ភ្នំពេញ៖ អង្គរផ្កាម្លិះ បានជាប់ជាអង្ករដែលមានរសជាតិឆ្ងាញ់ជាងគេលើលោកពីរឆ្នាំជាប់ៗគ្នាក៏តែទន្ទឹមនឹងមោទ នភាពនេះ មន្ត្រីជាន់ខ្ពស់រាជរដ្ឋាភិបាលបានសំដែងក្ដីបារម្ភថា កម្ពុជាមិនមានអង្ករប្រភេទនេះច្រើនអាចឆ្លើយតប
បានគ្រប់គ្រាន់ចំពោះការបញ្ជាទិញពីបរទេសនោះទេ។
លោក ចម ប្រសិទ្ធ រដ្ឋមន្ត្រីក្រសួងឧស្សាហកម្មរ៉ែ និងថាមពល បានថ្លែងក្នុងវេទិកាស្រូវអង្ករកាលពីថ្ងៃទី ២៣ វិច្ឆិកា ២០១៣ នៅឯមជ្ឈមណ្ឌលកោះពេជ្រថា នៅពេលដែលអង្ករផ្កាម្លិះកម្ពុជា បានឈ្នះពានរង្វាន់ជាអង្ករឆ្ងាញ់បំផុតជាលើកទី២ នៅទីក្រុងហុងកុង បង្ហាញថាអង្ករប្រភេទនេះ នឹងមានទីផ្សារនាពេលខាងមុខ ដូច្នេះអ្វីជាក្ដីបារម្ភពេលនេះ បើសិនជាមានការបញ្ជាទិញពីក្រៅប្រទេសច្រើននោះកម្ពុជាពិតជា មិនអាចផ្គត់ផ្គង់បានគ្រប់នោះទេ។
លោកបានថ្លែងយ៉ាងនេះថា «បើល្បីហើយ គេអាចលួចប្រើប្រាស់ឈ្មោះយើងដូច្នេះយើងត្រូវចេះការពារខ្សែក្រវាត់ ឥឡូវអង្ករយើងកំពង់មានកេរ្តិ៍ឈ្មោះ បើសិនជាគេកុម្ម៉ង់ត្រឹមកន្លះលានតោនអី មានគ្រប់ឲ្យគេទេ? កុំថា ដល់កន្លះលានតោន ត្រឹមតែ៥ម៉ឺនតោន អាចរកឲ្យគេបានទេ? មិនអាចដើរទិញត្រង់នេះបន្តិចត្រង់នោះបន្តិចនោះទេ ដូច្នេះចាំបាច់ណាស់ត្រូវឲ្យមានការប្រមូលផ្ដុំ»។
ស្របពេលជាមួយគ្នានោះដែរ លោករដ្ឋលេខាធិការ ក្រសួងពាណិជ្ជកម្ម ម៉ៅ ថូរ៉ា ក៏បានជំរុញឱ្យ ភាគីពាក់ព័ន្ធទាំងអស់ប្រញាប់រៀបចំចុះបញ្ជីការកំណត់ស្តង់ដារ ដើម្បីជៀសវាងការបន្លំប្រើប្រាស់ឈ្មោះអង្ករផ្កាម្លិះដែលល្អបំផុតរបស់កម្ពុជានេះ ត្រូវចាប់ផ្ដើមចុះបញ្ជីនៅក្រសួងពាណិជ្ជកម្មឲ្យហើយ កំណត់ឲ្យច្បាស់ពីស្តង់ដារអង្ករម្លិះកម្ពុជា ហើយវិទ្យាស្ថានស្រាវជ្រាវកម្ពុជាត្រូវចាប់ផ្ដើមបណ្ដុះពូជស្រូវ ប្រភេទសុទ្ធ ឬសហការជាមួយឯកជនដើម្បីពង្រីក
ពូជស្រូវប្រភេទឲ្យបានកាន់តែច្រើន។
លោកបានបន្ថែមទៀតថា សមាគមស្រូវអង្ករត្រូវធ្វើកុងត្រាជាមួយប្រទេសបញ្ជាទិញហើយទម្លាក់ពូជស្រូវទាំងនោះឲ្យកសិករជាអ្នកផលិតឲ្យមានការប្រមូលផ្ដុំមួយកន្លែង ហើយទទួលទិញវិញទាំងអស់ដើម្បីផ្គត់ផ្គង់ទីផ្សារធ្វើបែបនេះ។ មិនត្រឹមតែប៉ុណ្ណោះត្រូវមានគោលការណ៍លើកទឹកចិត្តសម្រួលដល់តម្លៃឯកសារផ្សេងៗ ដូចជា លិខិតបញ្ជាក់ ឲ្យមានតម្លៃទាបដើម្បីឲ្យតម្លៃអង្ករកម្ពុជាងាយស្រួលប្រកួតប្រជែងទើបអាចរក្សាបាន នូវកេរ្តិ៍ឈ្មោះ និងសម្រេចការនាំអង្ករចេញបានច្រើន ។
លោកគឹម សាវុធ ប្រធានសហព័ន្ធអ្នកនាំចេញអង្ករកម្ពុជា បានថ្លែងប្រាប់ក្រុមអ្នកសារព័ត៌មានថានេះគឺជាមោទ
នភាពខ្លាំងណាស់របស់ប្រទេសកម្ពុជា ហើយចំណាត់ថ្នាក់នេះក៏ជាការផ្តល់ទំនុកចិត្តដល់អតិថិជនអង្ករកម្ពុជាថែមទៀតផងដែរ។ នេះជាលើកទី២ហើយដែលអង្ករក្រអូបកម្ពុជាបានជាប់ចំណាត់ថ្នាក់លេខ១ក្នុងការប្រកួតរស
ជាតិឆ្ងាញ់លំដាប់អន្តរជាតិ។ កាលពីឆ្នាំ២០១២ កន្លងទៅអង្ករកម្ពុជាដដែលនេះក៏ទទួលបានជ័យលាភីលេខ១ដែរក្នុងការប្រកួតនៅឯ កោះបាលី ប្រទេសឥណ្ឌូនេស៊ី។អង្ករទាំង៦គំរូដែលកម្ពុជានាំចេញទៅប្រកួតនេះ ជាលទ្ធផលនៃការប្រឡងជម្រុះក្នុងក្របខ័ណ្ឌក្នុងប្រទេស ដែលមាន ការចូលរួមពីក្រុមហ៊ុនផ្សេងជាច្រើន។ លក្ខខណ្ឌនៃការប្រកួតនោះ មានរួមបញ្ចូលទាំងការប្រកួតផ្នែករូបសម្បត្តិនៃអង្ករ ការភ្លក់រសជាតិ បាយជាដើម។
លោក គឹម សាវុធ បានបញ្ជាក់ថា ពានរង្វាន់នេះក៏ជាការលើកទឹកចិត្តឲ្យអ្នកផលិតអង្ករកាន់តែខិតខំ ថែមទៀតដើម្បីសម្រេចគោលដៅរបស់រដ្ឋាភិបាលក្នុងការនាំអង្ករចេញឲ្យ បានមួយលានតោនក្នុងឆ្នាំ២០១៥។ កាលពីពេលថ្មីៗនេះ កម្ពុជាក៏បានរៀបចំពិធីបុណ្យអង្ករលើកដំបូងនៅក្នុងខេត្តទេសចរណ៍ សៀមរាប ដែលជាផ្នែកមួយនៃការផ្សព្វផ្សាយអំពីអង្ករខ្មែរ។
គួររំលឹកថា អង្ករផ្កាម្លិះរបស់កម្ពុជាយើង បានចូលរួមប្រកួតនៅក្នុងកម្មវិធី The rice trader world rice conference នៅកោះបាលីប្រទេសឥណ្ឌូណេស៊ី កាលពីឆ្នាំ២០១២ និងកម្មវិធីដដែលនេះនៅទីក្រុងហុងកុងកាលពីប៉ុន្មានថ្ងៃមុន ដោយបានជាប់ជាអង្ករមានឱជារសឆ្ងាញ់បំផុត២ឆ្នាំ ជាប់គ្នាផ្ទួនតែម្ដង៕ ដោយ៖ មករា