ភ្នំពេញ:លោកលីវ វណ្ណថេង ត្រូវបានប្រកាសឲ្យចូលកាន់ដំណែងជាចៅសង្កាត់ព្រែកថ្មីជំនួស លោក ឈឹម សាំង កាលពីរសៀលថ្ងៃទី៣០ ខែមេសា ឆ្នាំ២០១៣ ដែលត្រូវបានក្រសួងមហាផ្ទៃប្រកាសផ្លាស់ប្តូរក្រោមវត្តមាន លោក ប៉ា សុជាតិវង្ស អភិបាលរងរាជធានីភ្នំពេញ និងលោក គួច ចំរើន អភិបាលខណ្ឌមានជ័យ ព្រមទាំងមន្រ្តីរាជការប្រជាពលរដ្ឋក្នុងខណ្ឌមានជ័យយ៉ាងច្រើនកុះករផងដែរ។
លោកឈឹមសាំងជាមេឃុំតាំងពីស្ថិតក្នុងការគ្រប់គ្រងរដ្ឋាបាលស្រុកកៀនស្វាយខេត្តកណ្តាល និងបន្តធ្វើជាចៅសង្កាត់បន្ទាប់ពីបានកាត់បញ្ចូលមកក្នុងការគ្រប់គ្រងរដ្ឋបាលសាលារាជធានីភ្នំពេញ ដោយបានធ្វើការអភិវឌ្ឍកសាងសមិទ្ឋផលជាច្រើននៅក្នុងមូលដ្ឋានសង្កាត់ព្រែកថ្មី។
បន្ទាប់ពីទទួលបានត្រានិងបញ្ជីសារពើភណ្ឌរបស់សង្កាត់រួចលោកលីវវណ្ណថេងចៅសង្កាត់ថ្មីបានឡើងប្តេជ្ញាចិត្តខិតខំបំពេញតួនាទីភារកិច្ចប្រកបដោយភាពរួសរាយរាក់ទាក់ក្នុងការផ្តល់សេវាជូនប្រជាពលរដ្ឋឲ្យបានល្អប្រសើរដើម្បីរួមចំណែកអនុវត្តនូវយុទ្ឋសាស្រ្តចតុកោណដំណាក់កាលទី២របស់រាជរដ្ឋាភិបាលកម្ពុជា។
ក្នុងឱកាសនោះលោកអភិបាលរងរាជធានីភ្នំពេញប៉ាសុជាតិវង្សបានមានមតិផ្តល់នូវអនុសាសន៍ជាច្រើនព្រមទាំងបានក្រើនរំលឹកដល់ក្រុមប្រឹក្សាសង្កាត់ពិសេសលោកលីវវណ្ណថេងដែលទើបឡើងកាន់តំណែងជាចៅសង្កាត់ព្រែកថ្មីនេះត្រូវខិតខំបម្រើការងារជូនប្រជាពលរដ្ឋឲ្យបានខ្ជាប់ខ្ជួននិងលុបបំបាត់ភាពអសកម្មទាំងឡាយដែលមានពិសេសមិនត្រូវបង្ខិតបង្ខំឲ្យប្រជាពលរដ្ឋបង់សេវាផ្សេងៗនោះឡើយ៕
ដោយ សំអាត