ភ្នំពេញ៖ ក្រោមជំនួយរបស់ជប៉ុន តាមរយៈទីភ្នាក់អភិវឌ្ឍន៍ជប៉ុន ហៅកាត់ថា JICA កម្ពុជា​នឹងបង្កើតផែនទីអេឡិចត្រូនិច តាមបច្ចេកវិទ្យាដ៏ទំនើបបំពាក់ តាមនាវាចរណ៍ ដើម្បីត្រួត​ពិនិត្យសណ្ឋានបាតសមុទទ្រនិងជម្រៅទឹកសមុទ្រ​ក្នុងខេត្ត​ព្រះ​សី​ហនុ។ ការបង្កើតផែនទី​អេ​ឡិច​​ត្រូវនេះ ត្រូវចាប់ផ្តើមដំណើរការនៅខែមិថុនាឆ្នាំ២០១៣ ដោយចំណាយរយៈពេល២​ឆ្នាំ។

គម្រោងបង្កើតផែនទីដ៏ទំនើបសម្រាប់ត្រួតពិនិត្យសណ្ឋានបាតសមុទ្រ និងគំរូជម្រៅទឹក​តាមនា​វា​ចរណ៏កំពង់ផែ​ ក្រុង​ព្រះ​សី​ហនុ ត្រូវបានចុះហត្ថលេខានាថ្ងៃសុក្រខែមីនា ឆ្នាំ២០១៣ នៅទីស្តីការក្រសួងសាធារណការ និងដឹកជញ្ជូន ដោយ​លោក ត្រាំ អ៊ឺវតឹក រដ្ឋមន្ត្រី ក្រសួង​សាធារណការនិងដឹកជញ្ជូនកម្ពុជានិងលោក Izaki Hiroshi ប្រធានតំណាង​ការិយា​ល័យ JICA ប្រចាំព្រះរាជាណាចកកម្ពុជា ។

លោករដ្ឋមន្រ្តី ត្រាំ អ៊ឺវតឹក បានលើកឡើងថា រដ្ឋាភិបាលជប៉ុនតាមរយៈទីភ្នាក់ងារ JICA ប្រចាំ​កម្ពុជា បានជួយ​ឧត្ថម្ភគាំ​ទ្រវិស័យកំពង់ផែនៅក្នុងប្រទេសកម្ពុជា ចាប់តាំងពីទសវត្សរ៍​ឆ្នាំ​១៩៩០ ដើម្បីអភិវឌ្ឍ​ហេដ្ឋារចនា​សម្ព័ន្ធ​រូបវ័ន្ត​ផ្សេងៗ ព្រមទាំងការកសាងសមត្ថភាព និងធ្វើឲ្យ​ប្រសើរឡើងនូវការគ្រប់គ្រងសុវត្ថិភាពនាវាចរទៀតផង។

លោករដ្ឋមន្រ្តីបន្តថា ស្ថានភាពបាតសមុទ្រ វាអាចប្រែប្រួលពីមួយឆ្នាំទៅមួយឆ្នាំ ដើម្បីធានា​នូវសុវត្ថិភាព នៃការធ្វើនាវាចរណ៍លើដែនសមុទ្រកម្ពុជាត្រូវតែធ្វើផែនទី ដើម្បីត្រួតពិនិត្យ​ជា​រៀង​រាល់ឆ្នាំ នូវជម្រៅទឹកបាតសមុទ្រ ដែលទាមទារឲ្យមានជម្រៅប្រហែលជា១២ម៉ែត្រ ទៅ ១៤ម៉ែត្រ។

លោករដ្ឋមន្រ្តីសង្ឃឹមថា ក្រុមការងារនឹងបង្កើតនូវកិច្ចប្រតិបត្តិការជាមួយគ្នាយ៉ាងជិតស្និទ្ធដើម្បី បញ្ចប់នូវការពិភាក្សា​ទៅ​លើគម្រោងដែលភាគីទាំងពីរបានចុះហត្ថលេខារួមគ្នានៅពេលនេះ និងសូមអរគុណដល់ពួកគេសម្រាប់​ការងារដ៏លំ​បាក​ទាំង​នោះ។

ប្រធានតំណាងការិយាល័យ JICA ប្រចាំកម្ពុជា លោក Izaki Hiroshi បានបង្ហាញពីការ​ធា​នាសុវត្ថិភាព សន្តិសុខ និងការ​ការ​ពារបរិស្ថាន នាពេលកន្លងមកនៅមានកម្រិត​នៅ​ឡើយ។ ចំពោះគំរូសណ្ឋានបាតសមុទ្រ និងជម្រៅទឹក​សម្រាប់​ នា​វា​ចរណ៍ ដែលកំពុងប្រើប្រាស់នាពេល​បច្ចុប្បន្នគឺផ្អែកទៅតាមព័ត៌មាននាអំឡុងឆ្នាំ១៩៧០ ដែលវាអាចមានហានិភ័យខ្ពស់​បំផុត​សម្រាប់​​នាវាចរណ៍នាពេលបច្ចុប្បន្ន។

លោកតំណាងJICA បានមើលឃើញនូវបញ្ហាដែលងាយរងគ្រោះ ដល់នាវាដែលចូលចតក្នុង​ដែនសមុទ្រកម្ពុជា នាខេត្ត​ព្រះ​សីហនុ ។ ដូច្នេះហើយទើបJICA និងក្រសួងសាធារណការ  ដឹកជញ្ជូន បានឯកភាព​គ្នាបង្កើតឡើង​នូវផែនទីអេឡិច​ត្រូនិចមួយសម្រាប់នាវាចរណ៍ ដែលជា​ទិន្នន័យថ្មីមានលក្ខណៈទំនើបនិងសុក្រឹតភាព។

គួរបញ្ជាក់ថា កំពង់ផែក្រុងព្រះសីហនុ គឺជាកំពង់ផែសមុទ្រ ដែលមានជម្រៅទឹកជ្រៅក្នុងប្រ ទេសកម្ពុជា ហើយមាន​សមត្ថ​ភាព​ប្រតិបត្តិការជាបន្តបន្ទាប់ អាចបំពេញបានតាមសេចក្តីត្រូវ​ការរបស់នាវាចរ ​ដើម្បីឆ្លើយតប​ទៅនឹង​តម្រូវការ​សេដ្ឋកិច្ច សង្គម នៅកម្ពុជា៕

ស.ស្អាត