បាត់ដំបង៖ លោក ទ្រី ណារិន អភិបាលខេត្តបន្ទាយមានជ័យ បានទទួលមរណភាពក្នុងហេតុការណ៍គ្រោះថ្នាក់ចរាចរណ៍ នៅស្រុកមោងឬស្សី ខណៈរថយន្ត របស់កាត់បានបើកបុកពីក្រោយរថយន្តធំមួយគ្រឿងទៀត បើកស្របទិសគ្នាពី ខេត្តបន្ទាយមានជ័យ ទៅកាន់រាជធានីភ្នំពេញ។ គ្រោះថ្នាក់ចរាចរណ៍នោះ បានកើតឡើងកាលពីវេលាម៉ោង៤ និង២០នាទីទៀបភ្លឺ ថ្ងៃទី១៣ ខែ វិច្ឆិកា នេះ នៅលើកំណាត់ផ្លូវជាតិលេខ៥ ក្នុង ភូមិមោង ស្រុក មោងឬស្សី ខេត្តបាត់ដំបង។នគរបាលចរាចរណ៍ខេត្តបាត់ដំបងដែលបានចុះទៅវាស់វែងនៅកន្លែងកើតហេតុ បានឲ្យដឹងថា រថយន្តដែលលោក ទ្រី ណារិន ជិះបណ្តាលឲ្យមានគ្រោះថ្នាក់ចរាចរណ៍នោះម៉ាកប្រាដូពណ៌ខ្មៅពាក់ ស្លាលេខរដ្ឋ36.2.0525មានបិតអក្សរគ.ជ.ប.អ.ប ត្រូវខូចខាតខ្ទេចមុខមួយចំហៀងខាងស្តាំទាំងស្រុង។ ហើយក្នុងគ្រោះថ្នាក់ចរាចរណ៍នោះ ក៏បណ្តាលឲ្យអ្នកបើកបរម្នាក់ឈ្មោះ ម៉ៅ រងរបួសធ្ងន់ផងដែរ។
សាក្សីដែលបានដឹងហេតុការណ៍បានប្រាប់សមត្ថកិច្ចថា នៅពេលភ្លឺស្រាងៗថ្ងៃពុធនេះ គេឃើញមានរថយន្តធំមួយគ្រឿង បើកបរពីទិសខាងលិចទៅខាងកើតលើផ្លូវជាតិលេខ៥ពីបាត់ដំបង ទៅភ្នំពេញមួយសន្ទុះ ក្រោយមកក៏ឃើញរថយន្តពណ៌ខ្មៅបើកបរស្របទិសគ្នាក្នុងល្បឿនលឿន បម្រុងប្រជែងជាមួយរថយន្តធំនោះ តែ ហាក់ដូចជា មានអ្វីនៅពីមុខទើបរថយន្តខ្មៅវ៉ា មិនបានក៏ទាញចង្កូតចូលស្តាំវិញបណ្តាលឲ្យបុករថយន្តធំពីក្រោយ បណ្តាលឲ្យមនុស្សក្នុងរថយន្ត២នាក់រងរបួសធ្ងន់។ចំណែករថយន្តធំបានបើកទៅមុខដូចជាមិនដឹងរឿងអ្វី ហើយក្រោយមកទើបសមត្ថកិច្ចទៅដល់កន្លែងកើតហេតុ និង ដឹកជង រងគ្រោះមកកាន់មន្ទីរពេទ្យខេត្តបាត់ដំបង តែជាអកុសល លោក ទ្រី ណារិន អភិបាលខេត្តបន្ទាយមានជ័យ ដែលជាជនរងគ្រោះម្នាក់ ក្នុងចំណោមពីរនាក់នោះបានទទួលមរណៈភាពពេលដឹកមកដល់មន្ទីរពេទ្យ៕ ដោយ៖ស.ស្អាត