ភ្នំពេញ៖ ការដ្ឋានស្ថាបនាស្ពានអាកាសស្ទឹងមានជ័យសម្រេចបាន៦៣ភាគរយហើយដោយគ្រោងនឹងបញ្ចប់នៅ ចុងឆ្នាំនេះ ហើយនឹងដាក់ឲ្យប្រើប្រាស់នៅដើមឆ្នាំ២០១៥ខាងមុខនេះ។ ការដ្ឋានស្ពានអាកាសស្ទឹងមានជ័យត្រូវបានមន្រ្តីជំនាញសាលារាជធានីភ្នំពេញប្រកាសឲ្យដឹងថា បានសាងសង់រួចប្រហែលជាង៦០ភាគរយហើយ ដោយក្រុមហ៊ុន OCIC ក្រោមកិច្ចសហការជាមួយសាលារាជធានីភ្នំពេញ និងមន្ទីរសាធារណៈការនិងដឹកជញ្ជូនរាជធានីភ្នំពេញ ដែលគ្រោងបញ្ចប់នៅចុងឆ្នាំនេះ។
លោកសំា ពិសិដ្ឋ ប្រធានមន្ទីរសាធារណៈរការនឹងដឹកជញ្ជូនរាជធានីភ្នំពេញ បានឲ្យដឹងនៅព្រឹកថ្ងៃទី១១ ខែមករា នេះថា ការដ្ឋានសាងសង់សំណង់ស្ពានអាកាសស្ទឹងមានជ័យ កំពុងតែដំណើរការសាងសង់យ៉ាងមមាញឹកជាទីបំផុត ដើម្បីឲ្យទាន់ពេលវេលាដែលបានកំណត់ ក្នុងការបង្កលក្ខណៈងាយស្រួលដល់ការធ្វើចរាចរទៅមករបស់ប្រជាពលរដ្ឋទាំងនៅក្នុងក្រុង នឹងនៅក្រៅក្រុង។
លោកបញ្ជាក់ថា ជាលទ្ធផលរហូតមកទល់ពេលនេះសម្រេចបាន៦៣ភាគរយ ហើយក្នុងនោះហេដ្ឋារចនាសម្ពន្ធ័នៅក្រោមស្ពាន ដូចជាផ្លូវ ស្ពានបង្វាង សម្រេចបានស្ទើរ១០០ភាគរយ ហើយ ការងារដែលនៅសេសសល់កំពុងធ្វើការតភា្ជប់តួស្ពាននិងរៀបចំហេដ្ឋរចនាសម្ពន្ធ័លើស្ពាន។
លោកបន្ថែមទៀតថា ការស្ថាបនាស្ពានអាកាសនេះឡើងមានសារៈសំខាន់ណាស់ ដើម្បីដោះស្រាយ បញ្ហាការកក់ស្ទះចរាចរណ៍ជាប្រចាំនៅក្នុងតំបន់នេះ ស្របពេលដែរកំណើនយានយន្តកំពុងតែកើន ឡើងពីមួយថ្ងៃទៅមួយថ្ងៃ។ ប្រជាពលរដ្ឋដែលរស់នៅរាជធានីភ្នំពេញ ក៏ដូចជានៅតាមបណ្តាល ខេត្តមួយចំនួនដែលត្រូវធ្វើដំណើរឆ្លងកាត់តាមផ្លូវនេះ មានការសប្បាយរីករាយជាខ្លាំងចំពោះរាជ រដ្ឋាភិបាល ក៏ដូចជាអាជ្ញាធរដែលបង្កើតឲ្យមានស្ពានអាកាសនៅក្នុងតំបន់នេះ ព្រោះធ្វើឲ្យគាត់បានធ្វើដំណើរយ៉ាងងាយស្រួលមិនកក់ស្ទះដូចពីមុន ហើយចំណេញពេលវេលានិងថវិកាបានយ៉ាងច្រើន។
កញ្ញស្រីលក្ខណ៍វិញ ជានិស្សិតនៅសាកលវិទ្យាល័យភូមិន្ទភ្នំពេញបានបញ្ជាក់ថា ការបង្កើត ស្ពានអាកាសអោយបានច្រើនដូច្នេះពិតជាមានសារៈសំខាន់ណាស់ សម្រាប់ប្រជាពលរដ្ឋ ក្នុងការធ្វើដំណើរ ពិសេសបានបញ្ជាក់ពីការរីកចំរើនរបស់ប្រទេសកម្ពុជា។
តាមគម្រោងស្ពានអាកាសស្ទឹងមានជ័យ ត្រូវសាងសង់ស្ពានសរុបចំនួន៥ ខ្សែ ក្នុងនោះ មានស្ពាន មេ១ខ្សែស្ពានតូចចំនួន៣ខ្សែ និងស្ពានក្រោមដីចំនួន១ខ្សែ។ស្ពានអាកាសនេះត្រូវបានបើកការដ្ឋាន ស្ថាបនាជាផ្លូវការកាលពីថ្ងៃទី២៦ ខែវិច្ឆិកា ឆ្នាំ២០១៣ក្រោមអធិបតីភាពដ៏ខ្ពង់ខ្ពស់សម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ដោយគ្រោងនឹងសាងសង់ឲ្យរួចរាល់ជាស្ថាពរក្នុង រយៈពេល២៨ខែ ក្នុងទឹកប្រាក់ជាង១៩លានដុល្លារសហរដ្ឋអាមេរិកដោយប្រើប្រាស់កញ្ចប់ថវិកាដែល បានមកពីការវិនិយោគតំបន់អភិវឌ្ឍន៏ជ្រោយចង្វាររបស់ក្រុមហ៊ុនOCIC។
សូមបញ្ជាក់ថា ស្ពានអាកាសស្ទឹងមានជ័យជាគម្រោងស្ពានអាកាសទី៣ហើយរបស់រាជធានីភ្នំពេញក្នុងនោះទី១ស្ពានអាកាសក្បាលថ្នល់ និងទី២ស្ពានអាកាសស្តុបពេទ្យលោកសង្ឃដែលបានប្រសិទ្ធនាមថាស្ពានអាកាស៧មករា៕ ដោយ៖ ភីនរ៉ា