ែក្នុងដីនៅក្នុងប្រទេសកម្ពុជាជាង​​​៥ឆ្នាំតែលទ្ធផលដែលទទួលបានគឺមិនគ្រប់គ្រាន់សម្រាប់ធ្វើអាជីវកម្មនោះទេមកដល់ពេលនេះក៏មានក្រុមហ៊ុន​​​ច្រើនដែរបានដួលរលំដោយសារវិស័យរ៉ែ​នេះ។គួរបញ្ជាក់ថាក្រសួងឧស្សាហកម្ម​រ៉ែនិងថាមពលរកចំណូលចូល​​​​រដ្ឋ​​​តាម​​រយៈសួយសារផ្ទៃដីនិងកំរ៉ៃ​អាជ្ញាប័ណ្ណប្រចាំឆ្នាំដែលទទួលបានពីវិស័យនេះបានប្រមាណ៣​លានដុល្លា​​​​​ក្នុង​​មួយ​ឆ្នាំ៕​​​

ដោយ៖ ស