ភ្នំពេញ៖ ក្រុមហ៊ុនយូ ប៊ី អ៊ី ឌីវើឡុបមេន ខូលអិលធីឌី និង ក្រុម ហ៊ុន Zhong qi Holding Group របស់ចិនបានចាប់ដៃគ្នាកសាងតំបន់ ឧស្សាហកម្ម ពាណិជ្ជកម្ម និងផែស្ងួត មួយកន្លែង នៅលើទឹកដីស្រុកស្នួលខេត្តក្រចេះដែលជាតំបន់បង្កើតឡើងនូវចលនាតស៊ូរំដោះជាតិ (ចលនាតស៊ូរណសិរ្ស២ធ្នូ) និងប្រែក្លាយទៅជាតំបន់អភិវឌ្ឍន៍ប្រទាក់ក្រឡាទៅនឹងតំបន់នានាក្នុងប្រទេស នឹងជាសរសៃឈាមសេដ្ឋកិច្ចទៅក្រៅប្រទេស។
នៅក្នុងពិធីប្រកាសបើកការដ្ឋានឈួសឆាយសំអាតដី ដើម្បីកសាងហេដ្ឋារចនាសម្ព័ន្ធនៅលើទីតាំងឧស្សាហកម្ម
A ដែលស្ថិតនៅភូមិត្រពាំងស្រែ ឃុំ២ធ្នូង ស្រុកស្នួល កាលពីថ្ងៃសៅរ៍ទី២៨ ខែធ្នូ ឆ្នាំ២០១៣ លោក អ៊ឹង ប៊ុន អៀង នាយកក្រុមហ៊ុន UBE បានមានប្រសាសន៍ថា បន្ទាប់ពីក្រុមហ៊ុនទទួលបានការទុកចិត្តពីរាជរដ្ឋាភិបាល និងជួលដី
ឲ្យនៅជាប់ព្រំដែនអន្តរជាតិត្រពាំងស្រែវ៉ាលី ដែលជាតំបន់មានសក្កានុពលយ៉ាងទូលំទូលាយទៅកាន់ទីផ្សាប្រទេសវៀតណាម ឡាវ និងប្រទេសចិន ប្រមាណជាជិត១០០០ហិកតា ក្នុងរយៈពេល៥០ឆ្នាំនោះក្រុមហ៊ុនបានសហការជាមួយដៃគូរជាច្រើន ពិសេសក្រុមហ៊ុនធំៗដែលមានធនធានមហាសាលមកពីប្រទេសចិនមកបណ្តាក់ទុនអភិវឌ្ឍន៍តំបន់នេះឲ្យក្លាយទៅជាឃ្លាំង ឧស្សាហកម្ម ពាណិជ្ជកម្ម និងផែស្ងួតយ៉ាងពិតប្រាកដ។
លោកបន្តថា ក្នុងរយៈពេលពី១៥ទៅ២០ឆ្នាំទៀត ផ្ទៃដីទាំងនេះនឹងក្លាយទៅជាសំណង់ហេដ្ឋារចនាសម្ព័ន្ធ ផ្លូវថ្នល់ ស្ពាន ប្រឡាយ រោងចក្រ សហគ្រាសធំៗ តំបន់ពាណិជ្ជកម្មទំនើប តំបន់កំសាន្តដ៏ផូរផង់ជាច្រើន ទូរគមនាគមន៍ដ៏ស្ងិតរមួត និងមានផលិតផលសម្បូរបែបបម្រើសេចក្តីត្រូវការរបស់ប្រជាជនក្នុងស្រុក និងនាំចេញទៅលក់នៅក្រៅប្រទេស ថ្ពួកយកចំណូលដ៏ក្រាសក្រែលពីវិស័យនេះនិងទេសចរណ៍ នឹងស្រូបយកកម្លាំងពលកម្មបានរាប់ពាន់នាក់មកបំរើការងារ ព្រមទាំងផ្តល់នូវចំណេះដឹង បច្ចេកទេស បទពិសោធន៍ថ្មីពីបរទេសដល់ពលរដ្ឋកម្ពុជា ។
លោក Zhang qirong នាយកក្រុមហ៊ុន Zhong qi Holding Group បានថ្លែងឲ្យដឹងថា កម្ពុជា-ចិនពិតជាមានទំនាក់ទំនង
ល្អជាមួយគ្នាជាយូឆ្នាំមកហើយ ពិសេសមានទំនុកចិត្តខ្ពស់សហការដោយមានភាពស្មោះត្រង់លើយុទ្ធសាស្រ្តគ្រប់វិស័យដោយរក្សាគាំទ្រ និងការអភិវឌ្ឍន៍រួមគ្នា លើផ្នែកពាណិជ្ជកម្មទទួលបានជោគជ័យយ៉ាងត្រចះត្រចង់ឥតឈប់ឈរ។ លោកបន្តថា សហគ្រាស Zhong qi ជាក្រុមហ៊ុនដែលមានទ្រង់ទ្រាយធំបានរួមបញ្ចូលគ្នាចំនួន៥ក្រុមហ៊ុន រួមទាំងក្រុមហ៊ុន Zhong qi ក្រៅប្រទេសនេះទៀតផងនិងមានប្រវត្តិអភិវឌ្ឍន៍លើវិស័យនេះរយៈពេលជាង៦០ឆ្នាំមកហើយ ដែលរហូតមកដល់ពេលនេះមានប្រាក់ចំណូលជាង១៥០០លានដុល្លារក្នុងមួយឆ្នាំៗ។
ដោយឡែកតំបន់ឧស្សាហកម្មAនេះជាផ្នែកមួយដ៏សំខាន់នៃការវិនិយោគក្រៅស្រុក។ក្នុងនោះក្រុមមានគម្រោង
វិនិយោគជា៣ដំណាក់កាល ដែល ដំណាក់កាលទី១ កែច្នៃគ្រឿងសង្ហារឹមពីឈ រួមមានទ្វារបង្ហួចកែច្នៃផលិតផលខ្សែកាបខ្សែភ្លើងនិងប្លាស្ទីក។ទី២បង្កើតរោងចក្រកែច្នៃផលិតផលជ័រកៅស៊ូទៅជាសំបក កង់រថយន្ត ម៉ូតូ មានគុណភាពខ្ពស់ឲ្យបាន១ពាន់ម៉ឺនកំប្លេក្នុង១ឆ្នាំនិងទី៣កែច្នៃដំឡូងមីទៅជាមេតាណុល អាល់កុល និងសម្ភារៈគ្រឿង
សំណងជាដើម ដែលគ្រោងនឹងចំណាយថវិកាដំបូងប្រមាណជា ២០០លានដុល្លារអាមេរិក។
លោក សរ ចំរ៉ុង អភិបាលខេត្តក្រចេះ បានសម្តែងនូវការគាំទ្រ និងមានមោទនៈភាពចំពោះក្រុមហ៊ុនបរទេសមកពីប្រទេសចិនសហការវិនិយោគជាមួយក្រុមហ៊ុនក្នុងស្រុក បណ្តាក់ទុនជាច្រើនរយលានដុល្លារដើម្បីអភិវឌ្ឍន៍តំបន់ឧស្សាហកម្មនៅលើទឹកដីខេត្តក្រចេះ។ ហើយនេះជាសមិទ្ធិផលថ្មីមួយទៀតសម្រាប់ខេត្ត និងជាកាដូរចុងឆ្នាំ២០១៣សម្រាប់ប្រជាពលរដ្ឋក្នុងខេត្តក្រចេះទាំងមូល ក៏ដូចជាការបង្ហាញឲ្យឃើញពីសន្តិភាពយ៉ាងពេញលេញនិង ស្ថិរភាពនយោបាយយ៉ាងល្អនៅក្នុងប្រទេសយើង ធ្វើឲ្យអ្នកវិនិយោគជឿទុកចិត្តមកសហការបណ្តាក់ទុនវិនិយោគដ៏ច្រើនសន្ធឹកសន្ធាប់នៅក្នុងប្រទេសកម្ពុជា មិនដូចអ្វីដែលបានលើកឡើងរបស់បក្សប្រឆាំងនោះទេ។
យ៉ាងណាក៏ដោយលោកសុំឲ្យក្រុមហ៊ុនមានការគិតគូរជាមុនឲ្យបានច្បាស់លាស់ ក្នុងការដំណើរការវិនិយោគរបស់ខ្លួនដើម្បីបញ្ជៀសនូវហានិភ័យដែលអាចកើតមានដោយយថាហេតុ។សម្រាប់ រដ្ឋាភិបាល ក៏ដូចជាអាជ្ញាធរមូលដ្ឋាននិងគាំទ្រជានិច្ចនូវរាល់កិច្ចដំណើរការរបស់ក្រុមហ៊ុនទាំងលិខិតបទដ្ឋាគតិយុទ្ធផ្សេង និងច្បាប់ការងារផ្សេងៗដែលពាក់ព័ន្ធ។សូមបញ្ជាក់ថា នៅក្នុងពិធីប្រកាសបើកដំណើរការ សំអាតដី ឈួសឆាយដីនេះ ក៏មានការអញ្ជើញចូលរួមពីលោក នូរ ភឿង ប្រធានក្រុមប្រឹក្សាខេត្ត អភិបាល អភិបាលរងខេត្ត ស្រុក មន្រ្តីរាជការ កងកម្លាំងប្រដាប់អាវុធនិងប្រជាពលរដ្ឋប្រមាណជាង៥០០នាក់ រួមនិងប្រតិភូភាគីចិនជាដៃគូរជាច្រើននាក់ដែរ ៕ ដោយ៖ សស្អាត