ភ្នំពេញៈ ក្រសួងធនធានទឹក និងឧតុនិយម អំពាវនាវឲ្យប្រជាពលរដ្ឋបន្តការប្រុងប្រយត្ន័ខ្ពស់ ខណៈប្រពន្ធ័សម្ពាធទាបនឹងអូសបន្លាយរយៈពេលមួយសប្តាហ៍ទៀត ដែលធ្វើឲ្យមានភ្លៀងធ្លាក់រាយប៉ាយស្ទើរទូទាំងប្រទេស និងធ្វើឲ្យទឹកទន្លេហក់ឡើងខ្ពស់ ។ លោក ចាន់ យុត្ថា នាយកខុទ្ធកាល័យនៃក្រសួងធនធានទឹកនិងឧតុនិយមបានឲ្យដឹងថា មកដល់ពេលនេះប្រពន្ធ័សម្ពាធទាបនៅតែបន្តគ្របដណ្តប់នៅទូទាំងប្រទេសហើយកំពុងតែស្ថិតនៅព្រំប្រទល់ភាគខាងលើកម្ពុជា-ឡាវ ។ លោកបន្តថា សម្ពាធទាបនេះនៅតែបន្តមាន ឥទ្ធិពលលើព្រះ
រាជាណាចក្រកម្ពុជាក៏ដូចជានៅលើអាងទន្លេមេគង្គភាគខាងលើក្នុងប្រទេសថៃនិង ប្រទេសឡាវហើយស្ថានភាពនេះអូសបន្លាយយ៉ាងតិចមួយសប្តាហ៍ទៀត ។
លោកបញ្ជាក់ថា ភ្លៀងនៅតែបន្តធ្លាក់ជាពិសេសនៅតំបន់ខ្ពង់រាប និងតំបន់មាត់សមុទ្រហើយដោយសារមានភ្លៀងធ្លាក់ជោគជាំនៅឯអាងទន្លេមេគង្គ ដូច្នេះទឹកទន្លេនឹងបន្តឡើងជាបន្តទៀត អាចនឹងក្នុងរង្វង់១ម៉ែត្រឬជាង១ម៉ែត្រក្នុងរយៈពេលប៉ុន្មានថ្ងៃនេះ។ តាមព្រឹត្តបត្រ័ព័ត៌មាន និងការព្យាករណ៍កំពស់ទឹកជំនន់នៅថ្ងៃនេះបានបង្ហាញថា ស្ថានភាព ទឹកជំនន់នៅតាមដងទន្លេនានានៅកម្ពុជាកំពុងបន្តហក់ឡើងខ្លាំង ពិសេសនៅទន្លេមេគង្គស្ទឹង ត្រែង។ ដោយឡែកស្ថានីយជលសាស្រ្តបាសាក់ចតុមុខទឹកមានកំពង់៨.៣០ម៉ែត្រ ហើយ ប៉ុន្មានថ្ងៃទៀតអាចនឹងឡើងដល់កំពស់ជាង៩ម៉ែត្រ។ តាមរយៈស្ថានភាពដូច្នេះ លោក ចាន់ យុត្ថា ក៏បានអំពាវនាវដល់ប្រជាពលរដ្ឋនៅទូទាំងប្រទេស ជាពិសេសប្រជាពលរដ្ឋដែលរស់ នៅអមសងខាងផ្លូវទឹកនានា សូមបង្កើនការប្រុង
ប្រយ្នត័និងយកចិត្តទុកដាក់ចំពោះកូនចៅ កុំបណ្តោយឲ្យលែងទឹកផ្តេសផ្តាសដើម្បីការពារគ្រោះថ្នាក់នានាកើតឡើងជាយថាហេតុព្រោះទឹកទន្លេបានចាប់ផ្តើមហក់ឡើងហើយការឡើងលើកនេះគឺលឿនជាងពេលមុនៗឆ្នាំនេះតាមការព្យាករណ៍ជំនន់ទន្លេមេគង្គពុំសូវធំប៉ុន្មានទេពោលគឺអាចមានកម្ពស់ ត្រឹមតែ៩.៨៧ម៉ែត្រប៉ុណ្ណោះចំពោះស្ថានីយចតុមុខហើយកំពស់ដែលត្រូវប្រកាសអាសន្នមានរហូត ដល់១០ម៉ែត្រកន្លះ។សូមបញ្ជាក់ថានៅក្នុងរដូវទឹកជំនន់ឆ្នាំ២០១៣នេះរាជរដ្ឋាភិបាលកម្ពុជាត្រៀមស្បៀងបំរុងជាង១៦.០០០តោនអង្ករ សម្រាប់ជួយសង្គ្រោះប្រជាពលរដ្ឋនៅក្នុងរដូវទឹកជំនន់និងក្រោយទឹកជំនន់ ៕ ដោយៈគង់ រតនា