ភ្នំពេញ៖ ក្រុមអ្នកសារព័ត៌មានចំនួន២៨នាក់ មកពីស្ថានីយ៍ទូរទស្សន៍៩ ស្ថានីយ៍វិទ្យុចំនួន៩ កាសែត៤ ទស្សនាវដ្តី៣ និងគេហទំព័រចំនួន៣ បានចូលរួមក្នុងវគ្គបណ្តុះបណ្តាលស្តីពី«សុវត្ថិភាពចរាចរណ៍ និងការបើកបរពេលស្រវឹង» កាលពីព្រឹកថ្ងៃទី ១៧ ធ្នូ ២០១៣ ម្សិលមិញនៅមន្ទីរពេទ្យកុមារ ជាតិ រាជធានីភ្នំពេញ។
វគ្គបណ្តុះបណ្តាលនេះមានរយៈពេលមួយថ្ងៃពេញតែម្តង ក្រោមកិច្ចសហការរវាងពីអង្គចលនា ដើម្បីសុខភាពកម្ពុជា អង្គការ GRSP មជ្ឈមណ្ឌល ភីឌីភី និងមានការរួមចូលវាគ្មិនមកពីក្រសួងសុខាភិបាល និងវិទ្យុបារាំងអន្តរជាតិ។
លោកបានសង្កត់ធ្ងន់ទៅលើលទ្ធផលនៃការស្រាវជ្រាចរបស់អង្កការសុខភាពពិភពលោកស្តីពីវិធាន ការដែលមានប្រសិទ្ធភាព ដើម្បីកាត់បន្ថយការប្រើបា្រស់គ្រឿងស្រវឹងឈានទៅកាត់បន្ថយគ្រោះថ្នាក់ ចរាចរណ៍រួមមានវិធានការតំឡើងពន្ធលើផលិតផលគ្រឿងស្រវឹង,ការហាមឃាត់ការផ្សាយពាណិជ្ជកម្ម គ្រឿងស្រវឹង,ការកំហិតកន្លែងលក់ និងម៉ោងលក់គ្រឿងស្រវឹង,និងការធ្វើតេស្តខ្យល់ដង្ហើម។ល។
លោកក៏បានលើកឡើងទៀតដែរថា វិធានការដែលគ្មានប្រសិទ្ធភាពដូចជា៖ ការដាក់បំរាមសុខភាព,ការកំណត់ស្តង់ដារផឹកគ្រឿងស្រវឹង និងការអប់រំបុគ្គលអ្នកផឹកដែលមិនមានការផ្លាស់ប្តូរបរិយាកា សជុំវិញ។ប្រធានមជ្ឈមណ្ឌលភីឌីភី លោក យង់ គឹមអេង បានបង្ហាញនូវទស្សនៈផ្ទុយគ្នាអំពីគ្រឿងស្រវឹង រវាងសុខភាពសាធារណៈ និងឧស្សាហកម្មគ្រឿងស្រវឹង។ ទស្សនៈរបស់សុខភាពសាធារណៈ គឺគ្រឿង ស្រវឹងគឺជាមូលហេតុនៃជំងឺគ្រោះថ្នាក់ចរាចរណ៍,អំពើហិង្សា និងការបាត់សណ្តាប់ធ្នាប់សង្គម ភាពក្រីក្រ និងបញ្ហាសង្គមជាច្រើនទៀត។ រីឯឧស្សាហកម្មគ្រឿងស្រវឹងបានដាក់កំហុសទៅលើអ្នកផឹកដែលមិន ទទួលខុសត្រូវ ទើបបង្កឱ្យមានបញ្ហាទាំងនោះកើតមានឡើងគ្រប់ពេលវេលា។
ក្នុងវគ្គបណ្តុះបណ្តាលនេះ គ្រប់សិក្ខាកាមអ្នកសារព័ត៌មានបានពិភាក្សាយ៉ាងផុលផុស និងបាន ឯកភាពគ្នាថា អ្នកកាសែតអាចរួមចំណែកកាត់បន្ថយគ្រោះថ្នាក់ចរាចរណ៍រួមមាន៖ ១-ការផ្សាយអត្ថបទពាក់ព័ន្ធទៅនឹងគ្រោះថ្នាក់ដែលបណ្តាលមកពីគ្រឿងស្រវឹង ២-មិនចូលរួមសរសេរអត្ថបទ និងបង្កើតកម្មវិធីណាដែលលើកទឹកចិត្តឱ្យមានការប្រើប្រាស់គ្រឿងស្រវឹង ៣-តស៊ូមតិតាមរយៈអត្ថបទ ព័ត៌មានសុំឱ្យរដ្ឋាភិបាលដាក់ចេញនូវវិធានដ៏មានប្រសិទ្ធភាពកាត់បន្ថយការប្រើប្រាស់គ្រឿងស្រវឹងដូច ជា ការតំឡើងពន្ធលើផលិតផលគ្រឿងស្រវឹង, ចូលកាត់បន្ថយការផ្សាយពាណិជ្ជកម្មគ្រឿងស្រវឹងជា ដើម។
លោក គឹម យីដេត អគ្គលេខាធិការរងគណៈកម្មការជាតិសុវត្ថិភាពចរាចរណ៍បានចូលរួមកត់សម្គាល់ផងដែរថា ការផ្សព្វផ្សាយពាណិជ្ជកម្ម ពីផលិតផលគ្រឿងស្រវឹង គឺជាកត្តាមួយដែលជំរុញឲ្យប្រជាពលរដ្ឋចង់ទទួលទានគ្រឿងស្រវឹង ហើយការទទួលទានគ្រឿងស្រវឹងនេះ បានក្លាយជាបញ្ហាប្រឈមយ៉ាងធ្ងន់ធ្ងរទៅនឹងគ្រោះថ្នាក់ចរាចរណ៍ នៅក្នុងសង្គមកម្ពុជាបច្ចុប្បន្ន។ដូច្នេះដើម្បីកាត់បន្ថយ នូវអត្រាគ្រោះថ្នាក់ចរាចរណ៍ ត្រូវកាត់បន្ថយនូវការសេពគ្រឿង ហើយដើម្បីកាត់បន្ថយការសេពគ្រឿងស្រវឹង គឺត្រូវតែលុបបំបាត់នូវស្ពតពាណិជ្ជកម្ម ដែលមានការលើកទឹកចិត្តដល់អតិថិជនឲ្យមានការទទួលទានគ្រឿងស្រវឹង។
នាយកអង្គការដៃគូសុវត្ថិភាពចរាចរណ៍ផ្លូវគោកសកល(GRSP)ប្រចាំនៅកម្ពុជា លោក គង់ សុវណ្ណ ដែលបានជួយឧបត្ថម្ភដល់សិក្ខាសាលានេះបានលើកឡើងថា នេះជាជំហានថ្មីមួយទៀត ក្នុងការអប់រំ និងលើកកម្ពស់ការយល់ដឹងអំពីសុវត្ថិភាពចរាចរណ៍ ពិសេសលើកត្តាហានិភ័យចម្បងពីរគឺ៖ “បើកបរក្រោមឥទ្ធិពលគ្រឿងស្រវឹង និងមិនពាក់មួកសុវត្ថិភាព”។
សូមបញ្ជាក់ថា វគបណ្តុះបណ្តាលខាងលើនេះដែរ គឺមានគោលបំណងផ្សព្វផ្សាយដល់អ្នកសារព័ត៌មានអំពីសុវត្ថិភាពចរាចរណ៍ ការបើកបរពេលស្រវឹង និងមូល ហេតុ ដើម្បីចលនាឱ្យអ្នកកាសែតទាំងអស់ចូលរួមចំណែកកាន់តែសកម្មថែមទៀតក្នុងការកាត់បន្ថយ គ្រោះថ្នាក់ចរចរណ៍នៅប្រទេសកម្ពុជា។
បើយោងតាមរបាយការណ៍របស់នគរបាលចរាចរណ៍ផ្លូវគោកនៃអគ្គស្នងការដ្ឋាននគរបាលជាតិបានឱ្យដឹងថា ៩ខែ ឆ្នាំ២០១៣មកនេះ គ្រោះថ្នាក់ចរាចរណ៍កើតឡើង ៣៣០៦លើក លើ ៣៣៤៩លើក។ ក្រៅពីផលប៉ះពាល់ក្នុងពេលបើកបរគ្រឿងស្រវឹង ក៏នឹងធ្វើអោយមានផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់ជាញឹកញាប់ គឺជំងឺថ្លើម សម្ពាធឈាមឡើងខ្ពស់ ទឹកនោមផ្អែម និងមហារីក៕ ដោយ ៖ ភីនរ៉ា