ភ្នំពេញ៖ លោកប៉ា សុជាតិវង្សអភិបាលរាជធានីភ្នំពេញ បានអនុញ្ញាតឱ្យលោកស្រី Wan Hea Lee ប្រធានការិយាល័យឧត្តមស្នងការទទួលបន្ទុកសិទ្ធមនុស្សនៅកម្ពុជាចូលជួបសម្តែងការគួរសមនិងពិភាក្សាការងារកាលពីព្រឹកថ្ងៃទី២០ សីហា ២០១៣នៅសាលារាជធានីភ្នំពេញ ។
ស្រង់តាមសំដីលោក ឡុង ឌីម៉ង មន្រ្តីអ្នកនាំពាក្យសាលារជាធានីភ្នំពេញបានឲ្យដឹងនៅក្រោយជំនួបនោះថា លោកស្រី Wan Hea Lee ប្រធានការិយាល័យឧត្តមស្នងការទទួលបន្ទុកសិទ្ធមនុស្សនៅកម្ពុជាមកនេះ ក្នុងគោលបំណងណែនាំខ្លួនក្នុងឋានៈជាប្រធានការិយាល័យឧត្តមស្នងការទទួលសិទ្ធមនុស្សថ្មីប្រចាំកម្ពុជា និងពិភាក្សាការងារមួយចំនួនទាក់ទងនឹងកិច្ចសហការរវាងអាជ្ញាធរគ្រប់ជាន់ថ្នាក់របស់សាលារាជធានីភ្នំពេញ ជាមួយការិយាល័យឧត្តមស្នងការទទួលបន្ទុកសិទ្ធមនុស្សដែលមិនអាចខ្វះបាន។
លោកឡុងឌីម៉ង បន្តថា ក្នុងជំនួបនោះដែរ លោកស្រីWan Hea Leeស្នើសុំកិច្ចសហការជាមួយ សាលារាជធានីភ្នំពេញក៏ដូចជាអាជ្ញាធររាជធានីភ្នំពេញដែលមិនអាចខ្វះបានជំរុញការបង្កើនការគោរព សិទ្ធិមនុស្ស និងសិទ្ធិនានាដែលមានចែងក្នុងច្បាប់របស់កម្ពុជាផងហើយក៏ស្របតាមស្តងដាច្បាប់អន្តរជាតិ ផងដែរ។ លោកបន្តទៀតថា ជំនួបនោះក៏បានលើកអំពីបញ្ហាការងារសង្គមកិច្ចមួយចំនួនក្នុងរយៈពេលកន្លង មកដូចជាបញ្ហាដីធ្លី បញ្ហាលំនៅឋាន និងការយកចិត្តទុកដាក់ចំពោះជនពិការកម្ពុជាជាដើម។
លោកស្រីWan Hea Leeនូវបានបញ្ជាក់ បើទោះជាការងារខ្លះការិយាល័យរបស់លោកស្រីមិនមានជំនាញទេ ប៉ុន្តែជាការិយាល័យមួយដែលមានជំនាញខាងសិទ្ធិមនុស្ស ដែលអាចប្រឹក្សា ផ្តល់ មតិយោបល់ឲ្យគ្នាទៅវិញ ទៅមកដើម្បីឲ្យមានការប្រសើរឡើងនូវការគោរពសិទ្ធិទាំងឡាយនានា។
ជាការឆ្លើយតបលោក ប៉ា សុជាតិវង្ស បានសម្តែងនូវការស្វាគមន៍ចំពោះវត្តមានលោកស្រី នៅក្នុងប្រទេស កម្ពុជាលើផ្នែកសិទ្ធិមនុស្ស និងបានវាយតម្លៃខ្ពស់ចំពោះកិច្ចសហការនោះជាការងាដែលត្រូវតែជួបមុខគ្នា ក្នុងការពិភាក្សាផ្តល់យោបល់លើជំនាញនិងផ្នែកនិមួយៗដើម្បីឲ្យមានការប្រសើរឡើងថែមទៀតតាមការ លើកឡើងរបស់លោកស្រី Wan Hea Lee។
លោកអភិបាលព្រមទទួលនូវកិច្ចការទាំងឡាយណាដែលពាក់ព័ន្ធនឹងប្រយោជន៍សេចក្តីសុខ និងការរស់នៅ របស់ប្រជាពលរដ្ឋក្នុងរាជធានីភ្នំពេញ។ ជាមួយគ្នានោះ លោកអភិបាលរាជធានីភ្នំពេញស្នើឲ្យមានការជួប ពិភាក្សា គ្នារវាងការិយាល័យឧត្តមស្នងការទទួលបន្ទុកសិទ្ធមនុស្ស និងសាលារាជធានីភ្នំពេញឲ្យបានញឹក ញាប់ ហើយនឹងអាចបង្កើតឲ្យមានក្រុមការងារមួយដើម្បីធ្វើការសហការគ្នា ពិសេសគឺធ្វើការឲ្យមានការយោគ យល់គ្នា៕ដោយ៖ ស.ស្អាត