ប៉ោយប៉ែត ៖ ឈើប្រណីតត្រូវបានគេមើលឃើញថាកំពុងធ្វើចរាចរណ៍ស្ទើពាសពេញក្រុងប៉ោយប៉ែត ហាក់ដូចជាគ្មានការទប់ស្កាត់និងបង្ក្រាបពីអាជ្ញាធរជំនាញ និង សមត្ថកិច្ចមូលដ្ឋាន ។តាមប្រភពព័ត៌មានពីតំបន់មួយចំនួនក្នុងក្រុងប៉ោយប៉ែតដឹងថាឈើប្រណីតដូចជា ឈើបេង ឈើនាងនួន និងឈើជាច្រើនប្រភេទផ្សេងៗទៀត ត្រូវឈ្មួញនាំយកមកពីតំបន់មួយចំនួននៃខេត្តព្រះវិហារនិងឧត្តរមានជ័យ នឹងឆ្លងកាត់តាមខេត្តសៀមរាមមកបន្ទាយមានជ័យផ្ទាល់តែម្តង ដោយឆ្លងកាត់តំបន់ត្រួតពិនិត្យរបស់សមត្ថកិច្ចស្ទើរគ្រប់ស្ថាប័នលើកលែងតែគ្រូបង្រៀន និងក្រុមគ្រូពេទ្យតែប៉ុណ្ណោះដែលមិនពាក់ព័ន្ធជាមួយនិងករណីខាងលើនេះ។
ដោយឡែកឈើមួយចំនួនទៀត ដែលជាប្រភេទឈើក្រញូងត្រូវក្រុមមនុស្សមានអំណាចនាំចេញពីតំបន់ស្រុកម៉ាឡៃ ខេត្តបន្ទាយមានជ័យ ឆ្ពោះទៅព្រំដែនប្រទេសវៀតណាមតាមច្រករបៀងជាច្រើនយ៉ាងសកម្ម។ចំណែក ដេប៉ូលក់ឈើនៅខេត្តបន្ទាយមានជ័យរហូតដល់ជាយដែនក្រុងប៉ោយប៉ែតកំពុងរីកដូចផ្សិត និងគ្មានច្បាប់អនុញ្ញាតហើយគេក៏មិនសូវជាឃើញមានមន្ត្រីជំនាញរដ្ឋបាលព្រៃឈើទៅហាមឃាត់នោះដែរ ។
ប្រជាពលរដ្ឋនាំគ្នានិយាយថា ពួកឈ្មួញដឹកឈើឆ្លងកាត់តំបន់នីមួយៗបើគ្មានការបើកដៃពីអាជ្ញាធរនិងមន្រ្តីជំនាញទេនោះតើវាអាចទៅរួចទេសូម្បីតែឈើមួយម៉ូតូក៏មិនអាចរត់រួចដែរ។ ម៉្យាងទៀតពួកឈ្មួញកណ្តាលមានលុយអាចបើកដេប៉ូលក់ឈើក្នុងមូលដ្ឋានបានវាទាល់តែមានការអនុញ្ញាតពីអាជ្ញាធរ ឬ ស្ថាប័នជំនាញពាក់ព័ន្ធនិងព្រៃឈើដែរ។
ជាក់ស្តែងកាលពីរសៀលថ្ងៃទី២១ខែសីហាលោកនាយខណ្ឌរដ្ឋបាលព្រៃឈើខេត្តបន្ទាយមានជ័យ មានដឹកនាំមន្ត្រីក្រោមឱវាទជាច្រើនរូបចុះត្រួតពិនិត្យដេប៉ូនិងសិប្បកម្មឈើមួយកន្លែងក្នុងក្រុងប៉ោយប៉ែត ជាលទ្ធផល គឺបានត្រឹមតែនិយាយថាឈើគេមានច្បាប់អនុញ្ញាតតែប៉ុណ្ណោះ។
ប្រជាពលរដ្ឋបានរិះគន់ទៅលើចំណាត់ការរបស់អាជ្ញាធរមានសមត្ថកិច្ចជាពិសេសមន្ត្រីរដ្ឋបាលព្រៃឈើថា បានទទួលលាភសក្ការៈពីក្រុមឈ្មួញូរួមដៃបំផ្លាញព្រៃឈើឲ្យវិនាសហិនហោច។ ពួកគាត់សុំអំពាវនាវដល់មន្រ្តីទាំងនោះឲ្យភ្ញាក់ឡើងកុំដេកលក់យូរពេកពីព្រោះព្រៃឈើស្រុកខ្មែរមហន្តរាយជិតអស់ហើយ។ រាជរដ្ឋាភិបាលបញ្ជូន មន្រ្តីជំនាញឲ្យទៅការពារព្រៃឈើ មិនមែនឲ្យទៅរកប្រយោជន៍ផ្ទាល់ខ្លួនហើយរួមគំនិតបំផ្លាញព្រៃឈើឲ្យហិនហោចនោះទេ៕
ដោយ ៖ សស្អាត