រាជធានីភ្នំពេញ៖ ក្រុមបាតុករជាច្រើនម៉ឺននាក់ កាលពីព្រឹកថ្ងៃទី១៦ ខែកញ្ញា ឆ្នាំ២០១៣ បានមកជួបជុំគ្នា សារជាថ្មី នៅម្តុំបរិវេណទីលានប្រជាធិតេយ្យ ដើម្បីបន្តធ្វើបាតុកម្មអហឹង្សាម្តងទៀត បើទោះបីជាមិនមាន ច្បាប់អនុញ្ញាត្តិជាផ្លូវការណាមួយពីសាលារាជធានី។
មហាបាតុកម្មអហឹង្សានេះ ត្រូវបានបន្តធ្វើនៅខណៈដែលថ្នាក់ដឹកនាំ នៃគណបក្សទំាងពីរ ដែល មានគណបក្សសង្គ្រោះជាតិ (CNRP) និងគណបក្សប្រជាជន(CPP) កំពុងជំនួបចរចាគ្នាមួយ កាលពី វេលាម៉ោង៩និង២០នាទីព្រឹក ថ្ងៃទី១៦ ខែកញ្ញា ឆ្នាំ២០១៣នេះ ដើម្បីស្វែងរកដំណោះស្រាយរួមគ្នា នៅ ឯវិមានរដ្ឋសភាជាតិ។
សកម្មជនម្នាក់នៃគណបក្សសង្រ្គោះជាតិ លោក តែម សុខា អាយុ៣១ឆ្នាំ បានឲ្យដឹងថា សម្លេង ប្រគុំតន្ត្រីត្រូវបានចាប់ផ្តើមជាថ្មីម្តងទៀត នៅឯទីលានប្រជាធិបតេយ្យ ដើម្បីជាកម្លាំងចិត្តសម្រាប់ការចូលរួមរបស់ក្រុមបាតុករ។ លោកនិយាយថា៖«យើងមិនអាចបញ្ឈប់បានទេ ដរាបណាប្រជាជនកម្ពុជានៅមិនទាន់បានទទួលយុត្តិធម៌នោះ»។
ជាក់ស្តែង នៅព្រឹកថ្ងៃនេះ ចំនួនក្រុមបាតុករ ហាក់បីដូចជាមានការថយចុះជាងថ្ងៃទី១បន្តិច ប៉ុន្តែ ស្ថានភាពនៃការថយចុះចំនួនក្រុមបាតុករ គេនៅមិនទាន់បានដឹងអំពីមូលហេតុច្បាស់លាស់នៅឡើយទេ។ ដោយឡែកលោកតែម សុខាបានបញ្ជាក់ថា កាលពីព្រឹកមិញនេះ ចំនួនអ្នកចូលរួមធ្វើបាតុកម្មហាក់បីដូចជាថយចុះជាងមុនបន្តិច ដោយសារតែមានបាតុករខ្លះបានរងរបួស ដោយការប្រើហឹង្សា ពីសំណាក់កម្លាំងសមត្ថកិច្ចនៅខាងមុខវត្តឧណ្ណាឡោម។
កាលពីវេលាម៉ោង៨និង២៤នាទី យប់ថ្ងៃទី១៥ ខែកញ្ញា មានការប៉ះទង្គិចគ្នាមួយទៀត ត្រូវបានកើតឡើងនៅឯស្ពានអាកាសក្បាលថ្នល់ បណ្តាលឲ្យបុរសម្នាក់ស្លាប់ និងជាច្រើននាក់ទៀតរងរបួសធ្ងន់ស្រាលផងដែរ។
អ្នកស្រីនែប សឿន ជាអាជីវករលក់គ្រឿងទេស នៅខាងមុខស្ពានអាកាសបាននិយាយថា ពិតជាមានហេតុការណ៍ប៉ះទង្គិចគ្នាប្រាកដមែន ដោយបានអូសបន្លាយអស់រយៈពេលជាង១ម៉ោង បណ្តាលឲ្យស្ថានភាពនៅកន្លែងកើតហេតុមានសភាពវឹកវររញ៉េរញ៉ៃ ដោយសារតែក្រុមសមត្ថកិច្ច បាញ់គ្រាប់បែកផ្សែងអស់ជាច្រើនគ្រាប់ ដើម្បីបំបែកក្រុមបាតុករ ចំណែកក្រុមបាតុករក៏បានប្រើប្រាស់ដុំថ្មគប់តបតទៅភាគីក្រុមសមត្ថកិច្ចវិញផងដែរ។រហូតមកដល់រសៀលថ្ងៃទី១៦ ខែកញ្ញា ឆ្នាំ២០១៣នេះ ស្ថានការណ៍បានវិលទៅរកភាពស្ងប់ស្ងាត់ដដែល ដោយសារតែផ្សារទំនើប និងក្រុមហ៊ុនឯកជនមួយចំនួន ត្រូវបានបិទទ្វារផ្អាកការធ្វើអាជីវកម្មរបស់ខ្លួន ក៏ព្រោះតែការភ័យខ្លាចជាមួយនិងហេតុការណ៍ប៉ះទង្គិចគ្នា ដែលបានកើតឡើងកាលពីថ្ងៃអាទិត្យម្សិលមិញ។
លោកតេង តាន់ បុគ្គលិកក្រុមហ៊ុនស្រាបៀរ នៅទីក្រុងភ្នំពេញ បានប្រាប់ឲ្យដឹងថា នៅថ្ងៃនេះថៅកែរោងចក្រ បានគិតគូរអំពីសុវត្ថិភាពរបស់បុគ្គលិក ទើបមានការអនុញ្ញាត្តិឲ្យឈប់សម្រាក១ថ្ងៃ។ លោកបន្តថា៖«ខ្ញុំសោកស្តាយខ្លាំងណាស់ នៅពេលដឹងថា មានមនុស្សស្លាប់និងរងរបួសដោយសារបាតុកម្មម្សិលមិញនេះ ដូច្នេះគួរតែភាគីទាំងសងខាងឆាប់ស្រុះស្រួលគ្នាឡើងវិញ ដើម្បីទប់ស្កាត់មិនឲ្យមានការបង្ហូរឈាមកើតឡើងបន្តទៀត»។
គួរបញ្ជាក់ថា រហូតមកដល់ពេលនេះ កម្លាំងសមត្ថកិច្ចបានបើកប៉ារាស់រាំផ្លូវជាច្រើនកន្លែង ដើម្បីឲ្យប្រជាពលរដ្ឋធ្វើចរាចរណ៍ ដូចធម្មតាវិញហើយ ប៉ុន្តែនៅមានផ្លូវមួយចំនួនទៀត នៅតែបន្តរាំងប៉ាសរាស់នៅឡើយទេ ខណៈដែលការធ្វើបាតុកម្មនៅតែបន្តជាលើកទី២ទៀត។
ឆ្លើយតបនិងភាពចលាចលខាងលើនេះ កាលពីថ្ងៃទី១៥ ខែកញ្ញា ឆ្នាំ២០១៣ ព្រះមហាក្សត្រនរោត្តមសីហមុនីបានចេញព្រះរាជសារ ជូនជនរួមជាតិ ដើម្បីចូលរួមរំលែកទុក្ខនិងមហាសោកស្តាយចំពោះអ្នកស្លាប់និងរងរបួសដោយសារការ ប៉ះទង្គិចនេះផងដែរ។ ដោយ៖ អភិរក្ស