បន្ទាយមានជ័យ ៖     សពពលករខ្មែរម្នាក់ត្រូវរថយន្តបុកស្លាប់នៅទីក្រុងបាងកកប្រទេស​ថៃពេលចេញពី​ធ្វើ​ការ​ដើទៅទិញបាយហូប​ត្រូវបានកុងស៊ុលកម្ពុជានិងអាជ្ញាធរថៃធ្វើការ​បញ្ជូនមកកម្ពុជា​វិញកាលពីព្រឹក​ថ្ងៃទី២៨​ខែសីហាឆ្នាំ២០១៣តាម​ច្រកអន្តរជាតិប៉ោយប៉ែតខេត្តបន្ទាយមានជ័យដើម្បីប្រគល់ជូន​សាច់ញាតិយក​ទៅធ្វើ​បុណ្យ​នៅស្រុកកំណើត។

នាយរងប៉ុស្តិ៍នគរបាលអន្តោប្រវេសន៍ច្រកអន្តរជាតិប៉ោយប៉ែតលោកធិបយ៉ាឌីបានឲ្យដឹងថាជនរងគ្រោះមាន​ឈ្មោះស៊ិនរ៉េតភេទប្រុសអាយុ៤០ឆ្នាំមានស្រុកកំណើតនៅភូមិសំរិតឃុំឈើទាលស្រុកសណ្តាន់ខេត្តកំពង់ធំ។លោកនាយរងបន្តថាយោងតាមបាយការណ៍អគ្គកុងស៊ុលកម្ពុជាប្រចាំប្រទេសថៃបានឲ្យដឹងថាជនរងគ្រោះ​ស៊ិនរ៉េតបានស្លាប់នៅមន្ទីរពេទ្យឡាកាបាំងទីក្រុងបាងកកបន្ទាប់ពីជួបគ្រោះថ្នាក់ចរាចរណ៍រថយន្តទេសចរណ៍​បុកត្រង់ផ្លូវបំបែកជា៤កាលពីវេលាម៉ោង១១យប់ថ្ងៃទី២៦ខែសីហាឆ្នាំ២០១៣ខណៈជនរងគ្រោះដើរទៅទិញ​បាយហូបក្រោយសម្រាកពីការងាររោងចក្រ។បច្ចុប្បន្នសពជនរងគ្រោះត្រូវបានសាច់ញាតិមកទទួលយកទៅធ្វើបុណ្យនៅស្រុកថ្មគោលខេត្តបាត់ដំបងដែល​ជាផ្ទះរបស់ប្រពន្ធជនរងគ្រោះ៕

ដោយ ៖ សស្អាត