ភ្នំពេញ៖ព្រះសង្ឃមានតួនាទីយ៉ាងសំខាន់ ក្នុងការចូលរួមចំណែកជាមួយរាជរដ្ឋាភិបាលកម្ពុជាក្នុងការ
ចូលរួមទប់ស្កាត់ការកើតនិងការរីករាលដាលជំងឺអេដស៍នៅក្នុងសង្គមកម្ពុជាបច្ចុប្បន្ននេះ។ នេះបើតាមការ
លើកឡើងរបស់លោកទេសរដ្ឋមន្រ្តី នុត សុខុម ជាប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែង
អះអាងនៅព្រឹកថ្ងៃព្រហស្បតិ៍ ទី១១ ខែមេសា នេះក្នុងឱកាសសូត្រមន្តរាប់បាត្រត្រៀមឆ្លងឆ្នាំថ្មីប្រពៃណី
ជាតិ ឆ្នាំម្សាញ់ បញ្ចស័ក ព.ស ២៥៥៧ដែលនឹងចាប់ផ្តើមនៅថ្ងៃទី១៤មេសានេះ ។
ពិធីនេះបានធ្វើឡើងពិធីនៅទីស្តីការអាជ្ញាធរជាតិប្រយុទ្ធនឹងជំងឺអេដស៍ដែលបានរៀបចំតាមបែបព្រះពុទ្ធសា
សនា ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិនៅ ព្រឹកថ្ងៃទី១១ ខែមេសា ឆ្នាំ២០១៣នេះ ។ លោកទេសរដ្ឋមន្រ្តីបានមានប្រសាសន៍ថាព្រះសង្ឃបានចូលរួមចំណែកយ៉ាងសំខាន់ដែលមិនអាចខ្វះបាន
ក្នុងការចូលរួមផ្សព្វផ្សាយអំពីបញ្ហាអេដស៍ដល់ប្រជាពលរដ្ឋដែលជាពុទ្ធបរិស័ទតាមរយៈធម្មទេសនា ការ
អប់រំផ្សេងៗ ដើម្បីឲ្យបានយល់ជ្រួតជ្រាបអំពីការកើតនិងការរីករាលដាលនៃជំងឺអេដស៍ និងបញ្ហាប្រឈម
នៃជំងឺអេដស៍ដែលគ្មានថ្នាំព្យាបាល ។
លោកទេសរដ្ឋមន្រ្តីបានបន្តទៀតថារាជរដ្ឋាភិបាលកម្ពុជាក្រោមការដឹកនាំ របស់សម្តេចតេជោ ហ៊ុន សែន
នាយករដ្ឋមន្រ្តីកម្ពុជាតែងតែយកចិត្តទុកដាក់យ៉ាងខ្លាំងចំពោះសុខភាពរបស់ប្រជាពលរដ្ឋកម្ពុជានៅទូទាំង
ប្រទេសដើម្បីជាការរួមចំណែកក្នុងការ លើកកម្ពស់ជីវភាពរបស់ប្រជាពលរដ្ឋឲ្យកាន់តែល្អប្រសើរឡើង
ថែមទៀត។
លោកទេសរដ្ឋមន្រ្តី នុត សុខុម បានបញ្ជាក់ថា ព្រះសង្ឃនូវបានចូលរួមចំណែកយ៉ាងសំខាន់ផងដែរ
នៅក្នុងការជួយឧបត្ថម្ភដល់ប្រជាពលរដ្ឋដែលបានកើតនិងឆ្លងជំងឺអេដស៍ ពិសេសចូលរួមចំណែកកាត់
បន្ថយការរើសអើងទៅលើអ្នកកើតអេដស៍ដោយទទួលបានជោគជ័យយ៉ាងត្រចះត្រចង់នៅគ្រប់ទីកន្លែង
ដែលនេះគឺជាការបង្ហាញឲ្យឃើញពីទឹកចិត្តសប្បុរធម៌របស់ព្រះសង្ឃចំពោះអ្នកកើតនិងឆ្លងជំងឺអេដស៍ ។ សង្ឃដិការរបស់ព្រះសង្ឃពិតជាមាន ឥទ្ធិពលខ្លាំងណាស់ចំពោះពុទ្ធសាសនិកខែ្មរ គ្រប់រូបដែលមាន
ជំនឿសាសនា ៕