ភ្នំពេញ៖ អង្គភាពប្រឆាំងអំពើពុករលួយ  បានបើកវគ្គបណ្តុះបណ្តាលច្បាប់ស្តីពីលក្ខ​ន្តិកៈមន្ត្រីរា​ជ​កា​​រ​ស៊ី​​វិ​ល និងលិខិ​តបទដ្ឋានពាក់ព័ន្ធដល់មន្ត្រីរាជការនៃអង្គភាពប្រឆាំងអំពើពុករលួយ​ចំនួ​ន១៣៥នាក់ដើម្បី​បង្កើ​ន​ប្រ​សិទ្ធិភាពការ​ងារ​​ប្រចាំថ្ងៃ ថែមមួយកម្រិតទៀត។

ថ្លែងក្នុងពិធីបើកវគ្គបណ្តុះបណ្តាលកាលពីព្រឹកមិញ លោក ទូច ស៊ុនណារី អគ្គនាយ​កនៃ​អគ្គ​នា​យកដ្ឋានរដ្ឋបាល និងសន្តិសុខ បានមានប្រសាសន៍ថា ទោះបីមានវគ្គបណ្តុះបណ្តាល​នេះ​​មា​ន​រយៈ​ពេលខ្លីណាស់ ត្រឹមតែពីរថ្ងៃនោះ  ព្រោះច្បាប់ស្តីពីសហ​លក្ខន្តិកៈមន្ត្រីរាជ​ការស៊ី​វិល​​នៃ​ព្រះរា​ជា​ណាចក្រ​កម្ពុជា មានច្រើន គឺ១១​ជំពូ​ក និង៦៤មាត្រា និងការធ្វើវិសោ​ធនកម្ម​នៃ​ច្បា​ប់​ស្តី​ពីស​ហ​លក្ខន្តិកៈមន្ត្រីរាជ​ការ​ស៊ីវិល​និង​ច្បាប់​ពា​ក់ព័ន្ធក៏ដោយ ប៉ុន្តែវាជាទុនមួ​យដ៏មា​ន​សា​​រៈ​សំខាន់​បំផុត សម្រាប់បំពេញ​បន្ថែម​នូវច​ម្ង​ល់កន្លងមក ដែលមានដូចជាច្បា​ប់ ស្តីពីសហ​ល​ក្ខន្តិ​កៈ​មន្ត្រីរាជការស៊ីវិល-ច្បាប់ស្តីពីលក្ខន្តិកៈដោ​យឡែក នៃក្របខណ្ឌមន្ត្រីរាជការស៊ីវិល ប្រ​ភេទក្របខណ្ឌ ឋានន្តរស័ក្តិ ថ្នាក់ សន្ទស្សបៀ​វត្ស ការតាំងស៊ុបវិន័យ ការចោទប្រកាន់តាមផ្លូវតុលា​ការ ការចូលនិវត្តន៍ អាចនឹងចូលរួមចំណែក​ធ្វើឱ្យការអនុវត្តការងារប្រចាំថ្ងៃរបស់មន្ត្រី នៃអង្គភាពប្រឆាំងអំពើពុករលួយ និងបន្ថែមការយ​ល់​ដឹងឱ្យកាន់តែមាន​ប្រសិទ្ធិ​ភាពខ្ពស់ថែមមួយកម្រិតទៀត។

ជួសមុខឱ្យ លោក ទេសរដ្ឋមន្ត្រី ឱម យ៉ិនទៀង លោក ទូច ស៊ុនណារី បានលើកទឹកចិត្តសិក្ខាកាមនៃ​មន្ត្រីអង្គភាព​ប្រឆាំង​អំពើពុលរលួយទាំងអស់ ត្រូវយកចំណេះ និងជំនាញក្នុងវគ្គបណ្តុះបណ្តាលនេះ ទៅអនុវត្ត​ការងារប្រកប​ដោយការទទួលខុសត្រូវ និងមានប្រសិទ្ធិភាព នូវច្បាប់សហលក្ខខន្តិកៈមន្ត្រីរាជការ និងលិខិតបទដ្ឋានពាក់ព័ន្ធ​មួយ​ចំនួន ដែលចង្អុលបង្ហាញពីសិទ្ធិ ផលប្រយោជន៍ និងកាតព្វកិច្ចមន្ត្រីរាជការស៊ីវិល។គួរបញ្ជាក់ថាការបណ្តុះបណ្តាលច្បាប់ស្តីពីសហលក្ខន្តិកៈមន្ត្រីរាជការស៊ីវិលនៅពេលនេះជាលើកទី១ហើយសម្រាប់​ឆ្នាំ២០១៤ អង្គភាពប្រឆាំងអំពើពុករលួយគ្រោងនឹងបើកវគ្គបណ្តុះបណ្តាលមួយចំនួនទៀតតាមផែន​ការ​របស់​នា​យ​ក​ដ្ឋានបុគ្គលិកនិងបណ្តុះបណ្តាលសម្រាប់ឆ្នាំ២០១៤៕​ ដោយ​៖ រតនា