ភ្នំពេញៈ រដ្ឋាករទឹកស្វយ័តរាជធានីភ្នំពេញ បានសម្ពោធប្រព័ន្ធផលិតថាមពលអគ្គិសនីដើរដោយថាមពលព្រះអាទិត្យដែលមានតម្លៃស្មើ៧ លានដុល្លារ ជំនួយរបស់រដ្ឋាភិបាលជប៉ុន តាមរយៈទីភ្នាក់ងារ(JICA កាលពីថ្ងៃទី ១១ ខែមីនា ឆ្នាំ២០១៤រដ្ឋាករទឹកស្វយ័តក្រុងភ្នំពេញបានឲ្យដឹងថា គម្រោងផ្តួច ផ្តើមដាក់ឲ្យប្រើប្រាស់ថាមពលស្អាតក្នុងការផលិតអគ្គិសនីនេះ ត្រូវបានចាប់ផ្តើមតម្លើងនៅរោងចក្រប្រព្រឹត្តកម្មទឹកស្អាតភូមិព្រែកកាលពីថ្ងៃទី ១៩ ខែកក្កដា ឆ្នាំ២០១២ ដោយក្រុមហ៊ុនម៉ារូប៊ីនីមកពីប្រទេសជប៉ុន ក្រោមការត្រួតពិនិត្យការសាងសង់ដោយទីប្រឹក្សាបច្ចេកទេសរបស់ក្រុមហ៊ុនមកពីប្រទេសជប៉ុនឈ្មោះ ញ៉ូវ ហ្សេក ។
គម្រោងនេះមានរយៈពេលសាងសង់ចំនួន១២ខែនិងប្រើប្រាស់ថវិកាអស់ចំនួន ៧២០លានយេនជប៉ុនស្មើនឹងប្រមាណ៧.៧៨០.០០០ ដុល្លារ។បើតាមរបាយការណ៍រដ្ឋាករទឹករាជធានីភ្នំពេញ បានបង្ហាញថាថាមពលអគ្គិសនីដើរដោយព្រះអាទិត្យអាចផលិតថាមពលអគ្គិសនីបាន១ លានគីឡូវ៉ាត់ក្នុង១ឆ្នាំ សម្រាប់បម្រើសេចក្តីត្រូវការនៅ ទីស្នាក់ការកណ្តាលរដ្ឋាករទឹកស្វយ័តក្រុងភ្នំពេញ និងរោងចក្រប្រព្រឹត្តកម្មទឹកស្អាតភូមិព្រែក។ជាក់ស្តែង ថាមពលទទួលបានពីប្រព័ន្ធផលិតថាមពល រដ្ឋាករទឹកស្វ យ័តក្រុងភ្នំពេញអាចសន្សំសំចៃថាមពលអគ្គិសនីបានប្រមាណ ពី៦% ទៅ ៨% នៃថាមពលប្រើប្រាស់សរុបរបស់រោងចក្រ ផលិតទឹកស្អាតភូមិព្រែក ពោលគឺ អាចកាត់បន្ថយចំណាយលើថាមពលអគ្គិសនីបានប្រមាណ ២០ ម៉ឺនដុល្លារក្នុងមួយឆ្នាំ ហើយបានរំពឹងដែរថា នឹងកាត់បន្ថយឧស្ម័នកាបូនអុកស៊ីតបាន៦៤០តោនក្នុង១ឆ្នាំ ។
លោក គាត ឈន់ ឧបនាយករដ្ឋមន្រ្តី បានមានប្រសាសន៍ថា ប្រព័ន្ធផលិតថាមពលអគ្គិសនីដើរដោយថាមពលព្រះអាទិត្យខាងលើ ជាសមិទ្ធផលរូបវន្តថ្មីមួយទៀត ដែលជាផ្លែផ្កាចេញពីចំណង មិត្តភាព និងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលជប៉ុនក្នុងបរិការណ៍ ដែលកម្ពុជា បន្តគ្របដណ្តប់ដោយសន្តិភាពពេញលេញបរិបូរណ៌។ទន្ទឹមនឹងនោះដែរក្នុងនាមរដ្ឋាភិបាលកម្ពុជា លោកតំណាងឱ្យរាជរដ្ឋាភិបាលកម្ពុជា បានសម្តែងនូវអំណរគុណរដ្ឋាភិបាល និងប្រជាជនជប៉ុន ដែលបានផ្តល់ហិរញ្ញប្បទានឥតសំណងដ៏ថ្លៃថ្លា តាមរយៈ JICA សម្រាប់សាងសង់ប្រព័ន្ធផលិតថាមពលអគ្គិសនីដើរដោយថាមពលព្រះអាទិត្យ ដែលមានតម្លៃជាង៧លានដុល្លារ។
យោងតាមរបាយការណ៍រដ្ឋាករទឹក បានបញ្ជាក់ថា ប្រព័ន្ធផលិតថាមពលអគ្គិសនីដើរដោយថាមពលព្រះអាទិត្យមួយនេះ មានគោលបំណងពីរ គឺរួមចំណែកកាត់បន្ថយចំណាយលើថាមពលអគ្គិសនីនៅរោងចក្រ ប្រព្រឹត្តកម្មទឹកស្អាតភូមិព្រែក សំដៅរក្សាថ្លៃទឹកស្អាតដ៏សមស្របមួយ ដែលអតិថិជនទាំងអស់នៅទូទាំងរាជធានីភ្នំពេញទទួលយកបាន និងរួមចំណែកអនុវត្តន៍នយោបាយរបស់រាជរដ្ឋាភិ- បាលក្នុងការប្រើប្រាស់ថាមពលស្អាត និងកាត់បន្ថយឧស្ម័នផ្ទះកញ្ចក់៕ ដោយ៖ ភីន រ៉ា