ភ្នំពេញៈ មហោស្រពគីហ្សួណា ជប៉ុន កម្ពុជាដែលប្រារព្វឡើងរយៈពេល៤ថ្ងៃមកនេះទទួលបាន ការគាំទ្រយ៉ាងខ្លំាងពីស្រទាប់យុវជនកម្ពុជា ដែលរឹតតែធ្វើឲ្យចំណងមិត្តភាពនៃប្រទេសទាំង២ កាន់តែរឹងមាំខ្លាំងឡើងបន្ថែមទៀត។
កម្មវិធីមហោស្រពនេះបានប្រារព្វធ្វើឡើងនៅក្នុងប្រទេសកម្ពុជាស្ថិតក្នុងខួបគំរប១០ឆ្នាំ របស់មជ្ឈមណ្ឌលសហប្រតិបត្តិការអន្តរជាតិជប៉ុន កម្ពុជា ដែលមានកិច្ចសហការជាមួយស្ថាន ទូតជប៉ុនប្រចាំកម្ពុជា ដើម្បីជំរុញឲ្យចំណងមិត្តភាពនៃប្រទេសទាំង២កាន់តែស្អិតល្មួតបន្ថែមទៀត។
អ្នកស្រីឃុន វត្តីស្រីលក្ខណ៍ មន្រ្តីផ្នែកសេវាកម្មនិងវប្បធម៌នៃមជ្ឈមណ្ឌលសហប្រតិបត្តិការអន្តរជាតិជប៉ុន-កម្ពុជា CJCC មានប្រសាសន៍ថា មហោស្រពដ៏អស្ចារ្យនេះមានការចូលរួមជា ច្រើនពីស្រទាប់យុវជនកម្ពុជា ពិសេសក្រុមសិស្ស និស្សិតមកពីការសាកលវិទ្យាល័យនានានៅទូទាំងប្រទេសកម្ពុជា។
អ្នកស្រីបញ្ជាក់ថា ពួកគេពិតជាទទួលបានអត្ថប្រយោជន៍ជាច្រើនពីកម្ម វិធីនេះដោយមិនត្រឹមតែបានផ្លាស់ប្តូរបទពិសោធន៍ផ្នែកវប្បធម៌នៃប្រទេសទាំង២ប៉ុណ្ណោះទេ ថែមទាំងទទួលបានចំណេះដឹងនិងការអប់រំថ្មីៗបន្ថែមទៀតសម្រាប់យកទៅអភិវឌ្ឍសមត្ថភាព និងការសិក្សាប្រចាំថ្ងៃរបស់ពួកគេ។
យុវជន រិទ្ធ រុងសត្យា និស្សិតឆ្នាំទី១នៃវិទ្យាស្ថានភាសាបរទេស បានសម្តែងអារម្មណ៍រីករាយ ដែលបានចូលរួមក្នុងមហោស្រពនេះ ព្រោះវាជាកម្មវិធីដ៏អស្ចារ្យនៃសិល្បៈវប្បធម៌ជប៉ុន ទោះបីជាយើងពុំបានទៅដល់ប្រទេសជប៉ុនក៏ដោយក៏អាចឃើញដោយភ្នែកផ្ទាល់នៅក្នុងប្រទេសកម្ពុជាផងដែរ។ ដោយឡែក ចំពោះលោកព្រាប សុវត្ថិកំពូលតារាចម្រៀងដ៏ល្បីរបស់ផលិតកម្មរស្មីហង្សមាស ដែលបានអញ្ជើញ ចូលរួមជាភ្ញៀវកិត្តិយសក្នុងកម្មវិធីបង្ហាញមុខម្ហូបរបស់ជប៉ុនវិញបានបង្ហាញអារម្មណ៍រំភើបដោយ លោក ថា នេះជាលើកទី១ដែលបានឃើញមុខម្ហូបតំណាងឲ្យវប្បធម៌ជប៉ុន ហើយវាក៏បានផ្តល់សារៈសំខាន់ សម្រាប់យើងយកមកអនុវត្តនៅក្នុងជីវភាពរស់នៅផងដែរ។
សូមបញ្ជាក់ថា ចំណងការទូតរវាងកម្ពុជា និងជប៉ុន បានចាប់ផ្តើមតាំងពីឆ្នាំ១៩៥៣ ជាឆ្នាំឯករាជ្យ របស់ព្រះរាជាណាចក្រកម្ពុជា។ ចាប់តាំងពីពេលនោះមកប្រទេសទាំងពីរបានរក្សាចំណងមិត្តភាពដ៏រឹងមាំនេះ ក្នុងគម្រប់ខួប៦1ឆ្នាំហើយ។ ទំនាក់ទំនង ទ្វេភាគីរវាងប្រទេសទាំងពីរមិនត្រឹមតែជាទំនាក់ទំនងនយោបាយ សេដ្ឋកិច្ច និងការអភិវឌ្ឍន៍លើគ្រប់វិស័យប៉ុណ្ណោះទេ តែថែមទាំងលើការផ្លាស់ប្តូរវប្បធម៌ទៀតផង។ ជាងនេះទៅទៀតជប៉ុននៅតែជាប្រទេសជាប់លំដាប់ថ្នាក់ទី១ ក្នុងការផ្តល់ជំនួយដ៏លើសលុបដល់កម្ពុជាក្នុងការអភិវឌ្ឍប្រទេស ក្នុងនោះជាង ៨ឆ្នាំចុងក្រោយនេះ ជប៉ុនបានផ្តល់ជំនួយដល់កម្ពុជាជាង៨០០លានដុល្លារអាមេរិក៕
ដោយៈ ភីនរ៉ា