ភ្នំពេញ៖ ក្រសួងកិច្ចការនារី បានជំរុញឲ្យក្រសួងស្ថាបន័ទាំងអស់ ត្រូវចេះធ្វើគម្រោងផែនការ សម្រាប់ទាញ យក ថវិការជាតិ មកប្រើប្រាស់ក្នុងការឆ្លើយតបពីតម្រូវការយេនឌ័រនាពេលបច្ចុប្បន្ន ខណៈដែលចំនួនថវិការជាតិនៅមានកម្រិតតិចតួច សម្រាប់រួមចំណែកអនុវត្តក្នុងការងារនេះ។
ថ្លែងនៅក្នុងសិក្ខាសាលាមួយដែលបានរៀប ចំធ្វើនៅថ្ងៃ ទី ១០ ខែកុម្ភៈនេះ លោកជំទាវ ចន្ទ័ សូរីយ៍ រដ្ឋលេខាធិការក្រសួងកិច្ចការនារី បានមានប្រសាសន៏ថា កន្លងមកនេះ ក្រសួងកិច្ចការនារីបានរៀបចំវគ្គ នេះចំនួន៣ដងរួចហើយ តាមរយៈគំរោង មួយដែលឧបត្ថម្ភ ដោយUNDP ដែលធ្វើ ការបណ្តុះបណ្តាលទៅលើក្រសួងសេដ្ឋកិច្ច និងហិរញ្ញវត្ថុ ក្រសួងអភិវឌ្ឍន៍ជនបទនិងក្រសួងការងារបណ្តុះបណ្តាលវិជ្ជាជីវៈ។
លោកជំទាវបញ្ជាក់ថា ប្រទេសកម្ពុជាគឺជាប្រទេសក្រីក្រ ដូច្នេះថវិការជាតិ មានកម្រិត ហើយការរៀបចំថវិការទូទាំងប្រទេសវានៅតែពិបាក ដោយសារតែគ្រប់វិស័យទាំងអស់សុទ្ធ តែ ជា អាទិភាព ដូច្នេះថវិការជាតិមានតិចតួច នាំឲ្យមានការលំបាកធ្វើការចាត់ចែងថវិកាខ្លាំងណាស់។ លោកជំទាវបន្ថែមថា ការងារបញ្ជ្រាបយេនឌ័រចូលទៅគ្រប់វិស័យនេះ ក៏ជាផ្នែកមួយអាទិភាពដែរ ដូច្នេះមន្ត្រីទាំងអស់ត្រូវតែមានទេពកោសល្យយ៉ាងណា ចេះធ្វើផែនការចេះធ្វើគំរោង ដើម្បីទាញយកថវិការ សម្រាប់ ប្រើ ប្រាស់ចូលទៅក្នុងការងារវិស័យនេះ។
ស្រីបណ្ឌិត រៀលណា អ៊ីឈិ សាស្រ្តាចារ្យនៃវិទ្យាស្ថាន RMIT ប្រទេសអូស្រ្តាលីបានមានប្រសាសន៍ថា ក្រសួងកិច្ចការនារីបានស្នើឲ្យមន្ត្រីមកពីតាមក្រសួងទាំងអស់ត្រូវចូលរួមយ៉ាងសកម្មនៅក្នុងសិក្ខាសាលាដែលមានរយៈពេលពីរថ្ងៃនេះ។ លោកស្រីបន្តថា សិក្ខាសាលានេះនិងជួយឲ្យមន្រ្តីទាំងអស់ដែលមកពីក្រសួងផ្សែងៗបានយល់អំពីក្រមខណ្ឌធ្វើផែនការនិងឧបករណ៍នៃការវិភាគសម្រាប់រៀបចំថវិកា ដើម្បីឆ្លើយតបនិងបញ្ហាយេនឌ័រនេះ៕
ដោយ៖ អភិរក្ស