ភ្នំពេញ ៖ មន្ត្រីកម្ពុជានិងកូរ៉េរួមគ្នារៀបចំសិក្ខាសាលា ដើម្បីផ្លាស់ប្ដូរបទពិសោធន៍គ្នា ការវាយតម្លៃហេតុប៉ះពាល់បរិស្ថាន។ សិក្ខាសាលានោះ បានធ្វើឡើងនៅព្រឹកថ្ងៃ២១ វិច្ឆិកា នេះ ដែលមានការចូលរួមពីក្រុមអ្នកជំនាញបរិស្ថាន មកពីសាធារណរដ្ឋកូរ៉េ និងមន្ត្រីមកពីក្រសួងស្ថាប័នពាក់ពន្ធ័ចំនួន១២ស្ថាប័ន។
ប្រធាននាយកដ្ឋានអង្កេត ការវាយតម្លៃហេតុប៉ះពាល់បរិស្ថាន នៃក្រសួងបរិស្ថានលោក ពុទ្ធ សូរិទ្ធី បានថ្លែងថា សិក្ខាសាលានោះគឺមានការចែករំលែកចំណេះដឹង បទពិសោធន៍ គ្នាលើការវាយតម្លៃហេតុប៉ះពាល់បរិស្ថាននៃប្រទេសទាំងពីរ រវាងអ្នកជំនាញមកពីវិទ្យាស្ថាន បរិស្ថានកូរ៉េ ជាមួយមន្ត្រីបរិស្ថានរបស់កម្ពុជា។ មន្ត្រីមកពីវិទ្យាស្ថានបរិស្ថានកូរ៉េ លោក Sang Ki Choi បានឲ្យដឹងថា បរិស្ថានមានភាពចាំបាច់ណាស់ ព្រោះការប៉ះពាល់បរិស្ថានធ្វើឲ្យជីវិតមនុស្សរស់នៅមិនបានសុខ និងរារាំងដល់ការអភិវឌ្ឍន៍ផងដែរ។
.jpg)
លោកថា ស្ថានភាពបរិស្ថាន នៅកូរ៉េ និងនៅកម្ពុជា មានភាពស្រដៀងគ្នាច្រើន ដែលអាចសិក្សាគ្នាទៅវិញទៅមកបាន។ អនុរដ្ឋលេខាធិការក្រសួងបរិស្ថានលោក ទា ជុប បានថ្លែងថា ការវាយតម្លៃហេតុប៉ះពាល់ បរិស្ថាន មានសារសំខាន់ចំពោះការអភិវឌ្ឍន៍ ហើយការគិតគូរពីបញ្ហាបរិស្ថានគឺធានារ ឲ្យការអភិវឌ្ឍន៍មានស្ថេរភាព។លោក ទា ជុប បានបន្តថា កម្ពុជាតែងតែគិតគូរអំពីហេតុប៉ះពាល់ បរិស្ថានជានិច្ច មុននឹងអភិវឌ្ឍន៍អ្វីមួយ ប៉ុន្តែនៅតែមានចំណុចខ្វះខាតខ្លះ ដែលទាមទារសិក្សាអំពីបទពិសោធន៍ពីបរទេសបន្ថែមទៀត។ សិក្ខាសាលានោះ មានរយៈពេល២ថ្ងៃគឺថ្ងៃ២១និងថ្ងៃ២២វិច្ឆិកា ដែលសិក្ខាកាមមានការពិភាក្សាគ្នាផ្នែកទ្រឹស្ដីការចុះពិនិត្យជាក់ស្ដែងនៅទីលានចាក់សម្រាមបឹងជើងឯក និងការបំពេញទស្សនកិច្ចសិក្សាការស្ថាបនាផ្លូវនៅខេត្តកោះកុងនោះ ជាដើម៕ ដោយ ៖ មករា