កំពង់ឆ្នាំង៖ មន្ត្រីប៉ុស្តិ៍នគរបាលឃុំកំពង់ត្រឡាច២នាក់ បានលង់ទឹកស្លាប់​នៅ​ពេល​ពួក​គេជិះកាណូតចុះធ្វើ​ប្រតិបត្តិ​ការបង្ក្រាបបទល្មើសឆក់ត្រី ត្រូវកាណូតជនល្មើសបើក​កៀរ​​និងបុកពន្លិច។​ ករណីនេះបានកើត​ឡើងនៅវេលាម៉ោង​១អាធ្រាត​ថ្ងៃទី២៥ ខែធ្នូ ឆ្នាំ២០១៣ នៅក្នុងដែនទន្លេ ស្ថិតក្នុងភូមិបែកចាន ឃុំអំពិលទឹក ស្រុកកំពង់ត្រឡាច មកដល់​ម៉ោង​១២​ថ្ងៃត្រង់ថ្ងៃទី២៦ខែធ្នូនេះ សមត្ថកិច្ចនិងក្រុមគ្រួសារមិនទាន់រកឃើញ​សពនគរបាលទាំង​ពីរ​នោះ​នៅឡើយ​ទេ។

អធិការនគរបាលស្រុកកំពង់ត្រឡាច លោក ហ៊ុល វាសនា បានឲ្យដឹងថា មន្រ្តី​នគរបាល​​ទាំង២នាក់នោះ​មានឈ្មោះ​ម៉ី សារ៉ាន់ អាយុ៥២ឆ្នាំឋានៈអនុសេនីយទោ ជានាយ​ប៉ុស្តិ៍នគរបាលរដ្ឋបាលកំពង់ត្រឡាច រស់នៅក្នុងភូមិអ្នកតាហាង ឃុំកំពង់ត្រឡាច មាន​ប្រពន្ធឈ្មោះ ខៀវ សុខេន អាយុ៤៨ឆ្នាំ និងមានកូន៣នាក់ និងម្នាក់ទៀតឈ្មោះ សំ វៃ អាយុ​៤៧​​ឆ្នាំ ឋានៈពលបាលឯក ជាមន្ត្រីនគរបាលប៉ុស្តិ៍នគរបាលរដ្ឋបាលអំពិលទឹក។

លោកអធិការនគរបាលស្រុកបន្តថា មុនពេលកើតហេតុមន្ត្រីនគរបាលប៉ុស្តិ៍ចំនួន​៣​នាក់​ និងប្រជាពលរដ្ឋម្នាក់បើក​កាណូត​២គ្រឿងចេញល្បាតក៏ចាប់បានកាណូត​ឆក់ត្រី១​គ្រឿង ប៉ុន្តែជនល្មើស២នាក់បានហក់ទឹកគេចខ្លួនបាត់បន្ទាប់​មកមន្ត្រីនគរបាលម្នាក់​ឈ្មោះ មួន មិថុនា បានយកកាណូតជនល្មើសដែលចាប់បានចងសណ្តោងយកទៅទុក​នៅ​ច្រាំង​ទន្លេមុន។ រីឯមន្ត្រីនគរបាលរងគ្រោះទាំង២នាក់​និងប្រជាពលរដ្ឋម្នាក់ទៀត​ឈ្មោះ ឆើយ បានចេញទៅល្បាត​ជា​​បន្ត​ហើយ​​​ចាប់​បាន​​កាណូតល្មើសមួយគ្រឿងទៀត​គេក៏បាន​យកកាណូតល្មើសនោះមកចងភ្ជាប់​កាណូតរបស់​ខ្លួន។ មួយសន្ទុះ​ក្រោយ​មកជនល្មើស​បាន​លួចបញ្ឆេះម៉ាស៊ីនកាណូតបើកគេចខ្លួន ហើយបានបុកកៀរ​កាណូតរបស់​សមត្ថកិច្ច​បណ្តាល​​​​ឲ្យលិចក្នុងទន្លេនិងបង្កឲ្យបាត់ខ្លួនមន្រ្តីនគរបាលទាំង២នាក់នេះតែម្តង។

លោកបន្តទៀតថា ក្រោយពេលកើតហេតុឈ្មោះ ឆើយ បានហែលទឹកមកដល់ច្រាំង​ទន្លេដោយសុវត្ថិភាព ចំណែក​មន្ត្រីនគរបាលទាំង២នាក់ ទំនងជាមិនចេះហែលទឹក និងរួម​ផ្សំ​ដោយទឹកហូរខ្លាំងផងនោះ​ក៏បានលង់ទឹកស្លាប់​តែម្តង​ទៅ។នៅថ្ងៃដដែលនោះ ប្រជាពលរដ្ឋ សមត្ថកិច្ច អាជ្ញាធរ និងក្រុមគ្រួសារ​កំពុងមុជទឹក​រាវ​រកសាកសពជនរង​គ្រោះ​ទាំង​២ ប៉ុន្តែរហូតមកដល់ម៉ោង១២ថ្ងៃត្រង់នេះ ពួកគេមិនទាន់រក​ឃើញនៅឡើយទេ។

សូមបញ្ជាក់ថា នៅក្នុងកាណូតល្មើសមួយគ្រឿងដែលសមត្ថកិច្ចចាប់បាន មានវត្ថុ​តាង​ល្មើសមួយចំនួនដូចជា៖ អាំង​វិច​ទ័រឆក់ត្រី១គ្រឿង ដងឆក់១គូរ និងអាគុយ១គ្រឿង ដែលមានសរសេរអក្សរដាក់លើអាគុយ​ថា«ភូមិស្តីពន្លិច»​ដែល​អាចបញ្ជាក់បានថា ​ជន​ល្មើស​មានលំនៅដ្ឋាននៅក្នុងភូមិស្តីពន្លិច និងធ្វើឲ្យងាយដល់សមត្ថកិច្ចធ្វើការស្រាវជ្រាវរក​ជនល្មើសចាប់ខ្លួនយកមកផ្តន្ទាទោសតាមច្បាប់នៅពេលដ៏ខ្លីខាងមុខនេះ៕ ដោយ សស្អាត