ភ្នំពេញ ៖ វេទិការស្តីពី ធុរកិច្ច និងសិទ្ធិមនុស្ស សម្រាប់អ្នកសារព័ត៌មានបានចាប់ផ្តើមបើកហើយនៅព្រឹកថ្ងៃទី២៧ខែសីហាឆ្នាំ ២០១៣នៅសណ្ឋាគា ហីម៉ាវ៉ារី ។ វេទិការនេះ រៀបចំឡើងដោយការិយាល័យឧត្តមស្នងការសិទ្ធិមនុស្សអង្គការសហប្រជាជាតិ ក្រោមកិច្ចសហប្រតិបការពីមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយដើម្បីឯករាជ្យ។
លោកប៉ា ង៉ួនទៀងនាយកមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយដើម្បីឯករាជ្យ(CCIM) បានមានប្រសាសន៍ថា វេទិការនេះ ធ្វើឡើងក្នុងគោលបំណងឱ្យអ្នកសារព័ត៌មាន និងអ្នកធុរកិច្ច និងអ្នកពាក់ព័ន្ធបានយល់ដឹងពីគោលការណ៍ណែនាំ របស់អង្គការសហប្រជាជាតិ ស្តីពីសិទ្ធិមនុស្ស និងធុរកិច្ច និងក្របខណ្ឌ«ការពារ គោរព និងដោះស្រាយ» របស់អង្គការសហប្រជាតិ និងជាពិសេស យល់ដឹងពីការទទួលខុសត្រូវរបស់សារជីវកម្មក្នុងការគោរពសិទ្ធិមនុស្ស។
លោកបន្តថា អ្នកសារព័ត៌មានជាអ្នកដើរតួនាទីយ៉ាងសំខាន់ក្នុងការសរសេរអត្ថបទរបស់ខ្លួនអោយអ្នកអាន អ្នកទស្សនា និងអ្នកស្តាប់បានយល់ដឹងពីសិទ្ធិមនុស្ស។
លោកស្រី Wan Hea Lee តំណាងប្រចាំកម្ពុជានៃឧត្តមស្នងការអង្គសហប្រជាជាតិបានមានប្រសាសន៍ថា អាជីវកម្មជាប្រភពនៃករឆ្នៃប្រឌិត ហើយធុរកិច្ចគឺជាអ្នកឈានមុខគេក្នុងការគោរពសិទ្ធិមនុស្សនៅកម្ពុជា។
សូមបញ្ជាក់ វេទិការស្តីពី ធុរកិច្ច និងសិទ្ធិមនុស្ស សម្រាប់អ្នកសារព័ត៌មានធ្វើឡើងរយៈពេលមួយព្រឹកនឹងបញ្ចប់នៅម៉ោង១២ថ្ងៃត្រង់ ដោយមានការចូលរួមពី តំណាងអង្គការសហប្រជាតិ CCIM តំណាងក្រុមហ៊ុន ម៉ុងប្ញទ្ធីគ្រុប អង្គការ អភិវឌ្ឍន៍ និងភាពជាដៃរគូក្នុងសកម្មភាព ព្រមទាំងអ្នកសារព័ត៌មានជាតិ និងអន្តរជាតិប្រមាណ៥០នាក់ផងដែរ៕
ដោយ ៖ សស្អាត