ភ្នំពេញ៖ ជំងឺគ្រុនឈាមបានសម្លាប់មនុស្សចំនួន៥៧ នាក់ក្នុងរយៈពេលជាង១០ខែដើមឆ្នាំ២០១៣នេះ។ តាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រនិងបាណកសាស្ត្រ បានឲ្យដឹងថា ក្នុងរយៈពេល៤៦សប្ដាហ៏ពោលគឺតាំង ពីខែមករារហូតមកដល់ថ្ងៃ២៨វិច្ឆិកា ជំងឺគ្រុនឈាមបានសម្លាប់ពលរដ្ឋកម្ពុជាយើងប្រមាណជា៥៧នាក់ គឺថយចុះ១២១នាក់ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១២ ដែលបានសម្លាប់មនុស្សរហូតដល់១៧៨នាក់។
.jpg)
តាមរបាយការណ៍បង្ហាញថា ចំនួនករណីគ្រុនឈាមនៅជាង១០ខែមកនេះ មានអ្នកជំងឺគ្រុនឈាមចំនួន ១ម៉ឺន៧ពាន់៦៥នាក់ គឺថយចុះ៥៩% ដែលក្នុងរយៈពេលដូចគ្នាក្នុងឆ្នាំ២០១២ មានរហូតដល់ ៤ម៉ឺន៩០៩នាក់។បើនិយាយពីខេត្តដែលមានចំនួនអត្រានៃអ្នកកើតជម្ងឺគ្រុនឈាមខ្ពស់ជាងគេនោះ គឺខេត្តនៅជាប់ ឬជិតព្រំដែនថៃ។ ទោះជាយ៉ាងណាក្តី ក្រសួងសុខាភិបាលកម្ពុជាបានអំពាវនាវឲ្យប្រជាពលរដ្ឋខ្មែរទាំងអស់ បន្តប្រុងប្រយត្ន័ចំពោះជំងឺនេះ ដោយសារប្រទេសកម្ពុជាកំពុងប្រឈមនឹងកត្តា២គឺ ទឹកជំនន់ ដែលធ្វើឲ្យមានដក់ទឹកជិតភូមិឋានរបស់អ្នកស្រុក កកើតមូសខ្លាដែលជាភ្នាក់ងារចម្លងគ្រុនឈាមច្រើន។
.jpg)
គួរបញ្ជាក់ថា កត្តាទី២គឺប្រទេសជិតខាងកម្ពុជាក៍ដូចជា៖ ប្រទេសនៅតំបន់អាស៊ានខ្លះជំងឺគ្រុនឈាមបានបន្ដកើនឡើងដែលអាចឆ្លងចូលមកប្រទេសកម្ពុជាដែរ។ នៅកម្ពុជា ជម្ងឺគ្រុនឈាមធ្លាប់ផ្ទុះខ្លាំងកាលពីឆ្នាំ២០០៧ ដែលមានអ្នកជម្ងឺគ្រុនឈាម៣ម៉ឺន៩ពាន់៤៦០នាក់ ធ្វើឲ្យមនុស្សស្លាប់ចំនួន៤០៤នាក់។ បន្ទាប់មកនៅឆ្នាំពីឆ្នាំ២០១២ កន្លងទៅ ជំងឺគ្រុនឈាមបានសម្លាប់មនុស្សចំនួន១៨៩នាក់ ក្នុងចំនោមអ្នកកើតជំងឺគ្រុនឈាម៤ម៉ឺន២ពាន់៣៦២នាក់។ កុមារដែលប្រឈមនឹងជំងឺគ្រុនឈាមច្រើនជាងគេគឺមានអាយុចន្លោះពី៥ ទៅ១៤ឆ្នាំ៕ ដោយ ៖ មករា