ភ្នំពេញ៖ លោក ប្រាក់ សុខុន រដ្ឋមន្ដ្រីថ្មីនៃក្រសួងប្រៃសណីយ៍ និងទូរគមនាគមន៍ បានធ្វើសន្និសីទកាសែតមួយកាលពីវេលាម៉ោង៣រសៀល ថ្ងៃច័ន្ទ ទី៩ ខែធ្នូ ម្សិលមិញនេះ ដើម្បីពន្យល់ពីការកំណត់ ថ្លៃអប្បបរមាសេវាប្រព័ន្ធទូរស័ព្ទចល័ត អចល័តនិងថ្លៃតភ្ជាប់បណ្តាញ ដើម្បីឲ្យអតិថិជន អ្នកប្រើប្រាស់ សេវាទូរស័ព្ទនៅកម្ពុជាទាំងអស់បានយល់ពីការកំណត់ថ្លៃនេះ។
ថ្លែងនៅទីស្ដីការក្រសួងប្រៃសណីយ៍ និងទូរគមនាគមន៍ ក្បែរវត្ដភ្នំ លោករដ្ឋមន្ត្រី ក្រសួងប្រៃសណីយ៍ បានថ្លែងឱ្យដឹងថា មូលហេតុចម្បង ៤យ៉ាង ដែលបានរុញច្រាន ឲ្យមានការកំណត់តំលៃអប្បបរមានេះ ដែលរួមមាន ទីមួយ គឺដើម្បីទប់ស្កាត់ការប្រកួតប្រជែងមិនស្មោះត្រង់។ ទីពីរ ធានាគុណភាពសេវាកម្មឲ្យមានការកើនឡើង។ ទីបី ធ្វើឲ្យតម្លៃមូលដ្ឋានមានលក្ខណៈសមរម្យ។ និងទីបួន ធានាចំណូលរដ្ឋឲ្យមានស្ថិរភាព ពីព្រោះរយៈពេល៥ឆ្នាំកន្លងមក ចំណូលរដ្ឋដែលបានមកពីវិស័យទូរគមនាគមន៍មានការធ្លាក់ចុះ។
រដ្ឋមន្ត្រីក្រសួងប្រៃសណីយ៍ និងទូរគមនាគមន៍រូបនេះ បានបំភ្លឺទៀតថា ការដែលស្ថាប័នខ្លួនលូកដៃក្នុងការធ្វើបញ្ញត្តិកម្មតម្លៃសេវាទូរស័ព្ទ គឺដើម្បីទប់ស្កាត់ការប្រកួតប្រជែងមិនស្មោះត្រង់ និងដើម្បីធានាផលប្រយោជន៍យូរអង្វែងដល់អតិថិជន ក្រុមហ៊ុនទូរស័ព្ទ និងអ្នកវិនិយោគ។
លោក ប្រាក់ សុខុនស្តីពីការសម្រេចរបស់ រាជរដ្ឋាភិបាល ទាក់ទងនឹងបញ្ញត្តិកម្មលើសេវាកម្មទូរស័ព្ទ ដែលការដាក់ឲ្យដំណើរការសេចក្តីប្រកាសអន្តរក្រសួងលេខ២៣២ រវាងក្រសួងប្រៃសណីយ៍ និងក្រសួងសេដ្ឋកិច្ច។ សេចក្តីជូនដំណឹង តម្រូវឲ្យក្រុមហ៊ុនទូរស័ព្ទចល័តទាំងអស់មិនត្រូវផ្តល់ទឹកប្រាក់ បន្ថែម ដែលនាំឲ្យអត្រាការហៅចេញក្នុងប្រព័ន្ធតិចជាង៤.៥សេន/ដុល្លារ ក្នុងមួយនាទី និងតម្លៃហៅចេញក្រៅប្រព័ន្ធទាបបំផុត៥.៩៥សេនដុល្លារ ក្នុងមួយនាទី។
គួររំលឹកដែរថា កាលពីថ្ងៃទី២១ ខែវិច្ឆិកា ឆ្នាំ២០១៣កន្លងទៅនេះ ទីស្ដីការគណៈរដ្ឋមន្ត្រី បានសម្រេចដាក់ឲ្យដំណើរការនូវសេចក្ដីប្រកាសអន្តរក្រសួង លេខ ២៣២ រវាងក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច និងហិរញ្ញវត្ថុ ដោយបានកំណត់ឲ្យក្រុមហ៊ុនបំរើសេវាទូរស័ព្ទចល័តទាំងអស់ នៅក្នុងប្រទេសកម្ពុជា មិនត្រូវអនុញ្ញាតឲ្យគិតលុយ ឬក៏ផ្ដល់លុយបន្ថែមដែលបណ្ដាលឲ្យអត្រាតម្លៃតេចេញក្នុងប្រព័ន្ធតិចជាង៤,៥សេនក្នុងមួយនាទីនោះទេ។
យ៉ាងណាក៏ដោយ លោករដ្ឋមន្ត្រីក្រសួងប្រៃសណីយ៍ បានបញ្ជាក់ថា នេះគ្រាន់តែជាវិធានការបណ្តោះអាសន្នប៉ុណ្ណោះ ពីព្រោះស្ថាប័នរបស់លោកត្រូវជួបប្រជុំជាមួយអ្នកជំនាញជាតិ អន្តរជាតិ នាពេលខាងមុខទៀត ដើម្បីកំណត់គោលការណ៍មួយច្បាស់លាស់។
ដោយឡែក ក្រសួងសេដ្ឋកិច្ច និងហិរញ្ញវត្ថុឯណោះវិញនោះ បានបង្ហាញពីតួលេខចំនួនអ្នកប្រើប្រាស់ទូរស័ព្ទនៅកម្ពុជាថា
អត្រាអ្នកប្រើប្រាស់ទូរស័ព្ទមានការកើនឡើងពី១ឆ្នាំ ទៅ១ឆ្នាំ។ ដោយកាលពីឆ្នាំ ២០០៨ កន្លងទៅ គឺមានអ្នកប្រើលេខទូរស័ព្ទ ប្រមាណជា៣លាន៨សែននាក់ ហើយនៅក្នុងឆ្នាំ ២០១២ អត្រាជាវលេខទូរស័ព្ទ បានហក់ឡើង រហូតដល់ ១៩លានលេខ។ ប៉ុន្តែបើគិតត្រឹម ១១ខែ ក្នុងឆ្នាំ២០១៣ ពន្ធរដ្ឋគ្រប់ប្រភេទ ដែលបានមកពីសេវាទូរស័ព្ទនេះ គឺមានតែ៨០លានដុល្លាប៉ុណ្ណោះ៕ ដោយ ៖ ភីនរ៉ា